ຖືກເຮັດໃຫ້ເປັນຄົນດີພ້ອມໃນພຣະອົງ
ຄວາມດີພ້ອມຂອງເຮົາ ສາມາດເປັນໄປໄດ້ໂດຍຜ່ານທາງພຣະຄຸນຂອງພຣະເຈົ້າເທົ່ານັ້ນ.
ພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ມີອຳນາດທີ່ຈະຊ່ວຍເຮົາໃຫ້ລອດ ແລະ ປ່ຽນແປງເຮົາ. ພວກພຣະອົງສາມາດຊ່ວຍໃຫ້ເຮົາກາຍເປັນເໝືອນດັ່ງພວກພຣະອົງໄດ້.
ເມື່ອບໍ່ເທົ່າໃດປີຜ່ານມານີ້, ຫລານຊາຍໜຸ່ມຄົນໜຶ່ງຂອງພວກເຮົາ, ອາໂຣນ, ໄດ້ເລີ່ມມີບັນຫາທາງສຸຂະພາບ. ລາວອິດເມື່ອຍແຮງ, ມີຮອຍຟົກຊໍ້າຫລາຍບ່ອນ, ແລະ ເບິ່ງບໍ່ແຂງແຮງ. ຫລັງຈາກການກວດທາງການແພດ, ໝໍບອກວ່າລາວເປັນພະຍາດເລືອດຈາງ, ພະຍາດທີ່ໄຂກະດູກຢຸດຜະລິດຈຸລັງເມັດເລືອດແດງ, ຈຸລັງເມັດເລືອດຂາວ, ແລະ ເກັດເລືອດ. ຖ້າບໍ່ມີການປິ່ນປົວ ແລະ ການຮັກສາໃນຕອນທ້າຍສຸດ, ເລືອດຂອງລາວຈະບໍ່ສາມາດຈັບຕົວເປັນກ້ອນຢ່າງເໝາະສົມ ຫລື ຕໍ່ສູ້ກັບການຕິດເຊື້ອ, ແມ່ນແຕ່ການລົ້ມ, ການບາດເຈັບ, ຫລື ການເຈັບປ່ວຍພຽງເລັກນ້ອຍ ກໍສາມາດກາຍເປັນອັນຕະລາຍເຖິງຊີວິດໄດ້ຢ່າງວ່ອງໄວ.
ໃນຊ່ວງໄລຍະເວລາໜຶ່ງ, ອາໂຣນໄດ້ຮັບການຖ່າຍເກັດເລືອດ ແລະ ຖ່າຍເລືອດເປັນປະຈຳ ເພື່ອຮັກສາລາວຈາກອັນຕະລາຍ. ໝໍໄດ້ອະທິບາຍວ່າ ວິທີຮັກສາດຽວສຳລັບພະຍາດນີ້ ແມ່ນການປູກຖ່າຍໄຂກະດູກ, ແລະ ໂອກາດທີ່ດີທີ່ສຸດສຳລັບຄວາມສຳເລັດ ແມ່ນການມີອ້າຍເອື້ອຍນ້ອງເປັນຜູ້ບໍລິຈາກ. ຖ້າອ້າຍເອື້ອຍນ້ອງຄົນໜຶ່ງຂອງລາວເປັນຄູ່ທີ່ເໝາະສົມ, ຜົນຂອງການປູກຖ່າຍອາດຊ່ວຍຊີວິດໄດ້. ນ້ອງຊາຍຂອງລາວສີ່ຄົນໄດ້ເຂົ້າຮັບການກວດ, ແລະ ຄົນໜຶ່ງ, ແມ໊ກສະແວວ, ຖືວ່າເປັນຄູ່ທີ່ສົມບູນແບບ.
ເຖິງແມ່ນຈະມີຜູ້ບໍລິຈາກທີ່ເປັນຄູ່ທີ່ສົມບູນແບບກໍຕາມ, ການປູກຖ່າຍໄຂກະດູກ ຍັງມີຄວາມສ່ຽງທີ່ຈະເກີດພາວະແຊກຊ້ອນທີ່ຮ້າຍແຮງ. ຂະບວນການນີ້ ຈຳເປັນຕ້ອງໄດ້ທຳລາຍຈຸລັງຂອງອາໂຣນເອງທີ່ຢູ່ໃນໄຂກະດູກທີ່ເປັນພະຍາດ ໂດຍການປະສົມປະສານກັນຂອງເຄມີບຳບັດ ແລະ ການສາຍລັງສີ ກ່ອນທີ່ຈະໄດ້ຮັບລຳຕົ້ນຈຸລັງຈາກໄຂກະດູກຂອງແມ໊ກສະແວວ ນ້ອງຊາຍຂອງລາວ. ແລ້ວເນື່ອງຈາກລະບົບພູມຄຸ້ມກັນຂອງອາໂຣນມີຄວາມບົກພ່ອງ, ລາວຕ້ອງໄດ້ຖືກແຍກຕົວໃນໂຮງໝໍເປັນເວລາຫລາຍອາທິດ ແລະ ຕ້ອງຢູ່ບ້ານເປັນເວລາຫລາຍເດືອນ ດ້ວຍມາດຕະການພິເສດ, ຂໍ້ຈຳກັດ, ແລະ ການໃຊ້ຢາ.
ຜົນການປູກຖ່າຍທີ່ຄາດຫວັງໄວ້ ກໍຄືວ່າ ຮ່າງກາຍຂອງອາໂຣນຈະບໍ່ປະຕິເສດຈຸລັງຜູ້ໃຫ້ບໍລິຈາກ ແລະ ວ່າຈຸລັງຂອງແມ໊ກສະແວວຈະຄ່ອຍໆຜະລິດຈຸລັງເມັດເລືອດແດງ ແລະ ເມັດເລືອດຂາວ ແລະ ເກັດເລືອດທີ່ຈຳເປັນໃນຮ່າງກາຍຂອງອາໂຣນ. ການປູກຖ່າຍຜູ້ບໍລິຈາກທີ່ປະສົບຜົນສຳເລັດ ກໍ່ໃຫ້ເກີດການປ່ຽນແປງທາງຮ່າງກາຍທີ່ແທ້ຈິງ. ຊ່າງໜ້າປະຫລາດໃຈຫລາຍ, ທ່ານໝໍໄດ້ອະທິບາຍວ່າ ຖ້າອາໂຣນກໍ່ອາດຊະຍາກຳ ແລະ ຖິ້ມເລືອດໄວ້ຢູ່ບ່ອນເກີດເຫດ, ຕຳຫລວດສາມາດຈັບແມ໊ກສະແວວ ນ້ອງຊາຍຂອງລາວໄດ້. ນີ້ກໍຍ້ອນວ່າ ເລືອດຂອງອາໂຣນແມ່ນມາຈາກຈຸລັງທີ່ໄດ້ຖືກປູກຖ່າຍຂອງແມ໊ກສະແວວ ແລະ ມີດີເອັນເອຂອງແມ໊ກສະແວວ, ແລະ ຈະເປັນແນວນີ້ໄປຕະຫລອດຊີວິດຂອງລາວ.
ການທີ່ອາໂຣນໄດ້ຮັບການຊ່ວຍຊີວິດຈາກເລືອດຂອງນ້ອງຊາຍຂອງລາວ ໄດ້ກະຕຸ້ນຄວາມຄິດຫລາຍຢ່າງກ່ຽວກັບໂລຫິດແຫ່ງການຊົດໃຊ້ຂອງພຣະເຢຊູຄຣິດ ແລະ ຜົນກະທົບຂອງການຊົດໃຊ້ຂອງພຣະອົງທີ່ມີຕໍ່ເຮົາ. ມື້ນີ້, ຂ້າພະເຈົ້າຢາກມຸ່ງເນັ້ນໄປທີ່ການປ່ຽນແປງອັນຖາວອນ, ທີ່ໃຫ້ຊີວິດ ທີ່ເກີດຂຶ້ນເມື່ອເຮົາໃຫ້ພຣະຜູ້ເປັນເຈົ້າເຮັດການອັດສະຈັນໃນເຮົາ.1
ອາໂຣນບໍ່ໄດ້ມີອຳນາດໃນຕົວຂອງລາວເອງເພື່ອຈະເອົາຊະນະພະຍາດນີ້. ຮ່າງກາຍຂອງລາວບໍ່ສາມາດສ້າງຈຸລັງເລືອດທີ່ຈຳເປັນຕໍ່ການປະທັງຊີວິດຂອງລາວໄດ້. ບໍ່ວ່າລາວຈະເຮັດຫຍັງເອງກໍຕາມ, ລາວກໍບໍ່ສາມາດປິ່ນປົວໄຂກະດູກຂອງລາວໄດ້. ດັ່ງທີ່ອາໂຣນບໍ່ສາມາດຮັກສາຕົວເອງໄດ້, ເຮົາກໍບໍ່ສາມາດຊ່ວຍຕົວເອງໃຫ້ລອດໄດ້ເຊັ່ນກັນ. ບໍ່ວ່າເຮົາຈະມີຄວາມສາມາດ, ມີການສຶກສາ, ສະຫລາດ, ຫລື ແຂງແຮງຫລາຍສໍ່າໃດ, ເຮົາກໍບໍ່ສາມາດຊໍາລະລ້າງຕົວເຮົາເອງຈາກການບາບຂອງເຮົາໄດ້, ປ່ຽນຮ່າງກາຍຂອງເຮົາໃຫ້ເປັນສະພາບອະມະຕະ, ຫລື ເຮັດໃຫ້ຕົວເຮົາສູງສົ່ງໄດ້. ມັນເປັນໄດ້ໂດຍຜ່ານທາງພຣະຜູ້ຊ່ວຍໃຫ້ລອດ ພຣະເຢຊູຄຣິດ ແລະ ການຊົດໃຊ້ອັນບໍ່ມີຂອບເຂດຂອງພຣະອົງເທົ່ານັ້ນ. “ບໍ່ມີທາງ ຫລື ພຣະນາມອື່ນໃດຈະປະທານໃຫ້ພາຍໃຕ້ສະຫວັນອີກເລີຍ ຊຶ່ງໂດຍທາງນັ້ນມະນຸດຈະລອດໄດ້ໃນອານາຈັກຂອງພຣະເຈົ້າ.”2 ນັ້ນແມ່ນໂລຫິດແຫ່ງການຊົດໃຊ້ຂອງພຣະອົງທີ່ຊໍາລະລ້າງເຮົາ ແລະ ຊຳລະເຮົາໃຫ້ບໍລິສຸດ.3
ເຖິງແມ່ນວ່າອາໂຣນບໍ່ສາມາດປິ່ນປົວຕົວລາວເອງ, ເພື່ອວ່າການປູກຖ່າຍຈະໄດ້ຜົນ ລາວຈຳເປັນຕ້ອງເຕັມໃຈທີ່ຈະເຮັດໃນສິ່ງທີ່ໝໍບອກ—ເຖິງແມ່ນຈະຍາກ ແລະ ທ້າທາຍ. ເຖິງແມ່ນວ່າ ເຮົາຈະບໍ່ສາມາດຊ່ວຍຕົວເອງໃຫ້ລອດກໍຕາມ, ເມື່ອເຮົາຍອມເຮັດຕາມພຣະປະສົງຂອງພຣະຜູ້ເປັນເຈົ້າ ແລະ ຮັກສາພັນທະສັນຍາຂອງເຮົາ, ທາງກໍຈະເປີດອອກສຳລັບການໄຖ່ຂອງເຮົາ.4 ເຊັ່ນດຽວກັບຂະບວນການອັນໂດດເດັ່ນຂອງດີເອັນເອຂອງຈຸລັງເລືອດຂອງອາໂຣນທີ່ປ່ຽນແປງ, ເຮົາກໍສາມາດເຮັດໃຫ້ໃຈຂອງເຮົາປ່ຽນໄດ້,5 ຮັບເງົາຂອງພຣະອົງໄວ້ໃນໃບໜ້າຂອງເຮົາ,6 ແລະ ກາຍມາເປັນຄົນໃໝ່ໃນພຣະຄຣິດ.7
ແອວມາໄດ້ຢໍ້າເຕືອນຜູ້ຄົນຂອງເຊຣາເຮັມລາ ກ່ຽວກັບຄົນລຸ້ນກ່ອນທີ່ໄດ້ປ່ຽນໃຈເຫລື້ອມໃສ. ໃນການກ່າວເຖິງພໍ່ຂອງເພິ່ນ, ແອວມາໄດ້ອະທິບາຍວ່າ “ຕາມສັດທາຂອງເພິ່ນ, ຈຶ່ງມີການປ່ຽນແປງອັນໃຫຍ່ຫລວງເກີດຂຶ້ນໃນໃຈຂອງເພິ່ນ.”8 ແລ້ວເພິ່ນກໍຖາມວ່າ, “ພວກທ່ານເຄີຍປະສົບການປ່ຽນແປງອັນຍິ່ງໃຫຍ່ນີ້ໃນໃຈຂອງພວກທ່ານແລ້ວບໍ?”9 ບໍ່ແມ່ນຄົນ ທີ່ປ່ຽນໃຈຂອງຕົນເອງ. ພຣະຜູ້ເປັນເຈົ້າໄດ້ກະທຳການປ່ຽນແປງທີ່ແທ້ຈິງ. ແອວມາຊັດເຈນຫລາຍກ່ຽວກັບເລື່ອງນີ້. ເພິ່ນໄດ້ກ່າວວ່າ, “ຈົ່ງເບິ່ງ, ພຣະອົງໄດ້ປ່ຽນໃຈຂອງເຂົາເຈົ້າ.”10 ເຂົາເຈົ້າ “ໄດ້ຖ່ອມຕົວ ແລະ ໄວ້ວາງໃຈໃນພຣະເຈົ້າອົງທ່ຽງແທ້ ແລະ ຊົງພຣະຊົນຢູ່ … [ແລະ] ຊື່ສັດຈົນເຖິງວັນຕາຍ … [ແລະ] ເຂົາເຈົ້າຈຶ່ງລອດ.”11 ຜູ້ຄົນໄດ້ເຕັມໃຈທີ່ຈະເປີດໃຈຂອງເຂົາເຈົ້າ ແລະ ໃຊ້ສັດທາ, ແລ້ວພຣະຜູ້ເປັນເຈົ້າກໍປ່ຽນໃຈຂອງເຂົາເຈົ້າ. ແລະ ມັນເປັນການປ່ຽນແປງອັນໃຫຍ່ຫລວງແທ້ໆ! ລອງນຶກເຖິງຄວາມແຕກຕ່າງໃນຊີວິດຂອງຊາຍສອງຄົນນີ້ ທີ່ຊື່ວ່າ ແອວມາ ກ່ອນ ແລະ ຫລັງຈາກທີ່ໃຈຂອງເພິ່ນປ່ຽນ.12
ເຮົາເປັນລູກຂອງພຣະເຈົ້າ ທີ່ມີຈຸດໝາຍປາຍທາງທີ່ສະຫງ່າຜ່າເຜີຍ. ເຮົາສາມາດປ່ຽນແປງເພື່ອຈະກາຍເປັນເໝືອນດັ່ງພຣະອົງ ແລະ ມີ “ຄວາມສົມບູນແຫ່ງຄວາມຊື່ນຊົມ.”13 ໃນທາງກົງກັນຂ້າມ, ຊາຕານຈະເຮັດໃຫ້ເຮົາເສົ້າສະຫລົດໃຈຄືກັນກັບທີ່ມັນເປັນ.14 ເຮົາສາມາດເລືອກໄດ້ວ່າ ເຮົາຈະຕິດຕາມໃຜ.15 ເມື່ອເຮົາຕິດຕາມຊາຕານ, ເຮົາກໍມອບອຳນາດໃຫ້ມັນ.16 ເມື່ອເຮົາຕິດຕາມພຣະເຈົ້າ, ພຣະອົງກໍມອບອຳນາດໃຫ້ເຮົາ.
ພຣະຜູ້ຊ່ວຍໃຫ້ລອດໄດ້ສິດສອນໄວ້ວ່າ ເຮົາ “ຕ້ອງດີພ້ອມ.”17 ສິ່ງນີ້ອາດເບິ່ງເປັນຕາຢ້ານ. ຂ້າພະເຈົ້າສາມາດເຫັນໄດ້ຢ່າງແຈ້ງຊັດເຖິງຄວາມບໍ່ພຽບພ້ອມ ແລະ ຮັບຮູ້ຢ່າງເຈັບປວດເຖິງໄລຍະຫ່າງລະຫວ່າງຂ້າພະເຈົ້າ ແລະ ຄວາມດີພ້ອມ. ເຮົາອາດມີແນວໂນ້ມທີ່ຈະຄິດວ່າ ເຮົາຕ້ອງເຮັດໃຫ້ຕົວເອງດີພ້ອມດ້ວຍຕົວຂອງເຮົາເອງ, ແຕ່ມັນເປັນໄປບໍ່ໄດ້. ການປະຕິບັດຕາມທຸກໆຄຳແນະນຳ ໃນໜັງສືທຸກໆເຫລັ້ມເພື່ອຊ່ວຍເຫລືອຕົວເອງໃນໂລກ ຈະບໍ່ເຮັດໃຫ້ມັນເກີດຂຶ້ນ. ມີພຽງແຕ່ທາງດຽວ ແລະ ຊື່ດຽວເທົ່ານັ້ນ ທີ່ຄວາມດີພ້ອມຈະມາເຖິງ. ເຮົາ “ຖືກເຮັດໃຫ້ດີພ້ອມທຸກຢ່າງຜ່ານພຣະເຢຊູຜູ້ເປັນກາງຂອງພັນທະສັນຍາໃໝ່, ຜູ້ໄດ້ເຮັດໃຫ້ເກີດການຊົດໃຊ້ທີ່ສົມບູນຜ່ານການຫລັ່ງໂລຫິດຂອງພຣະອົງເອງ.”18 ຄວາມດີພ້ອມຂອງເຮົາ ສາມາດເປັນໄປໄດ້ໂດຍຜ່ານທາງພຣະຄຸນຂອງພຣະເຈົ້າເທົ່ານັ້ນ.
ທ່ານສາມາດນຶກພາບອອກໄດ້ບໍ່ ວ່າມັນຈະເປັນແນວໃດສຳລັບຫລານຊາຍໜຸ່ມອາໂຣນຂອງພວກເຮົາ ຖ້າລາວຈະຕ້ອງສົມມຸດວ່າ ລາວຕ້ອງເຂົ້າໃຈ ແລະ ເຮັດຂັ້ນຕອນທາງການແພດທັງໝົດທີ່ກ່ຽວຂ້ອງກັບການປູກຖ່າຍຂອງລາວເອງ? ເຮົາບໍ່ຄວນສັນນິຖານເອົາເອງວ່າ ເຮົາຈຳເປັນຕ້ອງເຮັດໃນສິ່ງທີ່ພຽງແຕ່ພຣະຜູ້ຊ່ວຍໃຫ້ລອດເທົ່ານັ້ນສາມາດເຮັດໄດ້ ໃນຂະບວນການອັນໜ້າອັດສະຈັນຂອງຄວາມດີພ້ອມຂອງເຮົາ.
ໃນຂະນະທີ່ໂມໂຣໄນສະຫລຸບບັນທຶກຂອງເພິ່ນ, ເພິ່ນໄດ້ສິດສອນວ່າ: “ແທ້ຈິງແລ້ວ, ຈົ່ງມາຫາພຣະຄຣິດ, ແລະ ຖືກເຮັດໃຫ້ເປັນຄົນດີພ້ອມໃນພຣະອົງ, … ແລະ ຖ້າຫາກທ່ານປະຕິເສດຕົນຈາກຄວາມບໍ່ເປັນເໝືອນດັ່ງພຣະເຈົ້າທຸກຢ່າງ, ແລະ ຮັກພຣະເຈົ້າດ້ວຍສຸດພະລັງ, ຄວາມນຶກຄິດ, ແລະ ກຳລັງຂອງທ່ານ, ເມື່ອນັ້ນພຣະຄຸນຂອງພຣະອົງຈຶ່ງພຽງພໍສຳລັບທ່ານ, ເພື່ອໂດຍພຣະຄຸນຂອງພຣະອົງ, ທ່ານຈະດີພ້ອມໃນພຣະຄຣິດ.”19 ຊ່າງເປັນຄວາມຈິງທີ່ປອບໂຍນ ແລະ ມີພະລັງແທ້! ພຣະຄຸນຂອງພຣະອົງພຽງພໍສຳລັບຂ້າພະເຈົ້າ. ພຣະຄຸນຂອງພຣະອົງພຽງພໍສຳລັບທ່ານ. ພຣະຄຸນຂອງພຣະອົງພຽງພໍສຳລັບທຸກຄົນທີ່ “ເຮັດການໜັກໜ່ວງ ແລະ ແບກພາລະໜັກ.”20
ສຳລັບການປິ່ນປົວທາງແພດເໝືອນດັ່ງອາໂຣນ, ຍັງມີຄວາມບໍ່ແນ່ນອນໃນຜົນໄດ້ຮັບຢູ່ສະເໝີ. ແທ້ຈິງແລ້ວ, ອາໂຣນຕ້ອງໄດ້ຮັບການປູກຖ່າຍເທື່ອທີສອງ ເມື່ອເທື່ອທຳອິດມີພາວະແຊກຊ້ອນ. ໂຊກດີທີ່, ສຳລັບການປ່ຽນແປງຈິດໃຈທາງວິນຍານ, ເຮົາບໍ່ຈຳເປັນຕ້ອງສົງໄສວ່າ ມັນຈະເກີດຂຶ້ນຫລືບໍ່. ເມື່ອເຮົາດຳລົງຊີວິດຕາມພຣະປະສົງຂອງພຣະອົງ, “ໂດຍໄວ້ວາງໃຈຢ່າງເຕັມທີ່ໃນພຣະຄຸນຄວາມດີຂອງພຣະອົງ ຜູ້ຊົງອານຸພາບເພື່ອຊ່ວຍໃຫ້ລອດ,”21 ຈະມີການຮັບປະກັນ 100 ເປີເຊັນວ່າ ຈະໄດ້ຮັບການຊຳລະໃຫ້ສະອາດ ໂດຍໂລຫິດຂອງພຣະຜູ້ຊ່ວຍໃຫ້ລອດ ແລະ ຖືກເຮັດໃຫ້ດີພ້ອມໃນພຣະອົງໃນທີ່ສຸດ. ພຣະອົງເປັນ “ພຣະເຈົ້າແຫ່ງຄວາມຈິງ, ແລະ [ບໍ່ສາມາດ] ເວົ້າຕົວະ.”22
ບໍ່ຕ້ອງສົງໄສເລີຍວ່າ ຂະບວນການຂອງການປ່ຽນແປງນີ້ ຕ້ອງໃຊ້ເວລາ ແລະ ຈະບໍ່ສຳເລັດຈົນກວ່າຫລັງຈາກຊີວິດນີ້, ແຕ່ຄຳສັນຍານັ້ນ ແມ່ນແນ່ນອນ. ເມື່ອຄວາມສຳເລັດຂອງຄຳສັນຍາຂອງພຣະເຈົ້າ ເບິ່ງຄືວ່າຍັງຫ່າງໄກ, ເຮົາກໍຍັງນ້ອມຮັບເອົາຄຳສັນຍາເຫລົ່ານັ້ນ, ໂດຍຮູ້ວ່າ ມັນຈະສຳເລັດຕາມນັ້ນ.23
ການປ່ຽນແປງທີ່ໜ້າອັດສະຈັນໃນສຸຂະພາບຂອງອາໂຣນ ໄດ້ນຳຄວາມຊື່ນຊົມອັນຍິ່ງໃຫຍ່ມາສູ່ຄອບຄົວຂອງພວກເຮົາ. ລອງນຶກພາບເບິ່ງຄວາມຊື່ນຊົມອັນຍິ່ງໃຫຍ່ໃນສະຫວັນ ເມື່ອການປ່ຽນແປງອັນໃຫຍ່ຫລວງ ເກີດຂຶ້ນໃນຈິດວິນຍານຂອງເຮົາ.
ພຣະບິດາເທິງສະຫວັນຂອງເຮົາ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ຮັກເຮົາ ແລະ ໄດ້ສະເໜີດ້ວຍຄວາມກະລຸນາ ທີ່ຈະປ່ຽນເຮົາ ແລະ ເຮັດໃຫ້ເຮົາດີພ້ອມ. ພຣະອົງຢາກເຮັດສິ່ງນີ້. ມັນແມ່ນສູນກາງຂອງວຽກງານ ແລະ ລັດສະໝີພາບຂອງພວກພຣະອົງ.24 ຂ້າພະເຈົ້າເປັນພະຍານວ່າ ພຣະອົງມີອຳນາດທີ່ຈະເຮັດສິ່ງນີ້ ເມື່ອເຮົາມາຫາພຣະອົງດ້ວຍສັດທາ. ໃນພຣະນາມຂອງພຣະເຢຊູຄຣິດ, ອາແມນ.