Conferencia General
Añetegua ijapyra’ỹva
Octubre 2023-gua Conferencia General

Añetegua ijapyra’ỹva

Elder John C. Pingree Jr. rupive

Setenta-gua

Ñane remikotevẽ jahechakuaa hag̃ua pe añetegua imba’eguasuve ko’ág̃a araka’evégui!

Hermano ha hermana-kuéra, aguije pende devosiõre Tupã pe Túva ha Ita’ýra, Jesucristo-pe, ha aguije pene mborayhu ha servicio-re ojupekuéra. Penerechapyrã añete!

Ñepyrũmby

Che rembireko, Anne, ha che rorresivi rire peteĩ llamamiento roservi hag̃ua lider de misión de tiempo completo ramo, ore familia odesidi roikuaataha peteĩteĩ umi misionero réra rog̃uahẽ mboyve campo misional-pe. Rohupyty foto, rojapo tarhéta ha roñepyrũ roestudia tovakuéra ha romemorisa terakuéra.

Rog̃uahẽ vove, rojapo umi conferencia introductoria misionero-kuéra ndive. Roñemongeta aja, ahendu ore mitã orekóva nueve áño he’ívo:

“Che rory roikuaávo Sam!”

“Rachel, ¿moõguápa nde?”

“Oh, David, ndeyvate porã!”

Ñemondýipe, aha ore ra’y rendápe ha añe’ẽmbegue: “Héi, ñanemandu’áke ñañe’ẽ hag̃ua misionero-kuéra ndive élder térã hermana-ramo”.

Omaña porã cherehe ha he’i chéve: “Papá, che aimo’ã jaikuaava’erã herakuéra”. Ore ra’y ojapo opensáva oĩporãha ontendelaja ha’e.

Upéicharõ, ¿mba’éichapa ñantende pe añetegua yvóra ko’ag̃aguápe? Jajejapi meme opinión mbarete, informasiõ ijykepeguáva ha umi dato noĩmbáiva reheve. Upeichaite avei, umi informasiõ hetakue ha rrekúrso okakuaa pya’eterei hína. Ñane remikotevẽ jahechakuaa hag̃ua pe añetegua imba’eguasuve ko’ág̃a araka’evégui!

Pe añetegua ikláve ñamoĩ ha ñamombarete hag̃ua ñande joaju Tupã ndive, jajuhu hag̃ua py’aguapy ha vy’apavẽ, ha jahupyty hag̃ua ñane potensiál divíno. Ko árape ñakonsiderami ko’ã porandu:

  • ¿Mba’épa pe añetegua ha mba’ére imba’eguasuete?

  • ¿Mba’éichapa jajuhu pe añetegua?

  • Jajuhu vove ¿mba’éichapa ikatu ñakomparti?

Añetegua niko ijapyra’ỹ

Ñandejára ñanembo’e Escritura-kuérape: “Ha pe añetegua ha’e umi mba’e oikóva, oikova’ekue ha oútava rehegua kuaapy” (Doctrina ha Konveniokuéra 93:24). “Ndojeʼapói ni ndojejapóikuri ”(Doctrina ha Konveniokuéra 93:29) ha “ndaijapýrai” (Doctrina ha Konveniokuéra 88:66).1 Pe añetegua niko ijabsoluto, oñemovã’ỹva ha oñemoambue’ỹva. Ambue ñe’ẽme, pe añetegua ijapyra’ỹ.2

Pe añetegua ñanepytyvõ ani hag̃ua ñanembotavy,3 jahechakuaa hag̃ua iporãva ivaívagui,4 ñañemo’ã hag̃ua,5 ha jajuhu hag̃ua angapyhy ha ñemonguera.6 Añetegua ikatu avei ogia ñane mba’e’apo,7 ñanemosãso,8 ñanemomarangatu,9 ha ñandegueraha tekove opave’ỹvape.10

Tupã orrevela pe añetegua ijapyra’ỹva

Tupã orrevela pe añetegua ijapyra’ỹva peteĩ red rrevelasiõ joaju reheguáva rupi opartisipahápe Ha’e, Jesucristo, Espíritu Santo, profetakuéra ha ñande. Ñahesa’ỹijomi umi funsiõ iñambuéva ha katu ojoajúva orekóva káda partisipánte ko proceso-pe.

Peteĩha, Tupã ha’e upe opa añetegua ijapyra’ỹva ykua.11 Ha’e ha Ita’ýra Jesucristo,12 oñemopeteĩ pe añetegua ñentende porãmbáme ha omba’e’apo tapiaite umi principio añetete ha ley-kuérape he’iháicha.13 Ko pokatu oheja Chupekuéra ojapo ha oisãmbyhy hag̃ua mundokuéra14 ha avei ñande rayhu, ñande guia, ha ñanenutri porãmbaite hag̃ua peteĩteĩme.15 Ha’ekuéra oipota ñande ñantende ha jaiporu pe añetegua ikatu hag̃uáicha jaguerovy’a umi jehovasa Ha’ekuéra ojapoháicha.16 Ikatu ombo’e hikuái pe añetegua ha’ekueraite voi, térã jepive, mensaherokuéra rupive, ha’éva Espíritu Santo, anhelkuéra térã umi proféta oikovéva.

Mokõiha, pe Espíritu Santo otestifika opa añeteguágui.17 Ha’e orrevela umi añetegua ñandéve directoite ha otestifika añetegua ambuekuéra ombo’évagui. Jepive, umi Espíritu remiandu ou pensamiento-ramo ñane akãme ha temiandúramo ñane korasõme.18

Mbohapyha, profetakuéra ohupyty pe añetegua Tupãgui ha okomparti upe añetegua ñanendive.19 Ñañemoarandu pe añeteguápe umi proféta ymaguarégui Escritura-kuérape20 ha umi proféta oikovévagui conferencia general-pe ha umi canales oficiales rupive.

Ipahápe, peẽ ha che jareko peteĩ funsiõ kláve ko proceso-pe. Tupã oha’arõ jaheka, jahechakuaa, ha jajapo añeteguápe oĩháicha. Ñande katupyry jahupyty ha jaiporu hag̃ua pe añetegua odepende ñande joaju Túva ha Ta’ýra ndive mbaretekue, ñande katupyry ñambohovái hag̃ua Espíritu Santo influénsia, ha ñane alineasiõ umi proféta ára pahapegua ndive.

Ñanemandu’ava’erã Satana omba’apoha ñanemomombyry hag̃ua añeteguágui. Ha’e oikuaa pe añetegua’ỹre ndaikatuiha jahupyty tekove opave’ỹva. Ha’e oipyaha pe añetegua yvoragua filosofía reheve ñanemoapañuái ha ñaneresamboyke hag̃ua Tupã he’íva ñandévegui.21

Pe añetegua ijapyra’ỹva jeheka, jehechakuaa ha jeiporu

Jahekávo pe añetegua ijapyra’ỹva,22 ko’ã mokõi porandu ñanepytyvõkuaa jahechakuaa hag̃ua peteĩ concepto oúpa Tupãgui térã ambue fuente-gui:

  • Upe concepto-pa oñembo’e meme Escritura-kuérape ha umi proféta oikovéva rupi?

  • Espíritu Santo testimonio-pa okonfirma upe concepto?

Tupã orrevela umi añetegua doctrinal profetakuéra rupive, ha Espíritu Santo okonfirma ñandéve umi añetegua ha ñanepytyvõ jaiporu hag̃ua umíva.23 Jahekava’erã ha ñañembosako’i jarresivi hag̃ua ko’ã impresiõ espiritual ou vove.24 Ñaimeve receptivo Espíritu Santo testimonio-pe ñañemomirĩvo,25 ñañembo’e añete ha ja’estudia Tupã ñe’ẽnguéra,26 ha ñañongatu Imandamientokuéra.27

Pe Espíritu Santo okonfirma vove ñandéve peteĩete añetegua, ñaneñeikũmby ipypukuve ñamoĩramo en práctica upe principio. Ára ohasávo, jaiko memévo upe principio-pe he’iháicha, jahupyty peteĩ jeikuaa porã upe añeteguágui.28

Ehémploramo, ajavýkuri ha añandu angekói umi jeiporavo vai ajapova’ekuére. Ha katu ñembo’e, estudio ha jerovia rupi Jesucristo-re, ahupyty peteĩ testimonio arrepentimiento principio-gui.29 Añearrepenti memévo, che ñeikũmby arrepentimiento-gui okakuaave. Añemo’ag̃uive Tupã ha Ita’ýra Jesucristo-re. Ko’ág̃a aikuaa angaipa ikatuha oñeperdona Jesucristo rupive, che añandúgui ára ha ára umi arrepentimiento jehovasa.30

Jajeroviávo Tupãre pe añetegua ne’ĩramo gueteri ojerrevela

Upéicharõ, ¿mba’e jajapova’erã jaheka añetérõ peteĩ añetegua ndojerreveláiva gueteri? Añandu empatía umi ñande apytépe ñaha’arõ’asývare umi ñembohovái nog̃uahẽivaicha.

Ñandejára oakonseha José Smith-pe: “Eguerokirirĩ, iporã meve chéve aikuaauka opa mbaʼe … upéva rehegua” (Doctrina ha Konveniokuéra 10:37).

Ha Emma Smith-pe Ha’e omyesakã: “Ani rekaguai umi mbaʼe nderehechaivaʼekue rupi, oñeñongatúgui ndehegui ha múndogui, che arandúpe, peteĩ ára oútavape” (Doctrina ha Konveniokuéra 25:4).

Che avei ahekava’ekue umi mbohovái porandu añetépe. Heta mbohovái og̃uahẽ ha ambuéva katu nahániri.31 Jajejagarra hatãrõ—jajeroviávo Tupã arandu ha mborayhúre, ñaneñe’ẽrendúvo hembiapoukapykuérare, ha jajekóvo umi mba’e jaikuaávare—Ha’e ñanepytyvõta jajuhu hag̃ua py’aguapy Ha’e orrevela peve opa mba’e rehegua añetegua.32

Ñantendévo umi doctrina ha norma

Jahekávo pe añetegua, iporã ñantende mba’éicha iñambue umi doctrina norma-kuéragui. Doctrina ojerreferi umi añetegua ijapyra’ỹvare, ehémploramo pe Trinidad naturaleza, plan de salvación ha Jesucristo sacrificio expiatorio. Norma-kuéra katu ha’e pe doctrina jeiporu odependévo umi circunstancia ko’ag̃aguáre. Umi norma ñanepytyvõ oñeadministra hag̃ua Tupao hekopete.

Doctrina araka’eve noñemoambuéi, ha katu norma-kuéra oje’adapta sapy’a py’a. Ñandejára omba’apo Iprofetakuéra rupive okonfirma hag̃ua Idoctrina ha omoambue hag̃ua Tupaogua normakuéra Ita’yrakuéra oikotevẽháicha.

Ñembyasyrã, sapy’ánte ñakonfundi norma doctrina reheve. Nañantendéirõ iñambueha, ipeligróso ñañedesilusionávo umi norma oñemoambuévo, ha ikatu jepe ñañepyrũ ñandepy’amokõi Tupã arandu rehe térã profetakuéra funsiõ rrevelador.33

Ñambo’évo pe añetegua ijapyra’ỹva

Jahupytývo pe añetegua Tupãgui, Ha’e ñanemokyre’ỹ ñakomparti hag̃ua upe jeikuaa ambuekuérandi.34 Jajapo upéva ñambo’évo peteĩ clase, jagiávo peteĩ mitãme, térã ñañemongetávo umi evanhélio añeteguáre peteĩ angirũ ndive.

Ñane meta niko ñambo’e pe añetegua oñeinvitaháicha Espíritu Santo pu’aka oporokonvertíva.35 Pehejami takomparti penendive umi Ñandejára ha Iprofetakuéra invitasiõ isensíllova oipytyvõkuaáva.36

  1. Ñañesentra Túva Yvagagua, Jesucristo ha Idocrina fundamental-pe.37

  2. Pepyta ñemova’ỹme escritura-kuéra ha ára pahapegua profetakuéra ñehekombo’épe.38

  3. Pejerovia doctrina-re oñemoĩva heta testigo autorisádo rupive.39

  4. Peñemboyke umi especulación, opinión personal térã yvoragua ideakuéragui.40

  5. Pembo’e peteĩ doctrina punto umi añetegua mbytépe ha’éva evanhélio rehegua.41

  6. Peiporu tekombo’e laja oinvitáva Espíritu influénsia.42

  7. Peñe’ẽ resakãporã ojupe ani hag̃ua oĩ ñentende’ỹ.43

Ñañe’ẽvo añeteguágui mborayhúpe

Ñambo’e laja pe añetegua imba’eguasu. Pablo ñanemokyre’ỹ ñañe’ẽ hag̃ua “pe añetegua mborayhúpe” (tojehecha Efesios 4:14–15). Pe añetegua ohovasakuaave ambuekuérape oñembohasávo mborayhu reheve ojoguáva Cristo mborayhúpe.44

Pe añetegua oñembo’éva mborayhu’ỹre ikatu ojapo ñañeñandu husgádo, kangy térã ñaneañoha. Py’ỹi ogueraha py’aro ha ñemboja’ópe, jepe ñorairõme. Ambuéicha, mborayhu añetegua’ỹre inandi ha ndorekói jekakuaa promesa.

Mokõive, añetegua ha mborayhu imba’eguasueterei ñande jekakuaa espiritual-pe g̃uarã.45 Pe anetegua ome’ẽ umi doctrina, principio ha ley oñeikotevẽva jahupyty hag̃ua pe tekove opave’ỹva, ha katu mborayhu omoheñói pe ñemokyre’ỹ oñeikotevẽva ja’asepta ha ñamba’e’apo hag̃ua pe añeteguáva he’iháicha.

Cheaguyje tapiaite g̃uarã umi tapicháre pasiénsia reheve chembo’eva’ekue pe añetegua ijapyra’ỹva mborayhu reheve.

Ñembopaha

Ambopaha hag̃ua, pehejami takomparti umi añetegua ijapyra’ỹva oikova’ekuégui peteĩ ánkla che ángape g̃uarã. Aikuaáva ko’ã añetegua asegívo umi principio ñañe’ẽvagui ko árape.

Che aikuaa Tupã ha’e ñande Ru Yvagagua.46 Ha’e niko oikuaapáva,47 ipu’akapáva,48 ha oporohayhupa porãva.49 Ha’e omoheñói peteĩ plan jahupytykuaa hag̃ua pe tekove opave’ỹva ha oiko ñandehegui Ha’eichaguáva.50

Upe plan pehẽramo, Ha’e ombou Ita’ýra, Jesucristo-pe, ñanepytyvõ hag̃ua.51 Jesús ñanembo’e jajapo hag̃ua pe Túva rembipota52 ha jajoayhu hag̃ua ojupe.53 Ha’e oexpia ñane angaipakuérare54 ha ome’ẽ Hekove kurusúre.55 Mbohapy ára rire, opu’ã omanóva apytépegui.56 Igrásia rupive, jaijovejeýta,57 ikatu ñañeperdona,58 ha ikatu jajuhu mbarete jeiko’asýpe.59

Iministerio aja ko yvy ári, Jesús omoĩ Itupao.60 Ára ohasávo, pe Tupao oñemoambue ha umi añetegua okañy.61 Jesucristo orrestaura Itupao ha umi evanhélio añetegua Proféta José Smith rupive.62 Ha ko árape, Cristo oisãmbyhy meme gueteri Itupao umi proféta ha apóstol oikovéva rupive.63

Che aikuaa jajuháicha Cristo-pe, ára ohasávo ikatuha “ñanerekoporãmbaite ipype” (Moroni 10:32), jahupyty “peteĩ vyʼapavẽ paha” (Doctrina ha Konveniokuéra 93:33), ha jahupyty “opa mbaʼe [pe] Túva orekóva” (Doctrina ha Konveniokuéra 84:38). Ko’ã añetegua ijapyra’ỹvagui, che ame’ẽ testimónio Jesucristo réra marangatúpe. Amén

Notakuéra

  1. Tojehecha avei Salmos 117:2; Doctrina ha Konveniokuéra 1:39.

  2. “Oĩrõ jepe odudáva, añetehápe oĩ peteĩ mba’e upe oĩporã ha oĩvaiva. Añetehápe oĩ pe añeteguaite—pe añetegua opave’ỹva. Peteĩ plága ñande árapegua ha’e sa’i tekove oikuaaha moõpa ohekakuaa upe añetegua” (Russell M. Nelson, “Añetegua potĩ, Doctrina potĩ ha rrevelasiõ ipotĩva,” Liahona, Nov. 2021, 6).

  3. Tojehecha José Smith—Mateo 1:37.

  4. Tojehecha Moroni 7:19.

  5. Tojehecha 2 Nefi 1:9; Doctrina ha Konveniokuéra 17:8.

  6. Tojehecha Jacob 2:8.

  7. Tojehecha Salmos 119:105; 2 Nefi 32:3.

  8. Tojehecha Juan :32; Doctrina ha Koveniokuéra 98:8.

  9. Tojehecha Juan 17:17.

  10. Tojehecha 2 Nefi 31:20.

  11. Tojehecha Doctrina ha koveniokuéra 88:11–13; 93:36.

  12. Tojehecha Juan 5:19–20; 7:16; 8:26; 18:37; Moisés 1:6.

  13. Tojehecha Alma 42:12–26; Doctrina ha Konveniokuéra 88:41.

  14. Tojehecha Moisés 1:30–39.

  15. Tojehecha 2 Nefi 26:24.

  16. Tojehecha Doctrina ha Koveniokuéra 82:8–9.

  17. Tojehecha Juan 16:13; Jacob 4:13Moroni 10:5; Doctrina ha Konveniokuéra 50:14; 75:10; 76:12; 91:4; 124:97.

  18. Tojehecha Doctrina ha Konveniokuéra 6:22–23; 8:2–3.

  19. Tojehecha Jeremias 1:5, 7; Amós 3:7; Mateo 28:16–20; Moroni 7:31; Doctrina ha Konveniokuéra 1:38; 21:1–6; 43:1–7. Peteĩ proféta ha’e “peteĩ tapicha oñehenóiva Tupãre oñe’ẽ hag̃ua hérape. Tupã mensahéroramo, peteĩ proféta orresivi mandamiento, profesía ha rrevelasiõ Tupãgui. Irresponsabilida niko oikuaauka Tupã rembipota ha inaturalésa añetéva opa yvyporakuérape ha ohechauka mba’épa he’ise Itrato hendivekuéra. Peteĩ proféta odenunsía angaipa ha opredesi upéva oguerúva. Ha’e niko tekojoja mbo’ehára. Sapy’ánte, profetakuéra ikatu oñeispira opredesi hag̃ua ára oútava rehegua yvypóra ñeimeporãrã. Upevére, irresponsabilida peteĩha ha’e ome’ẽ testimonio Cristo-gui. Jesucristo Tupao Santokuéra Ára Pahapegua Presidente ha’e pe Tupã proféta ko yvy ári ko árape. Primera Presidencia miembro-kuéra ha umi Doce Apóstoles-pe oñesostene proféta, vidente ha rrevelador ramo” (Guía para el estudio de las Escrituras, “Profeta,” Biblioteca del Evangelio). Koʼã principio ehémplo jajuhukuaa Adán rekovépe (tojehecha Moisés 6:51–62, Enoc (tojehecha Moisés 6:26–36), Noé (Tojehecha Moisés 8:19, 23–24, Abraham (tojehecha Génesis 12:1–3; Abraham 2:8–9), Moisés (tojehecha Exodo 3:1–15; Moisés 1:1–6, 25–26), Pedro (tojehecha Mateo 16:13–19, ha José Smith (tojehecha Doctrina ha Konveniokuéra 5:6–10; 20:2; 21:4–6).

  20. Tojehecha 2 Timoteo 3:16.

  21. Tojehecha Juan 8:44; 2 Nefi 2:18; Doctrina ha Konveniokuéra 93:39; Moisés 4:4.

  22. Tojehecha 1 Nefi 10:19. Presidente Dallin H. Oaks ombo’e: “Tekotevẽ ñaneprudente jahekávo umi [Tupã] añetegua ha jaiporavo hag̃ua umi fuente jaheka hag̃ua. Ndaha’éi ñakonsideranteva’erã prestigio térã autorida secular añetegua fidedigna fuente-kuéra ramo. … Jahekávo añetegua religión rehegua, jaipuruva’erã método-kuéra espiritual iporãva umi jehekava’erãme: ñembo’e, Espíritu Santo testimonio, ha Escritura-kuéra jestudia ha profeta-kuéra ko’ag̃agua ñe’ẽ” (“Upe añetegua ha pe plan,” Liahona, Nov. 2018, 25).

  23. Elder D. Todd Christofferson ombo’e: “Apóstol ha profetakuéra omomarandu Tupã ñe’ẽ, ha katu avei jaguerovia umi kuimba’e ha kuña en general, jepe umi mitãnguéra oñemoarandukuaa inspirasiõ divína rupive ha ojeguía upévare ñembohováiramo iñembo’ekuéra ha escritura estudio-pe. … Jesucristo Tupaogua miembro-kuérape oñekonferi Espíritu Santo don, ombohasy’ỹva ñe’ẽ meme ñande Ru Yvagagua ndive. … Kóva nde’iséi opavave miembro oñe’ẽha Tupao rérape ha ikatuha odefini idoctrina, ha katu he’ise káda uno orresivikuaa gía divína ombohovake hag̃ua umi desafio ha oportunidad hekovépe.(“La doctrina de Cristo,” Liahona, Mayo 2012, 89–90, nota 2).

  24. Tojehecha 2 Nefi 33:1–2.

  25. Tojehecha Doctrina ha Konveniokuéra 1:28.

  26. Tojehecha Moroni 10:3–5; Doctrina ha Konveniokuéra 9:7–9; 84:85.

  27. Tojehecha Doctrina ha Konveniokuéra 5:35; 63:23; 93:27–28. Ñañeha’ã añetérõ jepe ikatu oĩ ñande apytépe hasývape ñañandu pe Espíritu akãmegua tesãi’ỹ rupi. Depresión, ansiedad ha ambue mba’asy neurológico ikatu ombohasy jahechakuaa Espíritu Santo-pe. Umi kásope, Ñandejára ñaneinvita jasegi hag̃ua javivívo pe evanhélio ha Ha’e ñanderovasáta (tojehecha Mosiah 2:41). Jahekakuaa ambue activida, ehémploramo, ñahendu música sagrádo, jaservi térã jahasa tiempo naturalésape, ikatúva ñanepytyvõ ñañandu hag̃ua umi Espíritu yva (Tojehecha Gálatas 5:22–23) ha omombarete ñande joaju Tupã ndive.

    El élder Jeffrey R. Holland he’i kóicha: “Upéicharõ, ¿mba’éichapa iporãve pe’actua peẽ térã umi pehayhúva ombohovakérõ umi mba’asy mental térã emocional? Opa mba’e ári, ani peperde pende jerovia Túva Yvagaguáre, penderayhúva pentendekuaa mboypýry. … Jeroviapýpe pesegi umi práctica devosiõ rehegua oinvitáva Ñandejára Espíritu-pe pende rekovépe. Peheka konsého umi orekóvagui umi llave pene ñeimeporãrã espiritual. Pejerure ha peñongatu umi sacerdocio jerovasa. Pepartisipa Santa Cena-gui káda semana ha pejejagarra hatã umi promesa de perfección oĩva Jesucristo Expiasiõme. Peguerovia milagro-re. Che ahecha heta umíva oikórõ ndaiporírõvaicha esperanza. Esperanza araka’eve nomanói” (“Como una vasija quebrada,” Liahona, Nov. 2013, 40–41).

  28. Tojehecha Juan 7:17; Alma 32:26–34. Ipahápe, Tupã oipota jahupyty pe añetegua “línea por línea, precepto por precepto”, jaikuaapa peve opa mba’e (tojehecha Proverbios 28:5; 2 Nefi 28:30; Doctrina ha Konveniokuéra 88:67; 93:28).

  29. Tojehecha 1 Juan 1:9–10; 2:1–2.

  30. Presidente Russell M. Nelson ñanembo’e: “Ndaipóri mba’e ñanemosasõvéva, ñanemopu’ãvéva, ha mba’eguasuvéva ñande progreso individual vokói ñañatendévo, ára ha ára ñande arrepentimiénto reheve. Arrepentimiento ndaha’éi peteĩ mba’e oikóva sapy’aite, ha’e peteĩ mba’e oiko meméva. Péva ha’e kláve jaguereko hag̃ua vy’apavẽ ha py’aguapy mental. Oñemoirũramo jerovia reheve, pe arrepentimiento ombohape pe tape ojehupyty hag̃ua Jesucristo Expiasiõ pokatu” (“Podemos actuar mejor y ser mejores,” Liahona, Mayo 2019, 67).

  31. Ndaikuaái mba’érepa Tupã ndorrevelapái ñandéve umi añetegua ijapyra’ỹva, ha katu Elder Orson F. Whitney ojapo peteĩ reflexión iñinteresánteva: “Bienaventurado pe ojeroviáva ohecha’ỹre, pe jekakuaa espiritual oúgui jerovia jeiporúgui, ha’éva peteĩ propósito tuichavéva ko ñande rekove yvy ári; ambuépe katu pe jeikuaa oanulávo pe jerovia ha ndohejái ojeiporu ha upévare oje’atrofia ijekakuaa. ‘Jeikuaa ha’e pu’aka;’ ha opa mba’e ojeikuaáta hi’araitépe. Ha katu jeikuaa—hi’ára mboyve ojeikuaávo—peteĩ momento avývape, ifatal, pe jekakuaa ha jevy’ápe g̃uarã” (“La divinidad de Jesucristo,” Improvement Era, Ene. 1926, 222; tojehecha avei Liahona, Dic. 2003, 14–15).

  32. Tojehecha Doctrina ha Konveniokuéra 76:5–10. Ñandejára avei oakonseha Hyrum Smith-pe: “Ani reñehaʼã remombeʼu che ñeʼẽ, eñehaʼã uvei rehupyty raẽ hag̃ua che ñeʼẽ. … Ha katu koʼág̃a eñemokirirĩ [ha] eñemoarandu che ñeʼẽme,” (Doctrina ha Konveniokuéra 11:21–22). Proféta Alma ome’ẽ peteĩ ehémplo mba’éichapa ñañe’ẽkuaa umi porandu imbohovai’ỹva: “Koʼág̃a neʼĩra gueteri ojehechaukapa chéve koʼã mbaʼeñemimby; upévare ajejokóta” (Alma 37:11). Avei omohesakã ita’ýra Coriantón-pe “oĩ heta mbaʼeñemimby oñeñomíva, avave ndoikuaáiva ndahaʼéirõ Tupã añónte” (Alma 40:3). Upéicha avei añemombarete Nefi ñembohováipe ojeguerurõguare chupe peteĩ porandu nombohovaikuaáiva: “Che aikuaa haʼe ohayhuha itaʼyrakuérape; upevére, ndaikuaapái mbaʼépa heʼise opa mbaʼe” (1 Nefi 11:17).

  33. Upéicha avei, umi tradisiõ cultural ndaha’éi doctrina térã norma-kuéra. Ikatu ojeiporukuaa ñanepytyvõrõ ñaneñe’ẽrendu hag̃ua umi doctrina ha norma rehe, ha katu ojokokuaa avei ñande jekakuaa espiritual ndojevasáirõ umi principio añetéva ári. Jajehekýiva’erã umi tradisiõ nomopu’ãiva ñande jerovia Jesucristo-re ni nañanepytyvõiva jakakuaa hag̃ua tekove opave’ỹva gotyo.

  34. Tojehecha Doctrina ha Koveniokuéra 15:5; 88:77–78

  35. Tojehecha Doctrina ha Koveniokuéra 50:21–23.

  36. Oje’adapta pe documento “Principios para asegurar la pureza doctrinal”-gui, oñemoneĩva Primera Presidencia ha Cuórum de los Doce Apóstoles rupi febrero 2023-pe.

  37. Tojehecha 1 Nefi 15:14. Ñandejára omanda Hembiguaikuérape ani oñesentra umi dogma, térã concepto rehe naimba’eguasúiva Iñevanhéliope: “Ha doctrina pypukúre nereñeʼẽmoʼãi, ha katu reñeʼẽta arrepentimiento ha jerovia Salvador rehe, ha angaipa jejora ñemongarai rupive, ha tata rupive, héẽ, jepe Espíritu Santo rupive rehe.” (Doctrina ha Konveniokuéra 19:31).

    Elder Neil L. Andersen omohesakã: “Ñanesentra ñande Salvador Jesucristo-pe ha Isacrificio Expiatorio don-pe. Nde’iséi ndaikatuiha ñamombe’u umi experiencia personal térã ñakomparti ambuekuéra he’iva’ekue. Jepémo pe téma ikatu ha’e familia, servicio, templo térã peteĩ misiõ ramoitéva opa mba’e … ohechaukava’erã Ñandejára Jesucristo gotyo“ (“Hablamos de Cristo,” Liahona, Nov. 2020, 89–90).

  38. Tojehecha Doctrina ha Konveniokuéra 28:2–3, 8. Proféta Alma ombo’e umi oñehenoiva’ekuépe ombo’e hag̃ua pe evanhélio “ani hag̃ua omboʼe mbaʼeve ndahaʼéiramo umi mbaʼe haʼe omboʼevaʼekue, ha ojeʼevaʼekue profetakuéra marangatu juru rupive” (Mosíah 18:19).

    Presidente Henry B. Eyring he’i, “Ñambo’eva’erã umi Tupaogua doctrina fundamental oĩva umi libros canónicos ha profetakuéra tekombo’épe orekóva responsabilidad omomarandúvo pe doctrina” (“El Señor multiplicará la cosecha” [una velada con una Autoridad General, Feb. 6, 1998], in Teaching Seminary: Preservice Readings [2004], 96).

    El élder D. Todd Christofferson otestifika “Tupaópe ko árape ymaguarepeicha, toñemoĩ Cristo doctrina térã ojekorrehi umi joavy doctrina reheguáva ha’e peteĩ rrevelasiõ divíno umi Ñandejára oinvestívape autorida apostólica reheve” (“La doctrina de Cristo,” 86).

  39. Tojehecha 2 Corintios 13:1; 2 Nefi 11:3; Eter 5:4; Doctrina ha Konveniokuéra 6:28. Elder Neil L. Andersen he’i: “Oĩ tapicha omoĩva en duda ijerovia ojuhúrõ peteĩ momarandu ojapova’ekue peteĩ Tupaogua líder ojapóma década ha ojoguávaicha ojoavyha ñande doctrina reheve. Oĩ peteĩ principio imba’eguasuetéva oisãmbyhýva Tupaogua doctrina. Opavave umi 15 miembro Primera Presidencia ha Cuórum de los Doce pegua ombo’e pe doctrina. Nokañýri peteĩ discurso párrafo iñypytũvape. Umi principio añetéva py’ỹi oñembo’e heta rupive. Ñane doctrina ndahasýi jajuhu hag̃ua” (“La prueba de vuestra fe,” Liahona, Nov. 2012, 41).

    Elder D. Todd Christofferson ombo’e: “Oñemandu’ava’erã opa declaración ojapóva peteĩ Tupaogua líder, ohasáva térã ko’ag̃agua, ha’eha katuete doctrina. Oñentende jepi Tupaópe declaración ojejapóva peteĩ líder rupi sapy’ánte, py’ỹi orrepresentaha peteĩ opinión personal, oñepensa porãramo jepe, nde’iséi ijoficialha térã oñevinkulaha opa Tupaópe” (“Pe Cristo Doctrina,” 88).

  40. Tojehecha 3 Nefi 11:32, 40. Presidente Gordon B. Hinckley he’i: “Añe’ẽmava’ekue importancia orekóvare ñañongatu potĩ umi Tupaogua doctrina. … Ajepy’apy upévare. Jepe michĩmi joavyvai umi doctrina ñehekombo’épe oguerahakuaa tuicha ha ivaiva mbotavýpe” (Enseñanzas de Gordon B. Hinckley [1997], 620).

    Presidente Dallin H. Oaks omomarandu oĩha tapicha “oiporavóva pokã ñe’ẽjoaju algún proféta tekombo’égui ha oiporu umíva ombojepytaso hag̃ua umi ipropósito político térã personal. … Oñemboavy peteĩ proféta ñe’ẽnguéra ombojepytaso hag̃ua umi propósito personal, taha’e político, económico térã ambueichaguáva ha’e peteĩ ñeha’ã oñemanipula hag̃ua pe profétape ndaha’éi ojesegi chupe” (“Our Strengths Can Become Our Downfall” [Brigham Young University fireside, June 7, 1992], 7, speeches.byu.edu).

    Presidente Henry B. Eyring omomarandu: “Pe doctrina ohupyty pu’aka Espíritu Santo okonfirma vove añeteguaha. … Ñaikotevẽgui Espíritu Santo-re, ñañeñangarekova’erã ha ani ñambo’e ndaha’éiva doctrina añetéva. Espíritu Santo ha’e pe añetegua Espíritu. Ha’e okonfirmáta umi ñambo’éva ja’evitárõ espekulasiõ térã jajapo interpretación personal. Upéva ikatu hasy jajapo hag̃ua. … Ñanetenta ñaha’ã umi mba’e pyahu térã isensacionálva. Ha katu ñainvita Espíritu Santo-pe ñanemoirũ hag̃ua jajesarekóvo ñambo’e hag̃ua doctrina añetéva añónte. Peteĩ iseguroveháicha ani hag̃ua ñañemboja umi doctrina añetegua’ỹvare ha’e ñambo’e sencillez reheve. Simplisida reheve oñepyrũ hína yvy isegúrova ha nokañýi mba’eve iñimportánteva” (“El poder del enseñar la doctrina,” Liahona, Julio 1999, 86).

    Elder Dale G. Renlund ombo’e: “Jaheka tuichave ñeikũmby imba’eguasu ñande kakuaa espiritual-pe, ha katu pejasarekomíke. Akãngeta ndaikatúi omyengovia rrevelasiõ. Pe espekulasiõ ndoguerahamo’ãi hetave jeikuaa espiritual-pe; uvei ikatu ñandegueraha mbotavýpe térã omboyke ñane atención umi ojerrevelava’ekuégui” (“Su naturaleza divina y destino eterno,” Liahona, Mayo 2022, 70).

  41. TojehechaMateo 23:23. Presidente Joseph F. Smith omomarandu: ”Iñimprudenteiterei jajagarra peteĩ pe añetegua pehẽngue ha jatrata ha’erõguáicha opa pe añetegua. … Opa umi Jesucristo evanhélio rrevelado principio-kuéra oñeikotevẽ ha iñesensiál plan de salvación-pe.” Avei, omohesakã: “Ndaha’éi práctica porã ni hesãiva jajagarra oimeraẽva ko’ãvagui, oñeguenohẽ pe evanhelio añetegua plan completo-gui, ñakonverti upéva peteĩ hobby-pe ha javasa hi’ári ñane salvasiõ ha jekakuaa. … Opa omíva oñeikotevẽ” (Gospel Doctrine, 5th ed. [1939], 122).

    Elder Neal A. Maxwell omyesakã: “Umi evanhéliogua principio … oikotevẽ sinkronisasiõ. Ojeírõ ojuehegui térã oñemoha’eño, pe interpretación ha implementación yvyporakuéra ojapóva ko’ã doctrina-gui ikatu vyrorei. Mborayhu, noñembojeréirõ pe séptimo mandamiento rehe, ikatu oiko chugui carnal. Pe quinto mandamiento oñeonrra hag̃ua tuvakuérape, noñembojeréirõ pe mandamiento peteĩháre, ikatu oporogueraha lealtad incondicional tuvakuéra descarriado-pe ogueraha rangue lealtad Tupãme. … Pasiénsia jepe oñembojojava’erã ‘ojeja’o hatãvo Espíritu Santo he’i vove’ [Doctrina ha Konveniokuéra 121:43]” (“He aquí, el enemigo se ha combinado,” Ensign, Mayo 1993, 78–79).

    Presidente Marion G. Romney ombo’e: “Ñehesa’ỹijo [umi escritura] jaikuaa hag̃ua mba’épa ombo’e, omanda haguéicha Jesús, iñambue jahekágui ipype umi pasaje ikatúva jaiporu ñambojepytaso hag̃ua peteĩ conclusión determinada.” (“Records of Great WorthEnsignSept. 1980, 3).

  42. Tojehecha 1 Corintios 2:4; Moroni 6:9. Elder Jeffrey R. Holland heʼi jeyjey tekotevẽha ñakomunika pe evanhélio oporogueraha hag̃uáicha ñemopuʼã espiritual-pe Espíritu Santo puʼaka rupi: “Ñandejára arakaʼeve nome’ẽiva’ekue Tupaópe peteĩ konsého mbaretevéva ñambo’eva’erãha pe evanhélio ʼEspíritu rupive, heẽ pe Moangapyhyhara oñembouva’ekue ombo’e hag̃ua pe añetegua.’ Ñamboʼépa pe evangelio añetegua ‘Espíritu rupive?’ Ha’e oporandúva. Térã ñamboʼe ‘ambue hendáicha? Ha ambue hendáicharõ’, Oadverti ha’e ‘ndahaʼéi Tupãguigua’ [Doctrina ha Konveniokuéra 50:14, 17–18]. … Ndaikatúi oiko ñemoarandu eterno yvága Espíritu vivifikasiõ’ỹre. … Upéva niko ñane miembro-kuéra oipota añetéva. … Oipota ijerovia toñemombarete ha iñesperansa toñembopyahu. Añete, okaruse hikuái Tupã ñe’ẽgui, oñemombarete hag̃ua yvagagua pokatukuéra rupi” (“A Teacher Come from God,” Ensign, Mayo 1998, 26).

  43. Tojehecha Alma 15:23. Oñe’ẽvo ñande Ru Yvagaguáre, Presidente Russell M. Nelson otestifika: “Ha’e oñekomunika peteĩ manéra simple, kirirĩ ha hesakãporãvape ndaikatúiva voi ñantende vai” (“Ehendu Chupe,” Liahona, Mayo 2020, 89).

  44. Tojehecha Salmos 26:3; Romanos 13:10; 1 Corintios 13:1–8; 1 Juan 3:18.

  45. Tojehecha Salmos 40:11.

  46. Tojehecha Romanos 8:16.

  47. Tojehecha 1 Samuel 2:3; Mateo 6:8; 2 Nefi 2:24; 9:20.

  48. Tojehecha Génesis 17:1; Jeremías 32:17; 1 Nefi 7:12; Alma 26:35.

  49. Tojehecha Jeremías 31:3; 1 Juan 4:7–10; Alma 26:37.

  50. Tojehecha 2 Nefi 9; Doctrina ha Konveniokuéra 20:17–31; Moisés 6:52–62.

  51. Tojehecha Juan 3:16; 1 Juan 4:9–10.

  52. Tojehecha Juan 8:29; 3 Nefi 27:13.

  53. Tojehecha Juan 15:12; 1 Juan 3:11.

  54. Tojehecha Lucas 22:39–46.

  55. Tojehecha Juan 19:16–30.

  56. Tojehecha Juan 20:1–18.

  57. Tojehecha 1 Corintios 15:20–22; Mosiah 15:20–24; 16:7–9; Doctrina ha Konveniokuéra 76:16–17.

  58. Tojehecha Hechos 11:17–18; 1 Timoteo 1:14–16; Alma 34:8–10; Moroni 6:2–3, 8; Doctrina ha Konveniokuéra 19:13–19.

  59. Tojehecha Mateo 11:28–30; 2 Corintios 12:7–10; Filipenses 4:13; Alma 26:11–13.

  60. Tojehecha Mateo 16:18–19; Efesios 2:20.

  61. Tojehecha Mateo 24:24; Hechos 20:28–30.

  62. Tojehecha Doctrina ha konveniokuéra 20:1–4; 21:1–7; 27:12; 110; 135:3; José Smith—Historia 1:1–20.

  63. Tojehecha Doctrina ha konveniokuéra 1:14, 38; 43:1–7; 107:91–92.

Toñeimprimi