ບາດກ້າວຕໍ່ໄປຂອງທ່ານ

ໂດຍ ແອວເດີ ແຣນໂດ ເຄ ເບັນເນັດ

ແຫ່ງສາວົກເຈັດສິບ

ພຣະບິດາເທິງສະຫວັນທີ່ຊົງຮັກຂອງທ່ານ ແລະ ພຣະບຸດຂອງພຣະອົງ ເຊື້ອເຊີນທ່ານໃຫ້ຮັບເອົາບາດກ້າວຕໍ່ໄປ. ຢ່າລໍຊ້າ. ຈົ່ງເຮັດຕອນນີ້ເລີຍ.

ຂ້າພະເຈົ້າຕົກໃຈຕອນໄດ້ພົບກັບສະມາຊິກໄພ່ພົນຍຸກສຸດທ້າຍທີ່ປະເສິດເມື່ອບໍ່ດົນມານີ້. ໄດ້ມີຄຳຖາມວ່າ, “ໃຜແດ່ຢາກອາໄສຢູ່ນຳພຣະບິດາເທິງສະຫວັນອີກມື້ໜຶ່ງ?” ທຸກຄົນໄດ້ຍົກມືຂຶ້ນ. ຄຳຖາມຕໍ່ໄປຄື: ໃຜແດ່ມີຄວາມໝັ້ນໃຈວ່າທ່ານຈະສຳເລັດສິ່ງນັ້ນໄດ້? ໜ້າເສຍໃຈທີ່ຫລາຍຄົນໄດ້ວາງມືລົງ.

ເມື່ອເຮົາເຫັນຄວາມແຕກຕ່າງລະຫວ່າງຄົນທີ່ເຮົາເປັນຢູ່ໃນເວລານີ້ ແລະ ຄົນທີ່ເຮົາປາດຖະໜາຈະກາຍເປັນ, ຫລາຍຄົນກໍຖືກລໍ້ລວງໃຫ້ເລືອກທີ່ຈະສູນເສຍສັດທາ ແລະ ຄວາມຫວັງ.¹

ເພາະ “ບໍ່ມີສິ່ງໃດທີ່ບໍ່ສະອາດຈະອາໄສຢູ່ນຳພຣະເຈົ້າໄດ້,”² ສະນັ້ນ ກ່ອນຈະໄດ້ອາໄສຢູ່ນຳພຣະອົງອີກຄັ້ງ, ເຮົາຈະຕ້ອງຖືກຊຳລະລ້າງໃຫ້ສະອາດຈາກບາບ³ ແລະ ຖືກເຮັດໃຫ້ບໍລິສຸດ.⁴ ຖ້າຫາກເຮົາຕ້ອງເຮັດສິ່ງນີ້ ດ້ວຍຕົວເອງ, ຈະບໍ່ມີໃຜໃນພວກເຮົາເຮັດໄດ້ຈັກຄົນເລີຍ. ແຕ່ເຮົາບໍ່ໄດ້ຢູ່ຄົນດຽວ. ແທ້ຈິງແລ້ວ, ເຮົາບໍ່ໄດ້ຢູ່ຢ່າງໂດດດ່ຽວດຽວດາຍ ຈັກເທື່ອ.

ເຮົາມີຄວາມຊ່ອຍເຫລືອຈາກສະຫວັນ ເພາະພຣະເຢຊູຄຣິດ ແລະ ການຊົດໃຊ້ຂອງພຣະອົງ.⁵ ພຣະຜູ້ຊ່ອຍໃຫ້ລອດໄດ້ກ່າວວ່າ, “ຖ້າຫາກທ່ານມີສັດທາໃນເຮົາ ທ່ານຈະມີອຳນາດທີ່ຈະເຮັດສິ່ງໃດກໍຕາມທີ່ເຮົາເຫັນສົມຄວນ.”⁶ ເມື່ອເຮົາໃຊ້ສັດທາ, ເຮົາຈະມີສັດທາຫລາຍຂຶ້ນ.

ຂໍໃຫ້ເຮົາມາພິຈາລະນານຳກັນ ເຖິງຫລັກທຳສາມຂໍ້ ທີ່ຈະຊ່ອຍເຫລືອເຮົາໃນການເດີນທາງກັບຄືນໄປຫາພຣະບິດາເທິງສະຫວັນຂອງເຮົາ.

ກາຍເປັນເໝືອນດັ່ງເດັກນ້ອຍ

ຫລານຊາຍຫລ້າຂອງພວກຂ້າພະເຈົ້າຈະສະແດງໃຫ້ເຫັນຕົວຢ່າງຂອງຫລັກທຳຂໍ້ທີໜຶ່ງ. ຫລັງຈາກໄດ້ຮຽນຄານ ແລ້ວຢືນຂຶ້ນ, ລາວກໍພ້ອມແລ້ວທີ່ຈະລອງຍ່າງ. ລະຫວ່າງສອງສາມບາດກ້າວທຳອິດ, ລາວໄດ້ລົ້ມລົງ, ໄດ້ຮ້ອງໄຫ້, ແລະ ໄດ້ສົ່ງແວວຕາທີ່ບອກວ່າ, “ຂ້ານ້ອຍຈະບໍ່ພະຍາຍາມອີກຈັກເທື່ອ—ບໍ່ເລີຍ—ຈະບໍ່ລອງເຮັດອີກຈັກເທື່ອເລີຍ!”

ເມື່ອລາວສະດຸດ, ພໍ່ແມ່ທີ່ຮັກຂອງລາວໄດ້ຮູ້ສຶກວ່າລາວໝົດຫວັງ ຫລື ວ່າລາວຈະບໍ່ຍ່າງອີກເລີຍ. ແຕ່ກົງກັນຂ້າມ ເຂົາເຈົ້າໄດ້ຍື່ນແຂນອອກໄປ ແລະ ຮ້ອງຫາລາວ, ແລະ ໂດຍທີ່ເບິ່ງພໍ່ແມ່ຢູ່, ລາວໄດ້ພະຍາຍາມຍ່າງໄປຫາອ້ອມແຂນທີ່ຮັກຂອງພໍ່ແມ່ຂອງລາວ.

ພໍ່ແມ່ທີ່ຮັກແພງຈະພ້ອມສະເໝີທີ່ຈະຍື່ນແຂນອອກໄປຕ້ອນຮັບ ແມ່ນແຕ່ບາດກ້າວນ້ອຍໆຂອງເຮົາ ໄປໃນເສັ້ນທາງທີ່ຖືກຕ້ອງ. ພວກເພິ່ນຮູ້ວ່າຄວາມຕັ້ງໃຈຂອງເຮົາທີ່ຈະພະຍາຍາມ ແລະ ແລ້ວພະຍາຍາມອີກຕໍ່ໄປ ຈະນຳໄປສູ່ຄວາມກ້າວໜ້າ ແລະ ຄວາມສຳເລັດຜົນ.

ພຣະຜູ້ຊ່ອຍໃຫ້ລອດໄດ້ສອນວ່າ ເພື່ອຈະໄດ້ຮັບອານາຈັກຂອງພຣະເຈົ້າເປັນມໍລະດົກ, ເຮົາຕ້ອງກາຍເປັນເໝືອນດັ່ງເດັກນ້ອຍໆ.⁷ ສະນັ້ນ, ເມື່ອກ່າວທາງຝ່າຍວິນຍານແລ້ວ, ຫລັກທຳຂໍ້ທຳອິດຄືວ່າ ເຮົາຕ້ອງເຮັດສິ່ງທີ່ເຮົາໄດ້ເຮັດຕອນຍັງນ້ອຍ.⁸

ດ້ວຍຄວາມຖ່ອມຕົນເໝືອນດັ່ງເດັກນ້ອຍ ແລະ ຄວາມເຕັມໃຈທີ່ຈະເອົາໃຈໃສ່ພຣະບິດາເທິງສະຫວັນ ແລະ ພຣະຜູ້ຊ່ອຍໃຫ້ລອດຂອງເຮົາ, ເຮົາກໍຈະກ້າວໄປໜ້າ. ແລ້ວຢ່າໝົດຫວັງຈັກເທື່ອ, ແມ່ນແຕ່ເມື່ອເຮົາລົ້ມລົງ. ພຣະບິດາເທິງສະຫວັນທີ່ຊົງຮັກຂອງເຮົາ ຊື່ນຊົມໃນທຸກໆບາດກ້າວຂອງເຮົາ, ແລະ ຖ້າຫາກເຮົາລົ້ມລົງ, ພຣະອົງຍັງຊື່ນຊົມນຳຄວາມພະຍາຍາມຂອງເຮົາ ທີ່ຈະລຸກຂຶ້ນອີກ ແລະ ພະຍາຍາມຕໍ່ໄປ.

ກະທຳດ້ວຍສັດທາ

ຫລັກທຳຂໍ້ທີສອງກໍຖືກສະແດງໃຫ້ເຫັນໂດຍໄພ່ພົນທີ່ຊື່ສັດສອງຄົນ, ແຕ່ລະຄົນມີຄວາມປາດຖະໜາຢ່າງເລິກຊຶ້ງທີ່ຈະໄດ້ພົບພໍ້ຄູ່ຄອງນິລັນດອນ. ທັງສອງໄດ້ກ້າວໄປໜ້າດ້ວຍການອະທິຖານຢ່າງເຕັມທີ.

ຢູຣີ, ໄພ່ພົນຍຸກສຸດທ້າຍຊາວຣັດເຊຍຄົນໜຶ່ງ, ໄດ້ເສຍສະລະເດີນທາງໄກ ໄປພຣະວິຫານ. ຢູ່ເທິງລົດໄຟ ລາວໄດ້ສັງເກດເຫັນຍິງສາວທີ່ສວຍງາມຄົນໜຶ່ງ ທີ່ມີໃບໜ້າທີ່ເບີກບານແຈ່ມໃສ ແລະ ໄດ້ຮູ້ສຶກວ່າລາວ ຄວນແບ່ງປັນພຣະກິດຕິຄຸນໃຫ້ກັບນາງ. ລາວໄດ້ເລີ່ມອ່ານພຣະຄຳພີມໍມອນ, ຫວັງວ່ານາງຈະສັງເກດເຫັນໄດ້.

ຢູຣີບໍ່ໄດ້ຮູ້ວ່າຍິງສາວຄົນນັ້ນ, ນາງ ມາຣີຢາ, ກໍເປັນໄພ່ພົນຍຸກສຸດທ້າຍ. ໂດຍທີ່ບໍ່ຮູ້ວ່າ ຢູຣີ ກໍເປັນສະມາຊິກຄືກັນ, ແລະ ໄດ້ເຮັດຕາມການກະຕຸ້ນໃຫ້ແບ່ງປັນພຣະກິດຕິຄຸນໃຫ້ກັບລາວ, ນາງມາຣີຢາ ກໍໄດ້ເລີ່ມອ່ານພຣະຄຳພີມໍມອນຄືກັນ, ຫວັງວ່າທ້າວຢູຣີຈະສົນໃຈມາຖາມ.

ເມື່ອເຂົາເຈົ້າຫລຽວຂຶ້ນ, ຢູຣີ ແລະ ມາຣີຢາ ໄດ້ປະຫລາດໃຈຫລາຍ ທີ່ໄດ້ເຫັນແຕ່ລະຄົນມີພຣະຄຳພີມໍມອນຢູ່ໃນມື—ແລະ ຫລັງຈາກຕົກຫລຸມຮັກ, ເຂົາເຈົ້າໄດ້ຜະນຶກເຂົ້າກັນຢູ່ໃນພຣະວິຫານ. ທຸກວັນນີ້ ຢູຣີ ແລະ ມາຣີຢາ ຄູເທໂພ, ໂດຍທີ່ເປັນຄູ່ນິລັນດອນ, ໄດ້ມີພາກສ່ວນອັນສຳຄັນໃນສາດສະໜາຈັກ ຢູ່ປະເທດຣັດເຊຍ.

ເຮົາບໍ່ໄດ້ເນັ້ນເຖິງຄວາມເຕັມໃຈຂອງທັງສອງໃນການກະທຳດ້ວຍສັດທາເທົ່ານັ້ນ. ມັນກ່ຽວກັບຫລັກທຳຂໍ້ທີສອງນຳອີກ—ພຣະຜູ້ເປັນເຈົ້າໄດ້ເຮັດຫລາຍກວ່າ ການຮ່ວມຄວາມເຕັມໃຈຂອງເຮົາໃສ່ກັບການກະທຳດ້ວຍສັດທາ. ຄວາມເຕັມໃຈຂອງເຮົາ ທີ່ຈະກ້າວໄປໜ້າ ບໍ່ແມ່ນພຽງແຕ່ທີ່ຈະບັນລຸເທົ່ານັ້ນ—ມັນເກີນກວ່ານັ້ນ—ມັນເປັນພອນແຫ່ງຄຳສັນຍາຂອງພຣະອົງ.

ພຣະບິດາເທິງສະຫວັນ ແລະ ພຣະຜູ້ຊ່ອຍໃຫ້ລອດ ພ້ອມແລ້ວ ທີ່ຈະອວຍພອນເຮົາ. ພວກພຣະອົງພຽງແຕ່ຂໍໜຶ່ງສ່ວນສິບ ຈາກສິ່ງທີ່ພວກພຣະອົງໄດ້ໃຫ້ພອນເຮົາ ແລະ ສັນຍາວ່າ ຈະເປີດປະຕູສະຫວັນ!⁹

ເມື່ອໃດກໍຕາມທີ່ເຮົາເຕັມໃຈທີ່ຈະກະທຳດ້ວຍສັດທາ ໃນພຣະເຢຊູຄຣິດ ແລະ ກ້າວໄປໜ້າອີກຂັ້ນໜຶ່ງ, ໂດຍສະເພາະຂັ້ນທີ່ບໍ່ສະດວກ ຈະຮຽກຮ້ອງການປ່ຽນແປງ ຫລື ການກັບໃຈ, ແລ້ວເຮົາຈະໄດ້ຮັບພະລັງ.¹⁰

ຂ້າພະເຈົ້າເປັນພະຍານວ່າ ພຣະຜູ້ເປັນເຈົ້າຈະນຳພາເຮົາ—ແລະ ຜ່ານຜ່າ —ບາດກ້າວຕໍ່ໄປ. ພຣະອົງຈະເພີ່ມພະລັງໃຫ້ແກ່ຄວາມພະຍາຍາມຂອງເຮົາ ຖ້າຫາກເຮົາເຕັມໃຈ ທີ່ຈະພະຍາຍາມຕື່ມອີກ, ກັບໃຈ, ກ້າວເດີນໄປໜ້າ ດ້ວຍສັດທາ ໃນພຣະບິດາເທິງສະຫວັນ ແລະ ພຣະເຢຊູຄຣິດ.

ຂອງປະທານທາງວິນຍານໄດ້ຖືກສັນຍາໄວ້ ບໍ່ພຽງແຕ່ສຳລັບຄົນທີ່ຮັກພຣະເຈົ້າ ແລະ ຮັກສາພຣະບັນຍັດຂອງພຣະອົງເທົ່ານັ້ນ, ແຕ່ສຳລັບຜູ້ທີ່ “ສະແຫວງຫາທີ່ຈະເຮັດນຳອີກ.”¹¹ ຜູ້ທີ່ສະແຫວງຫາ ຈະໄດ້ຮັບພະລັງ.

ມີປ້າຍທີ່ສຳຄັນຢູ່ສອງອັນ ໃນເສັ້ນທາງທີ່ພາໄປຫາພຣະບິດາເທິງສະຫວັນ ແມ່ນພັນທະສັນຍາອັນຕໍ່ເນື່ອງ ຂອງພິທີການແຫ່ງສິນລະລຶກ ແລະ ການຮັກສາວັນຊະບາໂຕ. ປະທານຣະໂຊ ເອັມ ແນວສັນ ໄດ້ສອນຢູ່ໃນກອງປະຊຸມໃຫຍ່ສາມັນເທື່ອແລ້ວນີ້ວ່າ ວັນຊະບາໂຕເປັນຂອງປະທານທີ່ພຣະຜູ້ເປັນເຈົ້າໄດ້ມອບໃຫ້ເຮົາ. ການໄປໂບດທຸກອາທິດດ້ວຍຄວາມອຸທິດຕົນ ເປັນເຄື່ອງໝາຍຕໍ່ພຣະຜູ້ເປັນເຈົ້າວ່າ ເຮົາຮັກພຣະອົງ.¹²

ໃນທຸກໆວັນຊະບາໂຕ ເຮົາເປັນພະຍານວ່າ ເຮົາເຕັມໃຈ—ເຕັມໃຈທີ່ຈະຮັບເອົາພຣະນາມຂອງພຣະອົງ, ລະນຶກເຖິງພຣະອົງຕະຫລອດເວລາ ແລະ ຮັກສາພຣະບັນຍັດຂອງພຣະອົງ.¹³ ແລ້ວສຳລັບການກັບໃຈ ແລະ ຄຳສັນຍາຂອງເຮົາ, ພຣະຜູ້ເປັນເຈົ້າຈະຕໍ່ຄຳສັນຍາ ທີ່ຈະປົດບາບ ແລະ ໃຫ້ເຮົາ “ມີພຣະວິນຍານຂອງພຣະອົງຕະຫລອດເວລາ.”¹⁴ ອິດທິພົນຂອງພຣະວິນຍານບໍລິສຸດຈະເພີ່ມທະວີຂຶ້ນ, ຈະເພີ່ມພະລັງ, ຈະສອນ, ແລະ ນຳພາເຮົາ.

ໃນການລະນຶກເຖິງພຣະອົງ, ເຮົາຫັນຫົວໃຈໄປຫາພຣະຜູ້ຊ່ອຍໃຫ້ລອດ ຜ່ານປ້າຍສຳຄັນສອງອັນນັ້ນ, ແລ້ວເຮົາຈະມີຄວາມພະຍາຍາມຫລາຍຂຶ້ນ ແລະ ພອນທີ່ໄດ້ຖືກສັນຍາໄວ້ ກໍຈະຖືກສົ່ງມາໃຫ້. ເຮົາໄດ້ຖືກສັນຍາວ່າ, ດ້ວຍການຮັກສາວັນຊະບາໂຕໃຫ້ສັກສິດ, ຄວາມບໍລິບູນຂອງແຜ່ນດິນໂລກ ຈະເປັນຂອງເຮົາ.¹⁵

ເສັ້ນທາງກັບໄປຫາພຣະບິດາເທິງສະຫວັນ ຈະນຳພາເຮົາໄປຫາບ້ານຂອງພຣະຜູ້ເປັນເຈົ້າ, ເມື່ອເຮົາໄດ້ຮັບພອນ ທີ່ຈະຮັບເອົາພິທີການສຳລັບຕົວເຮົາເອງ ແລະ ສຳລັບຄົນທີ່ເຮົາຮັກ ຜູ້ໄດ້ລ່ວງລັບໄປແລ້ວ. ປະທານບອຍ ເຄ ແພ໊ກເກີ ໄດ້ສອນວ່າ ພິທີການ ແລະ ພັນທະສັນຍາ ໄດ້ກາຍເປັນໃບຮັບຮອງເຂົ້າໄປຫາທີ່ປະທັບຂອງພຣະເຈົ້າ.”¹⁶ ຂ້າພະເຈົ້າອະທິຖານວ່າ ເຮົາຈະມີຄ່າຄວນສະເໝີ ແລະ ໃຊ້ໃບຮັບຮອງເຂົ້າພຣະວິຫານຂອງເຮົາ ເພື່ອຮັບໃຊ້ເປັນປະຈຳ.

ການເອົາຊະນະຄວາມເປັນມະນຸດທີ່ມີຈິດໃຈທຳມະດາ

ຫລັກທຳຂໍ້ທີສາມແມ່ນ: ເຮົາຕ້ອງສູ້ກັບຄວາມຮູ້ສຶກຂອງມະນຸດທີ່ມີຈິດໃຈທຳມະດາ ທີ່ຈະເລື່ອນມື້ເລື່ອນວັນ ຫລື ຍອມແພ້.¹⁷

ເມື່ອເຮົາກ້າວໄປໜ້າໃນເສັ້ນທາງແຫ່ງພັນທະສັນຍາຂອງເຮົາ, ເຮົາຈະເຮັດຄວາມຜິດພາດ, ບາງອັນຈະເຮັດຜິດພາດຫລາຍເທື່ອ. ເຮົາບາງຄົນຈະດີ້ນລົນກັບນິໄສ ຫລື ການຕິດແສດ ທີ່ເຮັດໃຫ້ເຮົາຮູ້ສຶກໝົດພະລັງທີ່ຈະເອົາຊະນະມັນໄດ້. ແຕ່ສັດທາໃນພຣະບິດາເທິງສະຫວັນ ແລະ ພຣະເຢຊູຄຣິດ ຈະເປັນຫລັກທຳແຫ່ງການປະຕິບັດ ແລະ ເປັນພະລັງ.¹⁸ ຖ້າຫາກເຮົາເຕັມໃຈທີ່ຈະກະທຳ, ເຮົາຈະໄດ້ຮັບພະລັງທີ່ຈະກັບໃຈ ແລະ ປ່ຽນແປງ.

ເຮົາລົ້ມເຫລວຖ້າຫາກເຮົາບໍ່ກ້າວໄປໜ້າດ້ວຍສັດທາ. ເຮົາຈະບໍ່ລົ້ມເຫລວຖ້າຫາກເຮົາຊື່ສັດຕໍ່ພາລະກິດຂອງພຣະຜູ້ຊ່ອຍໃຫ້ລອດຢູ່ໃນໂລກ—ພຣະອົງຜູ້ບໍ່ເຄີຍລົ້ມເຫລວ ແລະ ຈະບໍ່ມີວັນລົ້ມເຫລວຈັກເທື່ອ!

ພອນທີ່ສັນຍາໄວ້

ຂ້າພະເຈົ້າສັນຍາວ່າ ແຕ່ລະບາດກ້າວທີ່ເຕັມໄປດ້ວຍສັດທາ ຈະຊ່ອຍເຮົາໃຫ້ໄດ້ຮັບຄວາມຊ່ອຍເຫລືອຈາກສະຫວັນ, ການນຳພາມີມາເມື່ອເຮົາອະທິຖານເຖິງພຣະບິດາເທິງສະຫວັນ ແລະ ຮັບຟັງພຣະວິນຍານບໍລິສຸດ. ຄວາມເຂັ້ມແຂງຈະມີມາເພາະການເສຍສະລະຊົດໃຊ້ຂອງພຣະເຢຊູຄຣິດ.¹⁹ ການປິ່ນປົວ ແລະ ການໃຫ້ອະໄພຈະມີມາເພາະພຣະຄຸນຂອງພຣະເຈົ້າ.²⁰ ປັນຍາ ແລະ ຄວາມອົດທົນຈະມີມາໂດຍການໄວ້ວາງໃຈໃນເວລາຂອງພຣະຜູ້ເປັນເຈົ້າ. ການປົກປ້ອງຈະມີມາໂດຍການດຳລົງຊີວິດຕາມສາດສະດາທີ່ມີຊີວິດຢູ່ຂອງພຣະເຈົ້າ, ປະທານທອມມັສ ແອັສ ມອນສັນ.

ທ່ານຖືກສ້າງຂຶ້ນມາ “ເພື່ອຈະມີຄວາມສຸກ,”²¹ ຄວາມສຸກທີ່ທ່ານຈະຮູ້ສຶກເມື່ອທ່ານມີຄ່າຄວນທີ່ຈະກັບໄປຫາພຣະບິດາເທິງສະຫວັນ ແລະ ພຣະຜູ້ຊ່ອຍໃຫ້ລອດຂອງທ່ານ ໃນອ້ອມກອດທີ່ອົບອຸ່ນຂອງພວກພຣະອົງ.

ຂ້າພະເຈົ້າເປັນພະຍານວ່າ ສິ່ງເຫລົ່ານີ້ເປັນຄວາມຈິງ. ພຣະບິດາເທິງສະຫວັນທີ່ຊົງຮັກຂອງທ່ານ ແລະ ພຣະບຸດຂອງພຣະອົງ, ພຣະເຢຊູຄຣິດ ຊົງພຣະຊົນຢູ່. ພວກພຣະອົງຮູ້ຈັກທ່ານ ແລະ ຮັກທ່ານ ແລະ ເຊື້ອເຊີນທ່ານໃຫ້ຮັບເອົາບາດກ້າວຕໍ່ໄປ. ຢ່າລໍຊ້າ. ຈົ່ງເຮັດຕອນນີ້ເລີຍ. ໃນພຣະນາມຂອງພຣະເຢຊູຄຣິດ, ອາແມນ.