Na iTukutuku Vovou vei ira na Kenadau ni Veiqaravi vei Ira na Vakaleqai tu Vakayago sa Vakuri ena LDS.org
O Julie Brink mai Indiana e Amerika a susuga cake e dua na luvena yalewa Didivara ka veiqaravi tu ena vica vata na yabaki vakadauvakadewa vosa ni Vosa Vagalau vaka-Amerika ena nona iteki. A qasenivuli tu mai vakabalavu sara o Elaine Allison mai Arizona e Amerika, ka dau veimaliwai kina vakadodonu ka vakatikitiki ena so na gauna vata kei ira na gonevuli vakaleqai vakayago. E tiko talega e dua na vugona ka tu vua na Down syndrome kei ira na nona itokani voleka sa tauvi ira tu e vica vata na mataqali sclerosis kei na ALS, se mate na Lou Gehrig.
E sega ni dua vei rau o Sista Brink se o Sisita Allison me nanuma ni “kenadau” ena nodra vuravura na vakaleqai tu vakayago, ia erau a veiqaravi ruarua vakenadau vei ira na vakaleqai tu vakayago ni iteki, e dua na ilesilesi sa vakuri kina eso na itukutuku vou ena iwasewase ni Serving in the Church ena LDS.org ena 10 na vosa. (Ena tiko beka na veikacivi oqo ena dua na iteki se tabanalevu se, ena dua na vanua e gadrevi ruarua kina.)
E tukuni vakalailai na nodra kacivi na kenadau vei ira na vakaleqai vakayago ena tabanalevu se iteki ena iVoladusidusi 2: Veiliutaki ena Lotu, eso na iliuliu era vakataroga se cava na itavi ni ilesilesi oqo.
“E tu ena so na gauna era sega beka ni raica kina na iliuliu e dua na gagadre se me ra kila na ka me caka ni basika e dua na leqa vaqo,” e kaya o Christopher Phillips, na Manidia ni Tabana ni Veiqaravi vei Ira na Vakaleqai Vakayago ena Lotu. “E vuqa sara na gauna e rawa ni veivuke kina e dua na kenadau vei ira na vakaleqai tu vakayago, ia era sega ni dau kila na tamata kece ni tiko na veikacivi oqo.
“Na iwasewase vou oqo ena initaneti ni Serving in the Church e sega ni vakamacalataki kina vakamatailalai na veika kece e dodonu me cakava na tamata e nona na veikacivi oqo,” e tomana o koya, “ia e solia na vakasama kei na ivurevure me rawa kina vua e qarava na itavi oqo me vukei ira na iliuliu, qasenivuli, kei na matavuvale era tiko kina na vakaleqai tu vakayago se na veika tale eso e vakakina.”
Na itukutuku e kabi toka ena LDS.org ena 10 na vosa e vakanamata toka ena sala e rawa ni ra veivuke kina na kenadau vei ira na veiliutaki ni tabanalevu kei na iteki:
-
Raica ka kilai ira na tamata yadua e vakaleqai tu na yagodra kei na nodra matavuvale ena loma ni tabanalevu se iteki.
-
Okati ira na lewenilotu e vakaleqai tu na yagodra ena veisoqoni kei na itaviqaravi.
-
Sauma na taro eso me baleti ira na vakaleqai tu na yagodra mai vei ira na itubutubu, veiliutaki, kei ira tale eso.
-
Raica na veimadigi vakaibalebale eso me baleta na nodra veiqaravi na lewenilotu era vakaleqai tu vakayago.
-
Raica na veigagadre eso ni matavuvale (oka kina na gagadre ni veiqaravi) ka, kevaka e ganita, raica na ivurevure eso ena itikotiko, tabanalevu, kei na iteki era tu me veivuke ena gagadre oqori.
E bibi me da kila ni sega ni o koya duadua ga na kenadau vei ira e vakaleqai tu na yagodra me cakava tiko na veika oqo. Ia, na nona itavi me vukei ira na vo ni iliuliu me ra kilai ira ka qaravi ira vakavinaka cake e vakaleqai tu na yagodra. Me kena ikuri, o koya talega na kenadau vei ira na vakaleqai tu vakayago me “vukei ira na tamata yadua kei na itubutubu e tarai ira tiko na revurevu ni vakaleqai ni yago me ra wasea na itukutuku vei ira na lewe ni lotu kei ira na iliuliu ena sala ni veivuke.”
Na itukutuku vou ena LDS.org ena 10 na vosa e vukei ira na kacivi me ra kenadau ena vakaleqai ni yago me ra vaqaqacotaki ira na lewe ni Lotu e vakaleqai tu na yagodra.