Elder Robert C. Gay
Ena Vitusagavulu
Ena nona ilesilesi ena Lotu, e dau vakatoka vakalevu o Elder Robert Christopher Gay na itukutuku i Jisu Karisito me “dua na kosipeli ni veisereki.”
“Oqori na veika keirau dau raica ka sotava tu ena neirau bula taucoko,” e kaya o Elder Gay, ka tukuni rau tiko kei na watina, o Lynette Nielsen Gay. “Eda dau qarava na Kalou ni veisereki, vakayalo, vakayago, vakavakasama, kei na lomada. Ena Veisorovaki nei Karisito, sa rawa ni laveti kina na noda icolacola. Eda kunea mai Vua na igu, na vakacegu, kei na loloma soli wale e gadrevi me da sotava kina na veivakatovolei ni bula ka lesu tale vei Tamada Vakalomalagi.”
E rawata o Elder Gay na vakacegu levu duadua mai na veiqaravi raraba erau sa vakalougatataki kina kei Sisita Gay me rau solia, ki na veivanua tani ka vakakina ena veivanua voleka e vale. Me vakaoqo, ni se bera ka vakakina ni sa oti na nodrau veiqaravi vakaperesitedi ena Tabana ni Kaulotu na Accra Ghana mai na 2004 ki na 2007, erau a cakacaka kei Sisita Gay ena veikorokoro vaka-Aferika kei na veivanua tale eso me tara na koronivuli kei na vanua ni veiqaravi vakavuniwai ka vukea na kena vulici na vosa vakavalagi kei na parokaramu ni soli dinau vakabisinisi lalai. Na veisoqosoqo eso erau veivuke ena kena tauyavutaki vata kei ira tale eso na itokani sa veivuke ena kena laveti na nodra bula e milioni na dravudravua e veiyasai vuravura.
A sucu ena Sepiteba ni 1951 mai Los Angeles, California e Amerika, vei rau o Bill kei Mary Gay, a vakaveikilaitaki vua na gone yalewa me na qai watina, mai vua e dua na nona itokani mai koronivuli ka rau qai vukea e muri me curu ki na Lotu. Erau a vakamau ena Valetabu na Los Angeles California ena Epereli ni 1974 ka vitu na luvedrau.
A rawata o Elder Gay e dua na koroi ni bejila mai na University of Utah kei na dua na doketa mai na Harvard University, ka a vakavulica talega kina na ikonomiki.
A vakaitavi ena caka bisinisi ena sivia na 25 na yabaki, sa cakacaka oti ena veivanua tani o Elder Gay me vakacuruilavo ka vakatubu bisinisi.
Ena gauna e kacivi kina ki na iMatai ni Kuoramu ni Vitusagavulu, a veiqaravi voli vaka-Vitusagavulu ni iWasewase ena iWasewase na North America Southeast. Me ikuri ni nona veiqaravi vakadaukaulotu ki Spain mai na 1971 ki na 1973, sa veiqaravi oti talega o Elder Gay vakadaunivakasala ni bisopi, lewe ni matabose e cake, iliuliu ni ilawalawa ni bete levu, qasenivuli ni iVunau ni Kosipeli, iliuliu ni kaulotu ena tabanalevu, ka peresitedi ni Cauravou ena tabanalevu.