ດຳລົງຊີວິດຕາມຖ້ອຍຄຳຂອງສາດສະດາ

ໂດຍ ແຄໂຣ ແອັຟ ມິກຄອງກີ

ທີ່ປຶກສາທີໜຶ່ງໃນຝ່າຍປະທານອົງການຍິງໜຸ່ມສາມັນ

ເພື່ອຈະສອດຄ່ອງກັບຈຸດປະສົງອັນສູງສົ່ງຂອງສະຫວັນ, ເຮົາຕ້ອງສະໜັບສະໜູນສາດສະດາ ແລະ ເລືອກທີ່ຈະດຳລົງຊີວິດຕາມຖ້ອຍຄຳຂອງເພິ່ນ.

ພຣະບິດາໃນສະຫວັນຂອງເຮົາຮັກລູກໆຂອງພຣະອົງທຸກຄົນ ແລະ ປະສົງໃຫ້ເຂົາເຈົ້າຮູ້ຈັກ ແລະ ເຂົ້າໃຈແຜນແຫ່ງຄວາມສຸກຂອງພຣະອົງ. ເພາະສະນັ້ນ, ພຣະອົງຈຶ່ງເອີ້ນສາດສະດາ, ຜູ້ທີ່ໄດ້ຮັບການແຕ່ງຕັ້ງດ້ວຍອຳນາດ ແລະ ສິດອຳນາດທີ່ຈະກະທຳໃນພຣະນາມຂອງພຣະອົງ ສຳລັບຄວາມລອດຂອງລູກໆຂອງພຣະອົງ. ພວກເພິ່ນເປັນທູດແຫ່ງຄວາມຊອບທຳ, ເປັນສັກຂີພະຍານເຖິງພຣະເຢຊູຄຣິດ ແລະ ອຳນາດແຫ່ງການຊົດໃຊ້ຂອງພຣະອົງທີ່ບໍ່ມີຂອບເຂດສິ້ນສຸດ. ພວກເພິ່ນດຳລົງຂໍກະແຈແຫ່ງອານາຈັກຂອງພຣະເຈົ້າຢູ່ເທິງໂລກ ແລະ ໄດ້ຮັບສິດອຳນາດທີ່ຈະດຳເນີນພິທີການແຫ່ງຄວາມລອດ.

ໃນສາດສະໜາຈັກທີ່ແທ້ຈິງຂອງພຣະຜູ້ເປັນເຈົ້າ, ບໍ່ມີໃຜເລີຍເວັ້ນແຕ່ຄົນດຽວເທົ່ານັ້ນເທິງໂລກໃນເວລາໃດເວລາໜຶ່ງທີ່ໄດ້ຮັບອຳນາດນີ້ ແລະ ຂໍກະແຈຂອງຖານະປະໂລຫິດນີ້.¹ ເຮົາສະໜັບສະໜູນ ປະທານທອມມັສ ແອັສ ມອນສັນ ວ່າເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍຂອງເຮົາ. ເພິ່ນເປີດເຜີຍພຣະຄຳຂອງພຣະຜູ້ເປັນເຈົ້າ ເພື່ອຊີ້ນຳ ແລະ ນຳພາສາດສະໜາຈັກຂອງເຮົາ ທັງໝົດ ຕາມທີ່ ປະທານ ເຈ ຣູເບັນ ຄະລາກ ຜູ້ລູກ ໄດ້ອະທິບາຍວ່າ, “ປະທານຂອງສາດສະໜາຈັກ … ເປັນຄົນດຽວເທົ່ານັ້ນທີ່ດຳລົງສິດທິທີ່ຈະໄດ້ຮັບການເປີດເຜີຍສຳລັບສາດສະໜາຈັກ.”²

ກ່ຽວກັບສາດສະດາທີ່ມີຊີວິດຢູ່, ພຣະຜູ້ເປັນເຈົ້າບັນຊາຜູ້ຄົນໃນສາດສະໜາຈັກຂອງພຣະອົງວ່າ:

ພວກເຮົາຄວນເອົາໃຈໃສ່ຕໍ່ຖ້ອຍຄຳ ແລະ ພຣະບັນຍັດ ທັງໝົດ ທີ່ສາດສະດາຈະມອບໃຫ້ເຮົາ ຕາມທີ່ເພິ່ນໄດ້ຮັບມັນ, ໂດຍການເດີນໄປໃນຄວາມບໍລິສຸດທັງໝົດຕໍ່ທີ່ປະທັບຂອງພຣະຜູ້ເປັນເຈົ້າ;

ເຮົາຄວນຈະຮັບເອົາຖ້ອຍຄຳຂອງສາດສະດາ, ຄືກັນກັບວ່າມັນມາຈາກພຣະໂອດຂອງພຣະອົງເອງ, ດ້ວຍຄວາມອົດທົນທີ່ສຸດ ແລະ ສັດທາທັງໝົດ.

ເມື່ອເຮົາເຮັດສິ່ງເຫລົ່ານີ້ ປະຕູນະລົກຈະເອົາຊະນະເຮົາບໍ່ໄດ້.³

ເຮົາສະໜັບສະໜູນທີ່ປຶກສາຂອງປະທານມອນສັນ ແລະ ສະພາອັກຄະສາວົກສິບສອງນຳອີກ ວ່າເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍ. “ພວກເພິ່ນມີສິດທິ, ອຳນາດ, ແລະ ສິດອຳນາດທີ່ຈະປະກາດຄວາມຄິດ ແລະ ພຣະປະສົງຂອງ [ພຣະຜູ້ເປັນເຈົ້າ] … , ທີ່ຂຶ້ນຢູ່ກັບ … ປະທານຂອງສາດສະໜາຈັກ.”⁴ ພວກເພິ່ນກ່າວໃນພຣະນາມຂອງພຣະຄຣິດ. ພວກເພິ່ນທຳນາຍໃນພຣະນາມຂອງພຣະຄຣິດ. ພວກເພິ່ນກະທຳທຸກສິ່ງໃນພຣະນາມຂອງພຣະເຢຊູຄຣິດ. ໃນຖ້ອຍຄຳຂອງພວກເພິ່ນ ເຮົາໄດ້ຍິນສຸລະສຽງຂອງພຣະຜູ້ເປັນເຈົ້າ ແລະ ເຮົາຈະຮູ້ສຶກເຖິງຄວາມຮັກຂອງພຣະຜູ້ຊ່ອຍໃຫ້ລອດ. ພຣະຜູ້ເປັນເຈົ້າໄດ້ກ່າວວ່າ, ສິ່ງໃດກໍຕາມທີ່ຜູ້ຮັບໃຊ້ຂອງພຣະອົງຈະກ່າວ ເມື່ອໄດ້ຮັບການດົນໃຈໂດຍພຣະວິນຍານບໍລິສຸດ ຈະເປັນພຣະຄຳພີ ... ແລະ ເປັນອຳນາດຂອງພຣະເຈົ້າໄປສູ່ຄວາມລອດ.⁵ ພຣະຜູ້ເປັນເຈົ້າໄດ້ກ່າວວ່າ ບໍ່ວ່າຈະເປັນໂດຍສຽງຂອງພຣະອົງເອງ ຫລື ໂດຍສຽງຂອງຜູ້ຮັບໃຊ້ຂອງພຣະອົງ, ມັນກໍເໝືອນກັນ.⁶

ພວກເຮົາກະຕັນຍູສຳລັບສາດສະໜາຈັກທີ່ “ຖືກສ້າງຂຶ້ນເທິງຮາກຖານຊຶ່ງພວກອັກຄະສາວົກ ແລະ ພວກຜູ້ທຳນາຍໄດ້ວາງລົງແລ້ວ, ອົງພຣະເຢຊູຄຣິດເຈົ້າເອງ ເປັນຫີນເສົາເອກ.”⁷ ບ້ານຂອງພຣະຜູ້ເປັນເຈົ້າເປັນບ້ານແຫ່ງລະບຽບ, ແລະ ເຮົາສາມາດຫລີກລ້ຽງຈາກການຖືກຫລອກລວງ ກ່ຽວກັບບ່ອນທີ່ເຮົາຄວນຊອກຫາຄຳຕອບຕໍ່ຄຳຖາມຂອງເຮົາ ຫລື ເມື່ອເຮົາບໍ່ແນ່ໃຈວ່າຈະຕິດຕາມສຽງໃດ. ເຮົາບໍ່ຈຳເປັນຕ້ອງ “ຖືກພັດໄປພັດມາ, ແລະ ຫັນເຫໄປມາດ້ວຍລົມປາກແຫ່ງຄຳສັ່ງສອນທຸກຢ່າງ.”⁸ ພຣະເຈົ້າເປີດເຜີຍພຣະຄຳຂອງພຣະອົງຜ່ານຜູ້ຮັບໃຊ້ທີ່ຖືກແຕ່ງຕັ້ງຂອງພຣະອົງ, “ເພື່ອຈັດຕຽມໄພ່ພົນທັງຫລາຍຂອງພຣະອົງໃຫ້ເປັນຜູ້ຮັບໃຊ້ທີ່ເໝາະສົມ ເພື່ອເສີມສ້າງພຣະກາຍຂອງພຣະຄຣິດໃຫ້ຈະເລີນຂຶ້ນ: ຈົນກວ່າເຮົາທຸກຄົນຈະບັນລຸເຖິງຄວາມເປັນນ້ຳໜຶ່ງໃຈດຽວກັນໃນຄວາມເຊື່ອ ແລະ ໃນຄວາມຮູ້ເຖິງເລື່ອງພຣະບຸດຂອງພຣະເຈົ້າ.”⁹ ເມື່ອເຮົາເລືອກທີ່ຈະດຳລົງຊີວິດຕາມຖ້ອຍຄຳຂອງສາດສະດາ, ເຮົາກໍຄົງຢູ່ໃນເສັ້ນທາງຂອງພັນທະສັນຍາທີ່ຈະນຳໄປສູ່ຄວາມດີພ້ອມນິລັນດອນ.

ຈາກແມ່ຄົນໜຶ່ງທີ່ລ້ຽງລູກດ້ວຍຕົວຄົນດຽວ ທີ່ດີ້ນລົນເພື່ອຈະຢູ່ລອດໃນຊ່ວງເວລາແຫ່ງຄວາມອຶດຢາກ, ເຮົາຮຽນຮູ້ເຖິງຄວາມໝາຍຂອງການສະໜັບສະໜູນສາດສະດາ. ພຣະຜູ້ເປັນເຈົ້າໄດ້ສັ່ງໃຫ້ສາດສະດາ ເອລີຢາ ໄປຍັງເມືອງ ຊາເຣຟັດ, ບ່ອນທີ່ເພິ່ນຈະໄດ້ພົບຍິງໝ້າຍຄົນໜຶ່ງ ຜູ້ທີ່ພຣະເຈົ້າໄດ້ບັນຊາວ່າໃຫ້ສະໜັບສະໜູນເພິ່ນ. ຂະນະທີ່ ເອລີຢາໄປຮອດປະຕູເມືອງ, ເພິ່ນໄດ້ເຫັນນາງເກັບຟືນຢູ່. ເພິ່ນໄດ້ເອີ້ນໃສ່ນາງວ່າ, “ຂ້ອຍຂໍດື່ມນ້ຳແດ່.”¹⁰

“ແຕ່ໃນຂະນະທີ່ນາງກຳລັງໄປເອົານ້ຳນັ້ນ ເພິ່ນເອີ້ນໃສ່ນາງ [ອີກ] ວ່າ, ເອົາເຂົ້າຈີ່ຈັກປ່ຽງມານຳແດ່ເດີ.

“ນາງຕອບວ່າ, ໃນນາມຂອງອົງພຣະຜູ້ເປັນເຈົ້າ ພຣະເຈົ້າຂອງທ່ານອົງມີຊີວິດຢູ່, ຂ້ານ້ອຍຂໍສາບານວ່າ ຂ້ານ້ອຍບໍ່ມີເຂົ້າຈີ່ເລີຍ. ຂ້ານ້ອຍມີແຕ່ແປ້ງກຳດຽວໃນຖ້ວຍ ແລະ ນ້ຳມັນໝາກກອກເທດໜ້ອຍໜຶ່ງໃນໄຫ. ຂ້ານ້ອຍມາທີ່ນີ້ເພື່ອເກັບເອົາຟືນຈັກສອງ ຫລື ສາມດົ້ນເມືອເຮືອນ ເພື່ອຄົວສິ່ງທີ່ມີເຫລືອຢູ່ເລັກນ້ອຍສຳລັບຂ້ານ້ອຍ ແລະ ລູກຊາຍ. ອາຫານຄາບນີ້ຈະເປັນຄາບສຸດທ້າຍຂອງພວກຂ້ານ້ອຍ ແລ້ວຕໍ່ໄປພວກຂ້ານ້ອຍກໍຈະຫິວຕາຍ.”

ເອລີຢາ ຕອບວ່າ, “ຢ່າກັງວົນເລີຍ; ຈົ່ງໄປຈັດແຈ່ງອາຫານຂອງເຈົ້າສາ ແຕ່ກ່ອນອື່ນໝົດ, ໃຫ້ເຈົ້າເຮັດເຂົ້າຈີ່ກ້ອນນ້ອຍໆ ຕາມທີ່ເຈົ້າມີນັ້ນມາໃຫ້ຂ້ອຍກິນກ່ອນ, ແລະ ເຫລືອນັ້ນຈຶ່ງເຮັດໃຫ້ເຈົ້າກັບລູກຊາຍຂອງເຈົ້າກິນ.”¹¹

ຂໍໃຫ້ວາດພາບຈັກບຶດໜຶ່ງເຖິງສິ່ງທີ່ຍາກລຳບາກ ທີ່ສາດສະດາໄດ້ຂໍໃຫ້ແມ່ທີ່ອົດຫິວຢູ່ເຮັດ. ແນ່ນອນວ່າ ອົງພຣະເຈົ້າກໍສາມາດຈັດຫາອາຫານໃຫ້ຜູ້ຮັບໃຊ້ທີ່ຊື່ສັດຂອງພຣະອົງ. ແຕ່, ໂດຍການປະຕິບັດໃນພຣະນາມຂອງພຣະຜູ້ເປັນເຈົ້າ, ເອລີຢາໄດ້ປະຕິບັດຕາມທີ່ຖືກຊີ້ນຳ, ຊຶ່ງໃຫ້ຂໍໃຫ້ທິດາທີ່ຊົງຮັກຂອງພຣະເຈົ້າເສຍສະລະສິ່ງທີ່ນາງມີ ເພື່ອສະໜັບສະໜູນສາດສະດາ.

ແຕ່ເອລີຢາໄດ້ສັນຍາພອນສຳລັບການເຊື່ອຟັງນຳອີກວ່າ: “ເພາະອົງພຣະຜູ້ເປັນເຈົ້າ ພຣະເຈົ້າຂອງຊາດອິດສະຣາເອນ ກ່າວໄວ້ວ່າ, ຖ້ວຍນີ້ຈະບໍ່ຂາດແປ້ງເຂົ້າ ແລະ ໄຫນີ້ຈະບໍ່ຂາດນ້ຳມັນ ກ່ອນມື້ທີ່ອົງພຣະຜູ້ເປັນເຈົ້າຈະສົ່ງຝົນລົງມາ.”¹² ພຣະຜູ້ເປັນເຈົ້າໄດ້ໃຫ້ແມ່ໝ້າຍຄົນນັ້ນ ມີໂອກາດເລືອກທີ່ຈະເຊື່ອ ແລະ ເຊື່ອຟັງຖ້ອຍຄຳຂອງສາດສະດາ.

ໃນໂລກທີ່ຖືກຂົ່ມຂູ່ໂດຍຄວາມອຶດຢາກຄວາມຊອບທຳ ແລະ ການອຶດຫິວພຣະວິນຍານ, ເຮົາໄດ້ຖືກບັນຊາໃຫ້ສະໜັບສະໜູນສາດສະດາ. ເມື່ອເຮົາເຊື່ອຟັງ, ສະໜັບສະໜູນ, ແລະ ຢືນຢັນຖ້ອຍຄຳຂອງສາດສະດາ, ເຮົາເປັນພະຍານວ່າເຮົາມີສັດທາ ທີ່ຈະຖ່ອມຕົນຍິນຍອມຕໍ່ພຣະປະສົງ, ສະຕິປັນຍາ, ແລະ ເວລາຂອງພຣະຜູ້ເປັນເຈົ້າ.

ເຮົາຕ້ອງເອົາໃຈໃສ່ຖ້ອຍຄຳຂອງສາດສະດາ ແມ່ນແຕ່ເມື່ອມັນເບິ່ງຄືວ່າບໍ່ມີເຫດຜົນ, ບໍ່ສະດວກ, ແລະ ຍາກທີ່ຈະເຮັດຕາມ. ຕາມມາດຕະຖານຂອງໂລກ, ການຕິດຕາມສາດສະດາອາດບໍ່ເປັນທີ່ນິຍົມ, ບໍ່ຖືກຕ້ອງທາງການເມືອງ, ຫລື ບໍ່ເປັນທີ່ຍອມຮັບທາງສັງຄົມ. ແຕ່ການຕິດຕາມສາດສະດາຈະເປັນສິ່ງທີ່ຖືກຕ້ອງສະເໝີ. ພຣະເຈົ້າກ່າວວ່າ, “ຟ້າສະຫວັນສູງກວ່າແຜ່ນດິນໂລກສັນໃດ, ວິທີທາງທັງຄວາມຄິດເຮົາກໍສູງກວ່າສັນນັ້ນ.”¹³ “ຈົ່ງໄວ້ວາງໃຈໃນອົງພຣະຜູ້ເປັນເຈົ້າດ້ວຍສຸດໃຈຂອງເຈົ້າ; ຢ່າເຊື່ອໝັ້ນຈັກເທື່ອໃນສິ່ງທີ່ເຈົ້າຄິດວ່າເຈົ້າຮູ້ຈັກ.”¹⁴

ພຣະຜູ້ເປັນເຈົ້າໃຫ້ກຽດ ແລະ ໂປດປານຜູ້ທີ່ຈະເອົາໃຈໃສ່ການຊີ້ນຳຂອງສາດສະດາ. ສຳລັບແມ່ໝ້າຍຂອງເມືອງຊາເຣຟັດ, ການເຊື່ອຟັງ ເອລີຢາໄດ້ຊ່ອຍຊີວິດຂອງນາງເອົາໄວ້ ແລະ ໃນທີ່ສຸດ ກໍຊ່ອຍຊີວິດຂອງລູກຊາຍຂອງນາງ. ດັ່ງທີ່ສາດສະດາໄດ້ໃຫ້ສັນຍາໄວ້, “ເຂົາທຸກຄົນກໍມີອາຫານພຽງພໍເປັນເວລາຫລາຍວັນ … ທຸກຢ່າງເປັນໄປຕາມທີ່ອົງພຣະຜູ້ເປັນເຈົ້າໄດ້ສັນຍາຜ່ານທາງເອລີຢາ.”¹⁵

ພຣະຜູ້ເປັນເຈົ້າ “ຈະສະໜອງຄວາມຕ້ອງການຂອງຜູ້ທີ່ໄວ້ວາງໃຈໃນພຣະອົງ.”¹⁶ ຖ້ອຍຄຳຂອງສາດສະດາກໍເປັນເໝືອນດັ່ງ ອາຫານທິບ ຕໍ່ຈິດວິນຍານຂອງເຮົາ. ເມື່ອເຮົາຮັບສ່ວນ, ເຮົາຈະໄດ້ຮັບພອນ, ຖືກປົກປ້ອງ ແລະ ຄຸ້ມຄອງເອົາໄວ້ທັງທາງຝ່າຍໂລກ ແລະ ຝ່າຍວິນຍານ. ເມື່ອເຮົາຊື່ນຊົມຢູ່ກັບຖ້ອຍຄຳຂອງພວກເພິ່ນ, ເຮົາຈະຮຽນຮູ້ວິທີທີ່ຈະມາຫາພຣະຄຣິດ ແລະ ມີຊີວິດຢູ່.

ແອວເດີ ບະຣູສ ອາ ມິກຄອງກີ ໄດ້ຂຽນວ່າ ຜ່ານສາດສະດາ, “ພຣະຜູ້ເປັນເຈົ້າຈະເປີດເຜີຍຄວາມຈິງແຫ່ງຄວາມລອດ, … ຄວາມລອດທີ່ມີຢູ່ໃນພຣະຄຣິດ; ແລະ ພຣະອົງກຳນົດ … ເສັ້ນທາງທີ່ນຳໄປສູ່ຊີວິດນິລັນດອນ. … ໃນທຸກຍຸກທຸກສະໄໝ ພຣະຜູ້ເປັນເຈົ້າປະທານການຊີ້ນຳໃຫ້ແກ່ຜູ້ຄົນຂອງພຣະອົງ ທີ່ເຂົາຕ້ອງການໃນເວລາທີ່ເຂົາຕົກຢູ່ໃນອັນຕະລາຍ. ແລະ ແນ່ນອນວ່າໃນອະນາຄົດຕໍ່ໄປ ຈະມີເວລາທີ່ຈະບໍ່ມີຫຍັງ ເວັ້ນເສຍແຕ່ສະຕິປັນຍາຂອງພຣະເຈົ້າ, ຈາກສະຫວັນ ແລະ ຖືກກ່າວອອກຈາກປາກຂອງສາດສະດາ, ທີ່ຈະຊ່ອຍກູ້ຊີວິດຂອງຜູ້ຄົນຂອງພຣະອົງເອົາໄວ້.”¹⁷

ສຳລັບຂ້າພະເຈົ້າ, ຖ້ອຍຄຳຂອງສາດສະດາທີ່ຄູສອນຊັ້ນກຸນລະສະຕີຂອງຂ້າພະເຈົ້າໄດ້ສອນ ໄດ້ໃຫ້ຄວາມເຂົ້າໃຈແກ່ຂ້າພະເຈົ້າ ວ່າຄວາມສຳພັນທາງການແຕ່ງງານໃນພັນທະສັນຍາຄວນເປັນແບບໃດ. ຖ້ອຍຄຳຂອງສາດສະດາໄດ້ໃຫ້ຂ້າພະເຈົ້າມີສັດທາ ແລະ ຄວາມຫວັງວ່າຂ້າພະເຈົ້າສາມາດຕຽມພ້ອມເພື່ອ ແລະ ມີຄອບຄົວທີ່ມີຄວາມສຸກ. ການສຶກສາຄຳສອນຂອງສາດສະດາຢ່າງສະໝ່ຳສະເໝີ, ທັງສາດສະດາໃນສະໄໝໂບຮານ ແລະ ໃນວັນເວລານີ້, ໄດ້ຄ້ຳຊູຂ້າພະເຈົ້າໃນຊ່ວງເວລາທີ່ຍາກລຳບາກ ແລະ ອິດເມື່ອຍຫລາຍຂອງການມີລູກ, ການສັງສອນ, ແລະ ລ້ຽງດູລູກໆທັງເຈັດຄົນ. ຖ້ອຍຄຳຂອງສາດສະດາໃນພຣະຄຳພີ ແລະ ທີ່ຖືກສອນຈາກແທ່ນປາໄສນີ້ ເປັນຖ້ອຍຄຳທີ່ໃຫ້ການປອບໂຍນ, ຄວາມຮັກ, ຄວາມເຂັ້ມແຂງ, ແລະ ຄວາມຊື່ນບານທີ່ກ່ຽວຂ້ອງກັບເຮົາທຸກຄົນ.

ເມື່ອເຮົາເອົາໃຈໃສ່ຖ້ອຍຄຳຂອງສາດສະດາ, ເຮົາສ້າງບ້ານເຮືອນ ແລະ ຊີວິດຂອງເຮົາເທິງຮາກຖານທີ່ໝັ້ນຄົງຊົ່ວນິລັນດອນ, “ດານຫີນຂອງພຣະຜູ້ໄຖ່ຂອງພວກເຮົາ, ຄື ພຣະຄຣິດ, ພຣະບຸດຂອງພຣະເຈົ້າ, … ເພື່ອວ່າເມື່ອມານສົ່ງລົມພະຍຸຮ້າຍຂອງມັນມາ, ແທ້ຈິງແລ້ວ, ຟ້າແມບເຫລື້ອມກັບລົມບ້າໝູຂອງມັນມາ, ແທ້ຈິງແລ້ວ, ເມື່ອໝາກເຫັບທັງໝົດ ແລະ ລົມຝົນອັນແຮງກ້າຂອງມັນລົງມາຕີລູກ, ມັນຈະບໍ່ມີອຳນາດອັນໃດເໜືອລູກເລີຍທີ່ຈະແກ່ລູກລົງໄປຫາ … ຄວາມທຸກທໍລະມານ ແລະ ຄວາມຈິບຫາຍອັນບໍ່ສິ້ນສຸດ.”¹⁸

ເຮົາມີທາງເລືອກ. ເຮົາອາດເລືອກຈະບໍ່ສົນໃຈ, ບໍ່ເຫັນຄວາມສຳຄັນ, ບໍ່ເອົາໃຈໃສ່, ຫລື ກະບົດຕໍ່ຕ້ານພຣະຄຳຂອງພຣະຄຣິດ ທີ່ຜູ້ຮັບໃຊ້ທີ່ໄດ້ຖືກແຕ່ງຕັ້ງຂອງພຣະອົງໄດ້ກ່າວ. ແຕ່ພຣະຜູ້ຊ່ອຍໃຫ້ລອດໄດ້ສອນວ່າ ຜູ້ທີ່ປະຕິບັດດັ່ງນັ້ນຈະຖືກຕັດອອກຈາກຜູ້ຄົນແຫ່ງພັນທະສັນຍາຂອງພຣະອົງ.¹⁹

ເມື່ອເຮົາອ່ານ ແລະ ສຶກສາຖ້ອຍຄຳທີ່ສັກສິດຂອງສາດສະດາດ້ວຍການອະທິຖານ ແລະ ດ້ວຍສັດທາໃນພຣະຄຣິດ, ດ້ວຍເຈດຕະນາທີ່ແທ້ຈິງ, ພຣະວິນຍານບໍລິສຸດຈະກ່າວຄວາມຈິງຕໍ່ຄວາມຄິດ ແລະ ຫົວໃຈຂອງເຮົາ. ຂ້າພະເຈົ້າຫວັງວ່າເຮົາຈະເປີດຫູຂອງເຮົາໃຫ້ໄດ້ຍິນ, ເປີດໃຈຂອງເຮົາໃຫ້ເຂົ້າໃຈ, ແລະ ເປີດຈິດໃຈຂອງເຮົາ ເພື່ອວ່າຄວາມລຶກລັບຂອງພຣະເຈົ້າຈະເປີດເຜີຍອອກຕໍ່ສາຍຕາຂອງເຮົາ.²⁰

ຂ້າພະເຈົ້າເປັນພະຍານວ່າ ໂຈເຊັບ ສະມິດ ໄດ້ເປັນ ແລະ ເປັນສາດສະດາທີ່ພຣະເຈົ້າໄດ້ເອີ້ນໃຫ້ຟື້ນຟູພຣະກິດຕິຄຸນຂອງພຣະເຢຊູຄຣິດ ແລະ ຖານະປະໂລຫິດຂອງພຣະອົງຢູ່ເທິງໂລກ. ແລະ ຂ້າພະເຈົ້າເປັນພະຍານວ່າ ໃນປະທານມອນສັນ ເຮົາຖືກນຳພາໂດຍສາດສະດາທີ່ແທ້ຈິງຂອງພຣະເຈົ້າໃນວັນເວລານີ້. ຂໍໃຫ້ເຮົາຈົ່ງເລືອກທີ່ຈະຢືນຢູ່ຄຽງຂ້າງສາດສະດາ ແລະ ດຳລົງຊີວິດຕາມຖ້ອຍຄຳຂອງພວກເພິ່ນ ຈົນເຮົາເປັນນ້ຳໜຶ່ງໃຈດຽວກັນໃນສັດທາ, ຖືກຊຳລະໃຫ້ສະອາດໃນພຣະຄຣິດ, ແລະ ເຕັມໄປດ້ວຍຄວາມຮູ້ເຖິງພຣະບຸດຂອງພຣະເຈົ້າເຖີດ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.