Mipili Ko sa Dili Pag-inom
Torsten König, Germany
Samtang nagbiyahe padulong sa youth conference sa Stuttgart, Germany, ako adunay kahigayunan sa pag-istorya sa usa ka tigulang nga babaye kabahin sa templo ug kabahin sa akong hugot nga pagtuo sa gipahiuli nga ebanghelyo. May nahibaloan na siya sa Simbahan ug adunay igong maayong mga ideya sa pipila ka mga doktrina sa ebanghelyo.
Sa among pag-istoryahanay, hinoon, ang babaye misulti og usa ka butang nga nakapaguol kanako. Sa dihang gipaila-ila siya sa Simbahan mga 40 na ka tuig ang milabay sa usa ka higala nga Santos sa Ulahing mga Adlaw, usa ka butang ang gisulti sa iyang higala nga dili gayud niya makalimtan. “Ako dili mahimong moinom,” miingon ang iyang higala. Ang babaye dayon midugang nga nasayud siya og pipila ka mga Santos sa Ulahing mga Adlaw nga moinom “matag karon ug unya.”
Sukwahi sa unsa ang gihunahuna niining babaye, wala ipugos ang ebanghelyo ngadto ni bisan kinsa. Kitang tanan adunay katungod sa paghimo og mga desisyon sa atong kaugalingon. Mihatag kanato ang Langitnong Amahan sa Pulong sa Kaalam aron sa pagtabang kanato nga magpabiling balaan ang atong mga lawas, apan ang matag usa kanato kinahanglang mopili sa pagsunod o dili sa Iyang balaod sa panglawas tungod kay kita gihatagan usab Niya sa atong moral nga kabubut-on.
Mihukom na ako mga pipila na ka tuig ang milabay sa dihang ako nabunyagan nga mosunod ako ni Jesukristo. Tungod niana nga rason, dili ako moinom og alkohol. Ang mga sugo sa Dios mga gasa alang kanato, ug kon sundon nato kini, kini modala kanato balik ngadto Kaniya.
Gikan niining yano nga panghitabo, napahinumduman ako nga isip mga miyembro sa Simbahan sa Ginoo, kanunay kitang ehemplo ngadto sa uban. Mopili kita, hinoon, unsa kana nga ehemplo.