Me Vakavinavinakataki Ga na Kalou
Ena vakacava mada na vinaka cake kevaka meda na kila taucoko na Kalou dauloloma ka vakaraitaka na nodra vakavinavinvaka Vua.
Kemuni na taciqu kei na ganequ, keimami vakavinavinakataki kemuni ena nomuni veitokoni kei na yalodina. Keimami vakaraitaka na neimami vakavinavinaka kei na loloma vei kemuni yadua.
Ena dua na gauna se qai oti toka ga oqo, keirau a marautaka tiko kei Sisita Nelson na totoka ni irairai ni ika ni veivanua katakata ena dua na tobu ni ika vakaitaukei. Era veisiriyaki na ika dui roka ka duidui na kedra ibulibuli kei na kedra lelevu. Au taroga na dauveiqaravi ka tu voleka, “O cei e dau vakarautaka na kedra na ika totoka oqo?”
A sauma mai, “O au.”
Au taroga lesu, “Era sa bau vakavinavinaka mada vei iko?”
E sauma, “Se bera tiko!”
Au vakasamataki ira eso na tamata e vakaoqori na nodra sega tu ni dau kila na nona cakacaka na nodra Dauveibuli ka nodra “madrai ni bula”1 dina. Era bula ena veisiga yadua ka ra sega ni vakila tu na Kalou kei na Nona vinaka vei ira.
Ena vakacava mada na vinaka cake kevaka meda na kila taucoko na Kalou dauloloma ka vakaraitaka na nodra vakavinavinaka vua. E vakavuvulitaka o Amoni, “Me da vosavinakataka na yacana tabu, ni sa sega ni mudu na nona cakacaka.”2 Na ivakatagedegede ni noda vakavinavinaka sa ivakarau ni noda lomani Koya.
Na Tama ni yaloda na Kalou.3 E taukena tu o Koya e dua na yago vakalagilagi, ka uasivi sara ni lewe kei na sui.4 Eda a bula vata kei Koya mai lomalagi ni bera ni da sucu mai.5 Ia ena gauna e buli keda kina vakayago, eda a buli meda veiucui kei na Kalou, eda yadua na yago.6
Vakasamataka mada na noda susugi vakayago. Sa isolisoli dina mai lomalagi. Na gadrevi ni cagi, kakana, kei na wai era yaco kece mai vei keda ni ra iloloma mai vua na Tamada Vakalomalagi dau loloma. A buli na vuravura me tokona na noda ilakolako lekaleka ni bula oqo.7 Eda a sucu mai kei na noda rawa ni tubu, loloma, vakawati, ka bucina na matavuvale.
Na vakamau kei na matavuvale a tauyavutaka na Kalou. Na matavuvale sai isoqosoqo bibi duadua ni bula veimaliwai nikua kei na bula tawamudu. Ena ruku ni nona ituvatuva cecere ni marau na Kalou, sa rawa kina me ra vauci na veimatavuvale ena veivaletabu ka ra vakarautaki me ra lesu tale ka laki bula ena Kena iserau tabu me tawamudu. Oqori na bula tawamudu. E vakayacora na gagadre titobu duadua ni yalo ni tamata—na gagadre ni tiko vata me tawamudu kei ira na lewe ni noda matavuvale lomani.
O keda eda tiki ni Nona inaki vakalou: “Na inaki kei na lagilagi ni noqu cakacaka,” e kaya o Koya, sai koya “me ra tucake tale mai na mate na tamata kecega ka rawata na bula tawamudu.”8 Me rawati na inaki oqori, “Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”9 Na ivalavala oya sa ivakaraitaki cecere ni loloma ni Kalou. “Ni sa sega ni tala mai na Luvena ki vuravura na Kalou me cudruvi ira na kai vuravura; me bula ga ko ira na kai vuravura.”10
E itakele ni nona ituvatuva tawamudu na Kalou na nona cakacaka na Luvena, o Jisu Karisito.11 A lako mai me vakabulai ira na luve ni Kalou.12 Ena vuku ni Nona Veisorovaki na Turaga, sa vakavotukana ena Nona sa tucake tale mai na mate (se na tawamate rawa).13 Ena vuku ni Veisorovaki, sa vakarautaki kina vei ira kece ena ganiti ira na bula tawamudu. E vakamacalataka kina o Jisu:
“Oi au na vu ni tucake tale, kei na vu ni bula, ko koya sa vakabauti au kevaka sa mate ena bula ga:
“Ia ko koya yadua sa bula ka vakabauti au, ena sega sara ni mate.”14
Me baleta na Veisorovaki ni Turaga kei na Nona isolisoli ni tucake tale—me baleta na itukutuku vakasakiti oqo ni Siganimate—me vakavinavinakataki ga na Kalou!
iSolisoli Vakayago
Na Tamada Vakalomalagi e lomani ira na Luvena.15 Sa vakalougatataki ira yadua ena isolisoli vakayago kei na kena e vakayalo. Meu vosa mada me baleti rau yadua. Ni o lagata “Au Luve ni Kalou,” vakasamataka na Nona iloloma vei iko me baleta na yagomu. Na kena levu na ivakarau vakasakiti ni yagomu era vakadinadinataka na “bula vakalou.”16
Na gacagaca yadua ni yagomu sa isolisoli uasivi ni Kalou. Na mata yadua e tiko na kena iloilo me rai kina vakataki koya. Era lewai rau na mata na nave kei na masela me dua ga na ka erau vakanamata kina. E semati na mata ki na vakasama, ka tukuna mai na ka e raici.
Na nomu uto e dua na ipamu warumisa.17 E va na kena paipo caka vakamatau sara ka ratou lewa na vanua e vagolei kina na drodro ni dra. Era dau tadola ka tasogo vaka-100,000 ena dua na siga—vaka-36 na milioni ena dua na yabaki. Ia, vakavo kevaka e tauvimate, sa rawa ni ra sotava tiko na dredre ni cakacaka oqori.
Vakasamataka mada na ivakarau ni itataqomaki ni yago. Me taqomaka mai na veivakamavoataki, sa dau kidava na mosi. Me sotava na vuvuca ni yago sa dau bulia na veitiki ni yago lalai. E vakarautaka na kuli na veitaqomaki. E dau veivakasalataki me baleta na mavoa ka rawa ni vu mai na katakata se batabata sivia.
Ena vakavouya na yago na veitikina sa sega na kena yaga ka lewa na ivakarau ni veitikina bibi. Edau vakamamacataka na yago na kena mavoa, drakusi, kei na sui e ramusu. Na kena rawa ni vakatubu bula e dua tale na isolisoli tabu mai vua na Kalou.
Me da nanuma tiko ni sega ni gadreva e dua na yago sa uasivi sara me rawata kina na nona icavacava vakalou. Ia na dina, ni so na yalo talei sara era vakavaletaki tu ena veiyago malumalumu ka sega ni taucoko. Na kaukauwa cecere vakayalo era dau tara cake na tamata ka ra vakaleqai tu vakayago, baleta ni sa rui dredre na ka era sotava tiko.
Ni dua e vakadikeva na cakacaka ni yago ni tamata ena raica vakaidina na “lagilagi kei na kaukauwa ni Kalou.”18 Baleta ni lewai tu na yago mai na veilawa vakalou, na veivakabulai ena yaco mai ena noda talairawarawa ki na lawa e yalataki kina na veivakalougtataki oqori.19
Ia eso na tamata e vakacalai tu na nodra nanuma ni ra basika tu vakacala ka na veituvaki ni yago vakasakiti oqori se basika ena kena yaco vakasauri ena dua na vanua e dua na ka. Tarogi iko mada, “E rawa beka ni tabaki e dua na ivolavosa ena kena kacabote e dua na ka ena sitoa ni tabaivola?” E lailai sara na madigi ni kena rawa ni yaco. Ia ke vakakina, ena sega ni rawa ni vakavinakataka na veitabana sa vakacacani se tabaka tale vakataki koya e dua na kena itabataba vou!
Kevaka beka me ra sega tu ni yalani na ka e rawa ni rawata na yago ena veitaqomaki, na ripea, na vakatulewa, kei na vakatubu bula, ena tawamudu na bula eke. Io, eda na mai tao tu ena vuravura oqo! Mai na loloma veivueti ena vukuda, sa vakarautaka kina na noda Dauveibuli me yaco mai na qase kei na veika tale eso ka na rawa kina ni mate na yagoda. Na mate, me vaka na sucu, e tiki ni bula. E vakavuvulitaka na iVolanikalou ni “sa sega ni kilikili me vakabulai tale na tamata mai na mate vakayago, ia kevaka sa vakakina, sa na tawayaga na ka sa navuci tu me rawati kina na bula.”20 Me da lesu tale vua na Kalou ena katuba eda vakatoka na mate sa ka rekitaki vei ira era lomani Koya ka ra sa vakarau tu me ra sota vata kei Koya.21 Ena qai yaco mai na gauna erau “na cokoti vata tale na yago kei na yalo ena kena itutu dina; ena semati vata na veitiki ni yago me vaka e liu,”22 me sega ni tawasei rawa tale. Ena vuku ni veisolisoli vakayago oqo, me vakavinavinakataki ga kina na Kalou!
iSolisoli Vakayalo
Me vaka na kena bibi na yago, sa yaco me vale ni yalona tawamudu e dua. A tu na yaloda ena iyalava ni bula taumada23 ka na bula tu ga ni sa mate oti na yago.24 Na yalo ena vakarautaka na veika me cakava na yago kei na ituvaki yadua.25 Ena bula oqo kei na kena e tarava, na yalo kei na yago, ni rau cokoti vata, ena yaco me tamata bula ka vakalou na kena yaga.
Baleta ni sa rui bibi sara na yalona e dua, na kena vakatorocaketaki e tawamudu na kena revurevu. Ena vaqaqacotaki ena noda veitaratara kei na Tamada Vakalomalagi ena masu ni yalomalumalumu26
Na ivakarau ni bula eda na lewai kina ena dua na siga era ka vakayalo kecega.27 E okati kina na loloma, ivalavala dodonu, buladokai, na yalololoma, kei na veiqaravi vei ira na tani.28 Na yalomu, ni vakaisa ka vakavaletaki ena yagomu, sa rawa kina me vakatorocaketaki ka vakatakila na itovo ni bula eso oqo ena veisala bibi sara eso ki na nomu itosotoso tawamudu.29 Ena rawa na tubu vakayalo ena ikalawa eso ni vakabauta, veivutuni, papitaiso, na isolisoli ni Yalo Tabu, kei na vosota me yacova na ivakataotioti, oka kina na cakacaka vakalotu ni edaumeni kei na veivauci ena valetabu.30
Me vaka ga ni dau gadreva na yago na kakana e veisiga me bula kina, sa gadreva talega vakakina na yalo me susugi. E susugi cake na yalo mai na veika dina tawamudu. Ena yabaki sa oti eda a marautaka na ika 400 ni yabaki ni ivakadewa ni King James ni iVolatabu. Ka sa tu vei keda na iVola i Momani me voleka ni 200 na yabaki. Sa vakadewataki tu ena gauna oqo ki na 107 na vosa. Ena vuku ni ka oqo kei na ivolanikalou talei tale eso, eda kila ni Tamada Tawamudu na Kalou ka ni noda iVakabula ka noda Dauveisereki na Luvena o Jisu Karisito. Ena vuku ni veisolisoli vakayalo oqo, me vakavinavinakataki ga na Kalou!
iSolisoli ni Kosipeli
Eda kila ni o ira na parofita ni vuqa na veitabagauna, me vakataki Atama, Noa, Mosese, kei Eparama, era a vakavuvulitaka na nona vakalou na Tamada Vakalomalagi kei Jisu Karisito. Na noda itabagauna oqo a vakatakilai mai vei Tamada Vakalomalagi kei Jisu Karisito ena Nodrau rairai mai vua na Parofita o Josefa Simici ena 1820. A tauyavutaki na Lotu ena 1830. Oqo ni oti e 182 na yabaki, eda sa vauci tu ena veiyalayalati me da kauta yani na kosipeli ki na “veimatanitu, veimataqali, duivosavosa, kei ira na tamata kecega.”31 Ni da vakayacora vakakina, eda na vakalougatataki vata o ira era solia kei ira era ciqoma.
Na noda na itavi me ra vakavulici na Luvena ka vakayadrata e yalodra mera kila na Kalou. Ena dua na gauna balavu sa oti a kaya kina na Tui o Penijamini:
“Mo ni vakabauta na Kalou; mo ni vakabauta ni sa bula tiko ka sa bulia na ka kecega mai lomalagi kei vuravura; mo ni vakabauta ni sa nona kece na lewa mai lomalagi kei vuravura; …
“… Mo ni vakabauta ni sa dodonu mo ni veivutunitaka na nomuni ivalavala ca ka biuta tani sara, ka vakamalumalumutaki kemuni ena mata ni Kalou; mo ni kerea ena yalodina me vosoti kemuni; ia kevaka ko ni sa vakabauta na ka kece oqo, mo ni vakayacora sara vakakina.”32
Sa ikoyakoya tiko ga na Kalou ena noa, nikua, ka tawamudu, ia o keda e sega. Ena veisiga yadua, sa noda na bolebole me da yacova yani na kaukauwa ni Veisorovaki me rawa kina ni da veisau dina sara, ka yaco me vaka na Karisito, ka me ganiti keda na isolisoli ni bula vakacerecerei ka laki bula tawamudu kei na Kalou, Jisu Karisito kei na noda matavuvale.33 Ena vuku ni kaukauwa, galala, kei na isolisoli ni kosipeli oqo, me vakavinavinakataki ga na Kalou!
Au vakadinadinataka ni bula tiko o Koya, ni o Jisu na Karisito, ka ni sai koya oqo na Nona Lotu, sa vakalesui mai ena gauna oqo me mai rawati kina na kena icavacava vakalou. Eda liutaki nikua mai vei Peresitedi Thomas S. Monson, o koya eda lomana ka tokona mai vu ni yaloda, ka da tokoni rau talega na nona daunivakasala kei iratou na iApositolo Le Tinikarua ni ra parofita, daurairai, ka dauvakatakila. Au vakadinadinataka ena yaca tabu i Jisu Karisito, emeni.