Na ika 182 ni Koniferedi Raraba Vakayabaki e Oka kina na Veisau ni Veiliutaki ena Vitusagavulu, Matabisopi, kei na iSoqosoqo ni Veivukei
“E sega ni rawa ni da tiko vata kece ena ruku ni dua ga na delavuvu,” e kaya o Peresitedi Thomas S. Monson, na Peresitedi ni Lotu, ena soqoni ka dolavi kina na ika 182 ni Koniferedi Raraba Vakayabaki ena ika 31 ni Maji, 2012, “ia sa rawa vei keda ena gauna oqo me da vakaitavi ena veigacagaca ni koniferedi oqo ena vakasakiti ni retioyaloyalo, retio, keveli, na biaulivaliva ni setilaiti, kei na Initaneti—ena iyaya dau veikauyaki sara mada ga. Eda soqo vata mai ka duabau ga, eda vosataka na veivosa e vuqa, eda tu ena veivanua e vuqa, ia e dua ga na noda vakabauta ka dua ga na ivunau ka dua ga na noda inaki.”
E dina na malanivosa oya ena vukudra na sivia na 100,000 na tamata era tiko rawa ena veisoqoni ni koniferedi raraba ena Vale ni Koniferedi e Salt Lake City, Utah, Amerika, ena ika 31 ni Maji kei na 1 ni Epereli—kei ira tale na milioni era a sarava se rogoca ena kakaburaki ena retioyaloyalo, retio, setilaiti, kei na Initaneti. Ena kakaburaki bula kei na kena kaburaki bera, era sa na vakaitavi kina ena 94 na vosa na lewenilotu kei ira tale eso ena veiyasai vuravura.
Ni se bera sara mada ga ni tekivu na koniferedi, e vuqa na lewenilotu era sa veitaratara yani ena ivakarau vou ni veitaratara ena sala vakamisini oqo ka sureti ira eso tale me ra vakaitavi ena koniferedi. Na wijiti, na itawake, kei na droini ni itukutuku ka ra a tavoci ena Maji, ka ra tu ena vica vata na vosa, era na vakabiri ena conference.ldschurch.org ena vica na macawa ni bera na veikoniferedi raraba yadua.
E vica na veisau a vakayacori ena veiliutaki ni Lotu ena soqoni ena yakavi ni Vakarauwai, era oka vata kei ira era sa vagalalataki o iratou na Matabisopi Vakatulewa kei na mataveiliutaki raraba ni iSoqosoqo ni Veivukei. Sa vagalalataki mai na Mataveiliutaki ni Vitusagavulu o Elder Steven E. Snow; era sa vagalalataki e 37 na Vitusagavulu ni iWasewase. Me baleta na ituvatuva taucoko ni veitokoni kei na veivagalalataki, raica na tabana e 27.
Eratou sa kacivi ki na Matabisopi Vakatulewa o Gary E. Stevenson, Bisopi Vakatulewa; Gérald Caussé, iMatai ni Daunivakasala; kei Dean M. Davies, iKarua ni Daunivakasala. Eratou sa kacivi ki na mataveiliutaki raraba vou ni iSoqosoqo ni Veivukei o Linda K. Burton, peresitedi; Carole M. Stephens, imatai ni daunivakasala; kei Linda S. Reeves, ikarua ni daunivakasala.
Sa kacivi o Elder Richard J. Maynes ena iMatai ni Kuoramu ni Vitusagavulu me veiqaravi ena Mataveiliutaki ni Vitusagavulu.
Eratou sa kacivi me lewe ni iMatai ni Kuoramu ni Vitusagavulu o Elder Larry Echo Hawk, Elder Robert C. Gay, kei Elder Scott D. Whiting. Erau sa kacivi mai na iKarua ni Kuoramu ni Vitusagavulu ki na imatai ni Kuoramu o Elder Craig A. Cardon kei Elder Stanley G. Ellis.
Eratou a veiqaravi vata tiko mai ena Matabisopi Vakatulewa ena sivia na 16 na yabaki o Bisopi H. David Burton kei rau na nona daunivakasala. E dina ni ra a tu eso na Bisopi Vakatulewa e balavu cake na nodra veiqaravi, e sega ni dua na Matabisopi Vakatulewa me balavu cake na nodratou veiqaravi vata.
Wilika na kedra itukutuku o ira era kacivi vou me tekivu ena tabana e 135.
Ena koniferedi, e vica na veisau a vakayacori ena veiliutaki ni Lotu ena soqoni ena yakavi ni Vakarauwai, era oka vata kei ira era kacivi o iratou na Matabisopi Vakatulewa kei na mataveiliutaki raraba ni iSoqosoqo ni Veivukei. Sa kacivi o Elder Richard J. Maynes ki na Mataveiliutaki ni Vitusagavulu; era sa kacivi talega e 40 na Vitusagavulu ni iWasewase.