Pagdapit sa Kalisdanan
Cesar A. Minutti, Brazil
Sa wala madugay human sa akong pagsugod sa gikinahanglan nga serbisyo sa kasundalohang taga-Brazil, napili ako isip corporal sa dose ka mga tawo. Sa walay swerte, ang akong 12 ka batan-ong mga sundalo daw mao ang labing ubos og mga sumbanan sa mga baraks. Nadiskobrehan nako nga sila nakabuhat o nakasulay sa drugas, pagpangawat, imoral, ug uban pang seryuso nga mga sala.
Imbis tugutan nako ang akong kaugalingon nga maimpluwensya sa ilang ubos nga baruganan, gipahimuslan nako ang matag oportunidad sa pagpakigbahin sa ebanghelyo ngadto kanila. Pananglitan, panahon sa mga break o kon magdungan kami og limpyo sa mga pusil, maghisgut ko kanila kabahin sa ebanghelyo. Naghunahuna ko nga ilang binuangan ang akong mga baruganan ug kataw-an ko, apan naminaw sila ug mirespeto kanako. Apan, bisan sa akong mga paningkamot sa pagtudlo kanila sa doktrina sa ebanghelyo, wala sila mausab sa ilang mga kinaiya o batasan.
Ang among panahon sa sundalo natapos, ug sa among katapusan nga adlaw isip mga sundalo, ang mga lalaki midapit kanako sa pagsaulog uban kanila sa gamay nga ranso. “Corporal, kinahanglang moadto ka sa among party,” usa kanila miingon kanako. “Dili mi nimo insultuhon pinaagi sa dili pagtambong, di ba?”
Hapit na unta ako mosugot sa ilang pagdapit aron dili sila mainsulto. Apan usa ka panghunahuna miabut kanako nga ang mga sumbanan sa party sukwahi sa mga sumbanan sa Simbahan. Nahinumdom ako unsa ang gipangtudlo kanako sa seminary kabahin sa dili pag-adto sa mga dapit kon asa ang Espiritu Santo dili moadto. Bisan pa sa ilang mga pagpamugos, miingon ako sa grupo nga dili ako motambong. Nanmilit ako ug miuli sa balay.
Milabay ang mga buwan una pa nako nakita pag-usab ang usa sa mga sundalo gikan niadto nga grupo. Ang iyang gisulti kanako nakapalipay kanako nga ako wala moadto sa ilang pagsaulog sa pagpanamilit, nga adunay daghan kaayong alkohol. Samtang hubog na, ang mga lalaki nagsugod sa paglabay og alkohol sa usag usa. Dayon, isip binuang lamang, usa kanila ang milabay og nagsiga nga posporo sa iyang kauban, kinsa grabe nga nasunog nga siya namatay pipila lamang ka adlaw. Isip resulta, ang tanang partisipante niadto nga party miatubang og salang kriminal nga may kalabutan sa iyang kamatayon.
Kon mitambong pa ako sa party—bisan dili moinom—ako unta anaa sa samang kalisdanan. Kadto nga insidente nagsunod unta kanako ug makababag sa akong kaugmaon. Nagguol ako sa maong batan-ong lalaki nga namatay, apan ako mapasalamaton nga misunod ako sa mga pag-aghat sa Espiritu ug sa tambag sa mga lider sa Simbahan.