Sa mga Pulong sa mga Lider sa Simbahan
Ikapulo—usa ka Sugo Bisan pa Gani sa mga Pobre
Gikuha gikan sa Abril 2005 nga pakigpulong sa kinatibuk-ang komperensya.
Niadtong Oktubre 1998 ang Buhawing [Hurricane] Mitch miguba pag-ayo sa daghang mga bahin sa Central America. Si Presidente Gordon B. Hinckley (1910–2008) nabalaka pag-ayo sa mga biktima niini nga katalagman, nga kadaghanan nawad-an sa tanang mga butang—pagkaon, biste, ug mga gamitunon sa panimalay. Gibisitahan niya ang mga Santos sa siyudad sa San Pedro Sula ug Tegucigalpa, Honduras; ug Managua, Nicaragua. Ug, sama sa mga pulong sa mahigugmaon nga propetang si Elijah ngadto sa gigutom nga biyuda, ang mensahe niining moderno nga propeta sa kada siyudad managsama—ang magsakripisyo ug magmasulundon sa balaod sa ikapulo.
Pero unsaon nimo sa paghangyo sa usa ka tawo nga pobre kaayo aron magsakripisyo? Si Presidente Hinckley nasayud nga ang gipadala nga pagkaon ug biste nga ilang nadawat makatabang kanila aron mabuhi sa krisis, apan ang iyang kabalaka ug gugma alang kanila milapas pa niana. Sa sama ka importante sa tawhanon nga panabang, nasayud siya nga ang pinakaimportante nga panabang nagagikan sa Dios, dili gikan sa tawo. Ang propeta buot motabang kanila sa pag-abli sa mga bintana sa langit sigun sa gisaad sa Ginoo diha sa basahon ni Malaquias (tan-awa sa Malaquias 3:10; Mosiah 2:24).
Si Presidente Hinckley nagtudlo kanila nga kon mobayad lamang sila sa ilang ikapulo, kanunay silang anaay pagkaon sa ilang lamesa, kanunay nga sila anaay isul-ob nga sinina, ug kanunay nga sila anaay kapasilongan.
Mibisita si Presidente Gordon B. Hinckley sa mga miyembro sa Simbahan sa Honduras human sa buhawi niadtong 1998.