ແມ່ນຫຍັງຄືຄວາມຈິງ?
ພຣະເຈົ້າເປັນແຫລ່ງແຫ່ງຄວາມຈິງທັງໝົດ. ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ຍອມຮັບເອົາຄວາມຈິງທັງໝົດ ທີ່ພຣະເຈົ້າຖ່າຍທອດໃຫ້ແກ່ລູກໆຂອງພຣະອົງ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂໍຂອບໃຈທຸກທ່ານສຳລັບພາກກອງປະຊຸມທີ່ດົນໃຈນີ້! ຕັ້ງແຕ່ກອງປະຊຸມໃຫຍ່ເດືອນເມສາແລ້ວນີ້, ຂ້າພະເຈົ້າໄດ້ພົບເຫັນຫລາຍໆເຫດການໃນໂລກ, ຈາກເຫດການທີ່ສະເທືອນໃຈ ໄປຈົນເຖິງເຫດການທີ່ດີ.
ພວກເຮົາປິຕິກັບການລາຍງານຂອງກອງປະຊຸມໃຫຍ່ສຳລັບຊາວໜຸ່ມ ທີ່ໄດ້ຖືກຈັດຂຶ້ນໃນທົ່ວໂລກ.1 ໃນກອງປະຊຸມເຫລົ່ານີ້, ຊາວໜຸ່ມທີ່ດີເລີດຂອງພວກເຮົາໄດ້ຮຽນຮູ້ວ່າ ບໍ່ວ່າຈະເກີດຫຍັງຂຶ້ນໃນຊີວິດຂອງພວກເຂົາ, ຄວາມເຂັ້ມແຂງທີ່ຍິ່ງໃຫຍ່ທີ່ສຸດຂອງພວກເຂົາ ແມ່ນມາຈາກພຣະຜູ້ເປັນເຈົ້າ.2
ພວກເຮົາປິຕິຍິນດີທີ່ພຣະວິຫານໄດ້ຖືກສ້າງຂຶ້ນເພີ່ມຕະຫລອດທົ່ວໂລກ. ດ້ວຍການອຸທິດຂອງພຣະວິຫານໃໝ່ໃນແຕ່ລະແຫ່ງ, ອຳນາດຂອງພຣະເຈົ້າໄດ້ເພີ່ມເຂົ້າມາໃນໂລກນີ້ ເພື່ອເຮັດໃຫ້ເຮົາເຂັ້ມແຂງຂຶ້ນ ແລະ ຕໍ່ຕ້ານຄວາມພະຍາຍາມທີ່ຮຸນແຮງຂອງຜູ້ປໍລະປັກ.
ການຂົ່ມເຫັງ ຖືວ່າເປັນສ່ວນໜຶ່ງຂອງອິດທິພົນຂອງຜູ້ປໍລະປັກ. ມັນເປັນບາບທີ່ຮ້າຍແຮງ.3 ໃນຖານະປະທານຂອງສາດສະໜາຈັກ, ຂ້າພະເຈົ້າຂໍຢືນຢັນໃນຄຳສອນຂອງອົງພຣະເຢຊູຄຣິດເຈົ້າກ່ຽວກັບບັນຫານີ້. ຂ້າພະເຈົ້າຂໍເວົ້າຢ່າງກະຈ່າງແຈ້ງວ່າ: ການຂົ່ມເຫັງ ໃດໆ ຕໍ່ຜູ້ຍິງ, ເດັກນ້ອຍ, ຫລື ຜູ້ໃດກໍຕາມ ເປັນສິ່ງທີ່ໜ້າກຽດຊັງຕໍ່ພຣະຜູ້ເປັນເຈົ້າ. ພຣະອົງໂສກເສົ້າ ແລະ ຂ້າພະເຈົ້າໂສກເສົ້າ ທຸກຄັ້ງທີ່ ຜູ້ໃດຜູ້ໜຶ່ງ ຖືກທຳຮ້າຍ. ພຣະອົງຄໍ່າຄວນ ແລະ ພວກເຮົາທຸກຄົນຄໍ່າຄວນ ສຳລັບແຕ່ລະຄົນທີ່ຕົກເປັນເຫຍື່ອຂອງການຂົ່ມເຫັງ ໃນທຸກຮູບແບບ. ຜູ້ທີ່ກະທຳການອັນໜ້າລັງກຽດນີ້ ຈະບໍ່ພຽງແຕ່ຕ້ອງຮັບຜິດຊອບຕໍ່ກົດໝາຍຂອງມະນຸດເທົ່ານັ້ນ ແຕ່ຍັງຈະປະເຊີນກັບພຣະພິໂລດຂອງພຣະເຈົ້າຜູ້ຊົງລິດອຳນາດຍິ່ງໃຫຍ່ນຳອີກ.
ເປັນເວລາຫລາຍທົດສະວັດແລ້ວ ທີ່ສາດສະໜາຈັກໄດ້ດຳເນີນມາດຕະການທີ່ຄວບຄຸມ ເພື່ອປົກປ້ອງ—ໂດຍສະເພາະຢ່າງຍິ່ງ—ເດັກນ້ອຍ ຈາກການຂົ່ມເຫັງ. ມີການຊ່ວຍເຫລືອຫລາຍຢ່າງຢູ່ໃນເວັບໄຊຂອງສາດສະໜາຈັກ. ຂ້າພະເຈົ້າຂໍເຊື້ອເຊີນໃຫ້ທ່ານສຶກສາມັນ.4 ແນວທາງເຫລົ່ານີ້ ມີໄວ້ເພື່ອປົກປ້ອງຜູ້ບໍລິສຸດ. ຂ້າພະເຈົ້າຂໍຮຽກຮ້ອງໃຫ້ພວກເຮົາແຕ່ລະຄົນໄຫວຕົວຕໍ່ຜູ້ໃດກໍຕາມທີ່ອາດຕົກຢູ່ໃນອັນຕະລາຍຈາກການຂົ່ມເຫັງ ແລະ ໃຫ້ປະຕິບັດໂດຍທັນທີ ເພື່ອປົກປ້ອງພວກເຂົາ. ພຣະຜູ້ຊ່ວຍໃຫ້ລອດຈະບໍ່ຍອມທົນໃຫ້ມີການຂົ່ມເຫັງ, ແລະ ໃນຖານະສານຸສິດຂອງພຣະອົງ, ພວກເຮົາກໍບໍ່ຍອມເຊັ່ນກັນ.
ຜູ້ປໍລະປັກມີຍຸດທະວິທີອື່ນທີ່ໜ້າກັງວົນ. ໃນທ່າມກາງສິ່ງເຫລົ່ານັ້ນ ມັນພະຍາຍາມເຮັດໃຫ້ເສັ້ນແຍກລະຫວ່າງຄວາມຈິງ ແລະ ບໍ່ຈິງເຫັນໄດ້ຍາກ. ຂໍ້ມູນຈຳນວນມະຫາສານຢູ່ພຽງປາຍນິ້ວຂອງເຮົາເທົ່ານັ້ນ, ຊໍ້າພັດເຮັດໃຫ້ຍາກຂຶ້ນເລື້ອຍໆທີ່ຈະກຳນົດວ່າ ອັນໃດແມ່ນຄວາມຈິງ.
ການທ້າທາຍນີ້ ເຮັດໃຫ້ຂ້າພະເຈົ້ານຶກເຖິງປະສົບການຂອງຂ້າພະເຈົ້າ ແລະ ຊິດສະເຕີ ແນວສັນ ຕອນທີ່ພວກເຮົາໄປຢ້ຽມຢາມຜູ້ທີ່ມີຍົດຖາບັນດາສັກທ່ານໜຶ່ງ ໃນປະເທດທີ່ມີແຕ່ໜ້ອຍຄົນທີ່ເຄີຍໄດ້ຍິນກ່ຽວກັບພຣະເຢຊູຄຣິດ. ເພື່ອນຜູ້ສູງອາຍຸທີ່ຮັກແພງຄົນນີ້ ໄດ້ປ່ວຍໜັກເມື່ອບໍ່ດົນມານີ້. ເພິ່ນໄດ້ບອກຂ້າພະເຈົ້າວ່າ ໃນຊ່ວງເວລາຫລາຍມື້ທີ່ເພິ່ນນອນຢູ່ຕຽງນັ້ນ, ເພິ່ນມັກຈະແນມເບິ່ງເພດານ ແລະ ຖາມວ່າ, “ແມ່ນຫຍັງຄືຄວາມຈິງ?”
ຫລາຍຄົນໃນໂລກນີ້ “ຖືກກີດກັນຈາກຄວາມຈິງ ເພາະພວກເຂົາບໍ່ຮູ້ວ່າຈະຊອກຫາມັນໄດ້ຢູ່ບ່ອນໃດ.”5 ບາງຄົນອາດເຮັດໃຫ້ພວກເຮົາເຊື່ອວ່າ ຄວາມຈິງນັ້ນແມ່ນຂຶ້ນຢູ່ກັບແຕ່ລະຄົນ—ກໍຄືວ່າ ແຕ່ລະຄົນຄວນກຳນົດດ້ວຍຕົນເອງວ່າ ແມ່ນຫຍັງຄືຄວາມຈິງ. ຄວາມເຊື່ອດັ່ງກ່າວ ເປັນພຽງແຕ່ຄວາມຄິດທີ່ປາດຖະໜາສຳລັບຜູ້ທີ່ຄິດຜິດວ່າ ພວກເຂົາຈະບໍ່ຮັບຜິດຊອບຕໍ່ພຣະເຈົ້າເຊັ່ນກັນ.
ອ້າຍເອື້ອຍນ້ອງທີ່ຮັກແພງທັງຫລາຍ, ພຣະເຈົ້າເປັນແຫລ່ງແຫ່ງຄວາມຈິງທັງໝົດ. ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ຍອມຮັບເອົາຄວາມຈິງ ທັງໝົດ ທີ່ພຣະເຈົ້າຖ່າຍທອດໃຫ້ແກ່ລູກໆຂອງພຣະອົງ, ບໍ່ວ່າຈະຮຽນຮູ້ໃນຫ້ອງທົດລອງທາງວິທະຍາສາດ ຫລື ໄດ້ຮັບໂດຍການເປີດເຜີຍໂດຍກົງຈາກພຣະອົງກໍຕາມ.
ຈາກແທ່ນປາໄສນີ້ ໃນມື້ນີ້ ແລະ ມື້ອື່ນ, ທ່ານຈະສືບຕໍ່ໄດ້ຍິນຄວາມຈິງ. ກະລຸນາຈົດບັນທຶກຄວາມຄິດທີ່ໜ້າສົນໃຈ ແລະ ສິ່ງທີ່ເຂົ້າມາໃນຄວາມຄິດຂອງທ່ານ ແລະ ຢູ່ໃນໃຈຂອງທ່ານລົງໄວ້. ຈົ່ງທູນຂໍດ້ວຍການອະທິຖານ ໃຫ້ພຣະຜູ້ເປັນເຈົ້າຢືນຢັນວ່າ ສິ່ງທີ່ທ່ານໄດ້ຍິນນັ້ນ ເປັນຄວາມຈິງ.
ຂ້າພະເຈົ້າຮັກທ່ານ, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ. ຂ້າພະເຈົ້າອະທິຖານວ່າ ກອງປະຊຸມໃຫຍ່ນີ້ ຈະໃຫ້ອາຫານຝ່າຍວິນຍານ ທີ່ທ່ານກຳລັງສະແຫວງຫາ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.