Bisopi Dean M. Davies

iMatai ni Daunivakasala ena Matabisopi Vakatulewa

Ni tarogi Bisopi Dean Davies na Peresitedi ni Lotu ena veika lalai me baleta e dua na vanua me tara kina e dua na valetabu, me vaka na balavu ni gauna e rawa ni taubaletaki kina mai na ikelekele ni basi voleka duadua, e sega ni tukuna walega o Baraca Davies na veika e kila. E kila sara ga o koya na veika era dau sotava na petereni ni sa lakova oti na sala oya.

“O dau cakava vakacava?” A taroga vua ena dua na gauna o Peresitedi Gordon B. Hinckley.

Na yalodina kei na vakasama e vagolei vakatabakidua ki na veika lalai sai koya na ivakarau e bula tu kina o Bisopi Dean Myron Davies—na iKarua ni Daunivakasala ki na Matabisopi Vakatulewa se qai kacivi vou.

A sucu mai Salt Lake City, Utah e Amerika, ena Sepiteba 1951 vei rau o Oliver T. kei Myra Davies, a tubu cake o Bisopi Davies ena dua na matavuvale ka ra tuberi kina ena ivakavuvuli ni loloma kei na cakacaka. Kevaka e vinakata e dua na ka, me na bunotaka. Ni sega ni rawa ni soli vua e dua na iyaya ni vakatatalo a kerea tiko vei tinana ena dua na gauna balavu, a vakasamataka na sala tale eso. E se nanuma voli ga na oca ni yago kei na vakacegu a qai basika e muri ena nona biliga voli e dua na ikotinico makawa ena nona veico balavu o koya e tiko tikivi iratou.

Ni oti na nona veiqaravi ena Tabana ni Kaulotu na Uruguay/Paraguay mai na 1970 ki na 1972, a lesu ki vale me laki vakamautaki Darla James, e dua na itokani mai na nona gauna taumada ni itabagone, ena June 1973 ena Valetabu e Salt Lake. A rawata o Bisopi Davies e dua na koroi ni bejila ena agricultural economics mai na Brigham Young University ena 1976 ka qai taura e muri na veituberi ni veiliutaki mai na Stanford kei na Northwestern Universities.

Ena veiyabaki, eratou a vakaitikotiko o koya kei na watina kei iratou na lima na luvedrau ena ono na yasana ni cakacaka tiko ena bisinisi ni volitaki iyauqaqa. A veiqaravi vakaperesitedi ni iteki, vakadaunivakasala ena mataveiliutaki ni iteki, ena lima na matabose e cake, ena matabisopi, ka vakakina ena veilesilesi eso ena tabanalevu. A veiqaravi talega vakaperesitedi ena Tabana ni Kaulotu na Puerto Rico San Juan mai na 1998 ki na 2001. Ena gauna e kacivi kina ena veikacivi oqo, a cakacaka tiko vakamanidia dairekita ni Special Projects Department ena Lotu.

E okati ena veilesoni sa vulica ni “Turaga e lomani ira ka dau tuberi ira na Luvena.”