O Le Faavae Ofoofogia o lo tatou Faatuatuaga

Peresitene Gordon B. Hinckley

Ia faafetaia le Atua mo le ofoofogia o Lona faaee maia o le molimau, o le pule, ma aoaoga faavae e o faatasi ma lenei talalelei toefuataiina a Iesu Keriso.

Ou uso e ma tuafafine, ua ou talosagaina le uunaiga a le Alii ou te lauga atu ai ia te outou. E le mafai ona alu ese ma au le tiutetauave tele naua o le lauga atu i le Au Paia o Aso e Gata Ai. Ou te faafetai lava i lo outou agalelei ma lo outou lavapapale mai. Ou te tatalo e le aunoa ina ia ou agavaa mo le tulaga talitonuina o au e tagata.

Faatoa ou taliu mai talu ai nei i se malaga umi tele. Sa matua lagona le vaivai, peitai o se tulaga ofoofogia le mafuta atu i le Au Paia. Pe ana fai e mafai, semanu ua ou tuu atu i isi latou te tauaveina mataupu faalepulega o le Ekalesia o aso taitasi, ae ou faaaluina lo’u taimi e mafuta atu ai i o tatou tagata, ma asiasi atu i paranesi laiti faapea foi siteki tetele. Ou te fia manao e faapotopoto ma le Au Paia i soo se mea lava o i ai. Ou te lagona ua tofu tatau i tagata taitoatasi o le Ekalesia ona asiasi atu i ai. Ou te faanoanoa ona o le le lava o le malosi o le tino, ua le toe mafai ai ona faatalofa atu i tagata uma. Ae e mafai ona ou vaavaai atu i o latou mata, ma le fiafia o lo’u loto ma faailoa atu i ai lo’u alofa ma avatu i ai se faamanuiaga.

O le mafuaaga o le malaga na se’i mavae atu nei o le toe faapaiaina lea o le Malumalu o Freiberg i Siamani, ma le faapaiaga O Le Malumalu o Hague i Netalani. Sa ou maua le avanoa e faapaia ai le malumalu o Freiberg i le 17 tausaga talu ai. O se fale e le tele ma e faigofie lava, sa fausia i lena taimi o le Malo Temokarasi o Siamani, i le sone i sasae o Siamani a o vaeluaina. O se vavega moni lava lona fausaga. Sa toina atu ia Peresitene Monson, o Hans Ringger ma isi le lagolagosua a taitai o le malo o Siamani i Sisifo, o e sa finagalo malilie i ai.

Sa ofoofogia ai le tautua a lea malumalu i nei tausaga uma. O lea ua leai nei se papupuni sa aave ona tala. Ua faigofie nei i o tatou tagata ona malaga atu i Freiberg. Sa faaleagaina le fale ina ua mavae nei tausaga ma sa le toe talafeagai ai.

Sa toe faatele le malumalu ma saga faamatagofieina atili ma faaaoga ai. E tasi le sauniga o le faapaiaga sa matou faia. Sa malaga mai le au paia mai le anoano o vaega eseese. O totonu o le potu tele sa matou nonofo ai, sa matou vaaia ai mata o le toatele o le Au Paia o Aso e Gata Ai malolosi, mausali, ma le ofoofogia, o e sa feagai i taimi lelei ma taimi foi o le pogisa, ma pulega matautia a le malo, a ua maua nei le saolotoga atoatoa, sa latou tausisia lo latou faatuatua, ma auauna atu i le Alii, ma o ni faataitaiga ofoofogia o le talalelei. Ou te faamalie atu ona sa le mafai ona ou opo maia nei uso ma tuafafine totoa, ma ta’u atu i ai lo’u alofa tele ia i latou. Afai o latou faafofoga mai ia te au i le aso, ou te faamoemoe o le a latou silafia lena alofa, ma faamagalo mai au i lo’u tuua faanatinati o i latou.

Na matou felelei mai iina i Falani e taulima ai foi se mataupu faale-Ekalesia. Ona matou felelei atu ai lea i Rotterdam ma tietie atu ai i Le Hague. E matua mamafatu tele se faatulagaina o se galuega i ni atunuu se tolu, mo se toeaina.

O le aso na sosoo ai na matou faapaiaina ai le Malumalu O Le Hague Netalani. E fa sauniga sa faia ai. E maeu lava foi le matagofie ma le faamomoiloto o le tulaga sa oo i ai.

O se fausaga matagofie le malumalu i se vaega lelei. Ou te faafetai lava ona o le fale o le Alii o le a tautuaina ai le Au Paia o Netalani, Peleseuma, ma se vaega o Falani. Na auina atu uluai faifeautalai i lena vaega o Europa e tau atu lava i tua i le 1861. Ua afe ma afe tagata ua auai i le Ekalesia. O le toatele lava o i latou ua malaga atu i le Iunaite Setete. Ae ua i ai nei iina se faalapotopotoga faapelepele o Au Paia o Aso e Gata Ai, ua alagatatau ona i ai se maota o le Alii mo i latou.

Sa ou naunau lava a o matou i ai i lena vaega o le lalolagi, ia matou malaga atu i isi vaega. O lea sa matou felelei ai i Kiev i Ukiraine. Sa ou i ai iina i le 21 tausaga talu ai. Ua i ai i lena atunuu se lagona fou o le saolotoga. Oka se musuia o le feiloai atu i le silia ma le 3,000 tagata o le Au Paia o Ukiraine. Sa potopoto mai tagata i le atunuu atoa, ma sa latou taliaina tulaga faigata ma le taugata ina ia latou malaga atu iina.

O se tasi aiga sa le gafatia ona aumaia uma tagata o lo latou aiga. O lea sa faamuli ai matua i le fale, ae auina atu la la’ua fanau ina ia latou maua ai le avanoa matou te mafuta.

Sa matou tuua iina ae malaga atu i Moscow, i Lusia. Sa ou i ai foi iina i le 21 tausaga ua mavae, ma ua i ai foi le suiga. Sa pei o se eletise [lea suiga]. E le mafai ona e vaai i ai. Ae e mafai ona e lagonaina. Sa faia ai foi iina se matou sauniga matagofie, ma sa maua ai foi le avanoa e talanoa ai ma taitai taua o le malo e faapei ona matou faia ai i Ukiraine.

Oka se anagata ma le taua o le avanoa e feiloai ai ma nei Au Paia ofoofogia sa potopoto mai “e taitasi i aai, ma le taitoalua i aiga,” ma aumaia ai i Siona e faataunuu ai le valoaga a Ieremia (tagai Ieremia 3:14). E le faigata o latou olaga. E mamafatu a latou avega. Ae ua lagolelei lo latou faatuatua ma malolosi a latou molimau.

O nei nuu mamao, e toatele tagata o le Ekalesia e le masani ai, ua mumusaesae ai le afi o le talalelei ma ua faamalamalamaina ai le ala mo le fiaafe o tagata.

Ona matou felelei atu ai lea i Iselani. O se nofoaga matagofie ma e matagofie foi ona tagata. O iina sa faia ai se matou fono umi lava ma le peresitene o le malo, o se tagata e ese le faaaloalogia ma aloaia, ma sa malaga mai foi o ia i Iuta ma faia ai se saunoaga matagofie e uiga i o tatou tagata.

Sa matou toe mafuta foi ma le Au Paia. O se musumusuga lava le vaai atu i o latou foliga a o latou faatumuliaina lo tatou falelotu i le aai o Reykjavik.

O nei nofoaga uma ma avanoa uma e lauga atu ai i le anoanoai, e tasi lava le mea sa tu mai pea lava pea i lo’u mafaufau—o le ofoofogia o lenei galuega, le ofoofogia a’ia’i o lenei galuega. E saga manatua ai pea lava pea upu o la tatou viiga matagofie lea sa faatoa lagiina e le aufaipese.

“Le faavae malosi, le Au Paia e,

Ua fai mo tou faatuatua i ana afioga!”

(“Le Faavae Malosi,” Viiga, nu. 45.)

Pe ua malamalama moni ea i tatou o le Au Paia o Aso e Gata Ai, ma talisapaia le malosi o lo tatou tulaga? E tulaga ese ma ofoofogia i le lotolotoi o lotu i le lalolagi.

Pe o lenei ea Ekalesia o se faalapotopotoga faaleaoaoga? Ioe. O lo o tatou aoao atu pea lava e le aunoa, ma e le uma lava le aoao atu, aoao atu, ma saga aoao atu i le anoanoai o tulaga eseese. Pe o se faalapotopotoga ea faaleva-fealoai? Ioe. O se aiga tele o ni uo o lo o fealumi faatasi ma fesagisagiai fiafia ma isi. Pe o se faalapotopotoga ea e fesoasoaniai ai le tasi i le isi? Ioe. O lo o i ai sana polokalama ofoofogia mo le atinaeina o le ola faalagolago o le tagata ia te ia lava ma tuuina atu ai fesoasoani ia i latou e faanoanoa. O mea uma lava na ma isi. Ae e sili atu i lo na mea uma, o le Ekalesia lenei ma le malo o le Atua ua faatuina ma taitaia e lo tatou Tama e Faavavau ma Lona Alo Pele, o le Alii toetu ia o Iesu Keriso, ina ia manuia ai tagata uma e o mai i lana lafu.

Tatou te tautino atu ma le manino ma le moni atoatoa, o le Atua le Tama ma Lona Alo, o le Alii o Iesu Keriso, sa faaalitino mai i la’ua i le taulealea o Iosefa Samita.

Ina ua faatalanoaina au e Mike Wallace i le polokalama o le 60 Minute, sa fesili mai o ia pe ou te talitonu moni i ai. Sa ou tali atu i ai, “Ioe, alii. O le vavega lena”

O lo’u lagona lena i ai. E faalagolago lo tatou malosi atoa i le lelei o la tatou faalepo. A le tupu o lona uiga e le i tupu lava. Afai e leai, o lona uiga o se taufaasese lenei galuega. Afai na tupu, o lona uiga o le galuega aupito taua ma le ofoofogia lenei i lalo o le lagi.

Mafaufau i ai uso e ma tuafafine. Ua tele senituri o tapunia le lagi. E anoanoai—e le toalaiti alii ma tamaitai lelei—o tagata maoae ma le ofoofogia sa taumafai e faasa’o, faamalosi, ma faaleleia a latou polokalama o tapuaiga ma a latou aoaoga faavae. Ou te avatu ia i latou na le faamalo ma le faaaloalo. Ua sili atu ona lelei le lalolagi ona o lo latou lototetele. E ui ina ou talitonu sa musuia la latou galuega, ae lei tatalaina ai le lagi, ae faaali mai ai le Atua.

Ona oo mai lea i le 1820, le faaaliga mamalu o le tali mai i le tatalo a se taulealea sa faitau i le Tusi Paia a lona aiga e uiga i upu a Iakopo: “Ae afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua; ona foaiina mai ai lea ia te ia” (Iakopo 1:5).

O luga o lena aafiaga ofoofogia, o lo o tu ai le malosiaga o lenei Ekalesia.

O talafaasolopito faalelotu uma ua tusia, e leai lava se mea e faatusalia i ai. O lo o tusia i le Feagaiga Fou le papatisoga o Iesu, ina ua faalogoina le siufofoga o le Atua ma le Agaga Paia sa faapepepepe ifo e peiseai o se lupe. I le Mauga o Liua, sa vaai ai Peteru, Iakopo, ma Ioane i le liua o le Alii i o latou luma. Sa latou faalogoina le siufofoga o le Tama, ae latou te le i vaai ia te Ia.

Aisea na faaali mai ai le Tama ma le Alo i se taulealea, a ua na o se tama talavou lava o ia? E tasi lava le mafuaaga, na afifio mai e amatalia le tisipenisione o le talalelei aupito sili o taimi uma, e faapotopoto ai isi tisipenisione uma ma tuufaatasia ina ia tasi.

Pe i ai ea se tasi na te mafai ona le talitonu o le vaitaimi o lo o tatou ola ai nei o le taimi aupito ofoofogia lenei o le talafaasolopito o le lalolagi? Ua tupu talaulau le faasaienisi, o vailaau, o fesootaiga, o femalagaaiga, ua le faatusalia talafaasolopito tusitusia o le tagata. Pe faigata ea ona talitonu faapea e tatau ona tupu talaulau se malamalama faaleagaga, o se vaega o lenei poto faatufugaga ma le malamalama le mafaatusalia i lenei vaitau?

O le meafaigaluega lava i lenei galuega a le Atua, o se taulealea e le i faafenumia’ia lona mafauafu i manatu ma aoaoga a tagata. Sa mama lelei lena mafaufau ma e lei aafia i aoaoga masani o na ona po.

E faigofie lava ona iloa le mafuaaga e le talia ai e tagata lenei tala. E toetoe lava a le malamalama i ai. Ae e matua talafeagai lava. O i latou e masani i le Feagaiga Tuai, latou te iloaina le afio ifo o Ieova i perofeta sa soifua i na taimi, lea afai e faatusatusa i le tisipenisione lenei, e le faigata lava. Pe mafai ea ona latou faafitia faaletulafono le tulaga manaomia o le faaali mai o le Atua o le lagi ma Lona Alo toetu i lenei vaitau lavelave o le talafaasolopito o le lalolagi?

Na afifio mai i La’ua, o i La’ua uma, na vaai Iosefa ia te i La’ua i lo La’ua mamalu ofoofogia, na La fetalai atu ia te ia ma sa ia faalogo foi i ai ma tusia a La’ua afioga—e uiga i nei mea ofoofogia tatou te molimau atu ai.

Ou te iloaina se tagata atamai na faapea mai ua utia le Ekalesia ona o lona talafaasolopito. O la’u tali i ai, a leai lena talafaasolopito, o se mea noa i matou. O le moni o lena mea patino tulaga ese ma le ofoofogia na tupu, o le vaega aupito taua lea o lo tatou faatuatuaga.

Peitai o lenei faaaliga mamalu, ua na o se amataga o le mau faaaliga o lo o faavae ai le uluai talafaasolopito o lenei Ekalesia.

Ae afai foi e le lava lena faaaliga e faamaonia ai le moni ma le peresona o le Togiola o tagata soifua, o lea foi na sosoo ma le oo mai o le Tusi a Mamona. O se mea lea e mafai e le tagata ona uu i ona lima, e mafai ona “tago i ai ma lagonaina”. E mafai ona ia faitauina. E mafai ona tatalo ai aua o lo o i ai se folafolaga, o le a tautino mai e le Agaga Paia lona moni pe afai e saili atu mo lena molimau i le tatalo.

O lenei tusi ofoofogia ua avea o se molimau i le moni o loo soifua le Alo o le Atua. O lo o tautino mai e le Tusi Paia, “e faamaoni ai upu uma i le mau a le toalua, po o le toatolu” (Mataio 18:16). O le Tusi Paia, o le molimau a le Lalolagi Tuai, o se tasi lea molimau. O le Tusi a Mamona, o le molimau a le Lalolagi Fou, o le isi lea molimau.

E le mafai ona ou malamalama pe aisea e le talia ai e le lalolagi Kerisiano lenei tusi. Sa ou manatu latou te fia sailia soo se mea, ma mea uma e faatuina e aunoa ma le fesiligia o le moni ma le paia o le Faaola o le lalolagi.

Ina ua mavae le faaaliga a Iosefa Samita ma le oo mai o le Tusi a Mamona, sa sosoo mai ai ma le toefuataiina mai o le perisitua—muamua, o le Perisitua Arona i lalo o aao o Ioane le Papatiso, o le na ia papatisoina Iesu i Ioritana.

Ona oo mai ai lea o Peteru, Iakopo, ma Ioane, o Aposetolo a le Alii, o e na latou faaee maia i lenei vaitau mea sa latou maua mai i aao o le Matai, o le sa latou savavali faatasi, e oo lava i “ki o le malo o le lagi” faatasi ai ma le pule e fusifusia ai i le lagi mea latou te fusifusia i le lalolagi (tagai Mataio 16:19).

Ina ua mavae atu lena, ona oo mai ai lea o le faaeeina mai o ki o le perisitua i lalo o aao o Mose, Elaia, ma Elia.

Mafaufau i ai o’u uso e ma tuafafine. Mafaufau i le ofoofogia o lenei mea.

O le Ekalesia toefuataiina lenei a Iesu Keriso. O i tatou o se nuu, o le Au Paia o Aso e Gata Ai. Tatou te molimau atu na tatalaina mai le lagi, na talaia pupuni, na fetalai mai le Atua ma sa faaalia mai Iesu Keriso lava Ia, ma sosoo ai ma le faaeeina mai o le pule paia mai le lagi.

O Iesu Keriso o le maa tulimanu o lenei galuega, ma o lo o fausia i luga o se “faavae o … aposetolo ma perofeta” (Efeso 2:20).

O lenei toefuataiiga ofoofogia ua tatau ai ona avea i tatou ma se nuu faapalepale, e tausi tuaoi, e talisapaia ma agalelei atu i isi. E le tatau ona tatou faalialiavale. E le tatau ona tatou mitavale. E mafai ona tatou loto faafetai, ma e tatau lava. E mafai ona tatou lotomaualalo, e pei lava ona tatau ai.

Tatou te alolofa i tagata o isi ekalesia. Tatou te galulue faatasi ma i latou i le faia o galuega lelei. Tatou te faaaloalo ia te i latou. Peitai, e le tatau lava ona galo ia te i tatou o tatou aa po o le talafaasolopito o le Ekalesia. O na aa ua taooto i le loloto o le palapala, o le amataga lea o lenei tisipenisione mulimuli, o le tisipenisione o le atoaga o taimi.

O se faamalosiauga lava le vaavaai atu i foliga o alii ma tamaitai i le salafa o le lalolagi, o i latou o lo o tauaveina i o latou loto se talitonuga maumaututu maua’i o le moni o lenei faavae.

A oo i le pule paia faalelagi, o le vaega muamua aupito taua lea o le mataupu atoa.

Ia faafetaia le Atua mo le ofoofogia o Lona faaee maia o le molimau, pule ma aoaoga faavae e o faatasi ma lenei Talalelei toefuataiina a Iesu Keriso.

Atonu o le tatou savali aupito tumaoti lea ma le taua i le lalolagi. Tatou te le avatua ma le faalialiavale. Tatou te molimau atu i le lotomaualalo, ae faia ma le paia ma le loto faamaoni atoatoa. Tatou te valaaulia tagata uma, o le lalolagi atoa, e faafofoga i lenei tala ma sailiili i ona upumoni. Ia faamanuia mai le Atua ia te i tatou, o ni e ua talitonu i Lona faaali mai, ma ia fesoasoani mai ia te i tatou ia tatou faasafua atu le malamalama e uiga i nei mea sili ma le ofoofogia, ia i latou uma o le a faafofoga mai. Tatou te fai atu i nei tagata i se agaga o le alofa, aumai uma a outou mea e lelei ma mea moni sa outou maua mai i soo se punavai ma o mai sei vaai pe mafai ona matou faaopoopo atu i ai. Ou te tuuina atu lenei valaaulia i alii ma tamaitai i soo se mea o i ai, faatasi ai ma la’u molimau paia, e moni lenei galuega, aua ua ou iloa le moni e ala i le mana o le Agaga Paia, i le suafa o Iesu Keriso, amene.