Na Veilesoni Uasivi
Sa noqu masu kau nuitaka ni da na tomana tiko noda colata vakaturaga na noda icolacola ka dolele yani kivei ira era maliwai keda ka ra vakaleqai tu.
A vakalougatataki tu na neitou matavuvale ena 20 na vula sa oti, ena gauna vinaka ni nona mai tiko edua na gone dramidrami ituvaki duatani.
Na makubui keirau, a sega ni bulabula vinaka o Paxton lailai ena nona a sucu mai, sega ni taucoko nona ivakarau ka duidui kina mai na drau na milioni tale eso. Me baleta na luvei keirau yalewa kei na turaga watina, a sega ni namaki, na ituvaki ni veisau ni bula ka tekivu yacovi rau ena nona a sucu o Paxton. A yaco me dua na veivakatovolei dredre na veika a sotavi oqo ena kena vulici na lesoni uasivi ka semati ki na tawamudu ni gauna sa bera mai.
A vakatavulica vakaoqo o Elder Russell M. Nelson lomani ka se qai vosa oti ga oqo vei keda:
“Vakawasoma na kena sega ni kilai na vuna, eso na tamata era sucu ena yago e vakaiyalayala na veika e rawata rawa. Eso beka na tiki ni yagodra e sega ni taucoko tu. E sega beka ni cakacaka vakavinaka na gacagaca vakayago. Kei na yagoda taucoko e rawa me yaco me tauvimate ka na mate. Ia, sa isolisoli uasivi sara na yago. …
“E sega ni gadrevi meda taukena na taucoko ni yago me rawa kina noda yaco meda vaka na Kalou. Na kena dina, eso vei ira na tamata cecere vakayalo e kavoro rawarawa se malumalumu na yagodra. …
“Ia ena qai yaco na gauna ‘me rau … cokotivata tale na yago kei na yalo … ena kena itutu dina; ia ena semati vata tale na veitiki ni yago me vaka e liu’ (Alama 11:43). Ia, me baleta na Veisorovaki i Jisu Karisito, e rawa meda yaco meda vakataucokotaki mai Vua.”1
Kivei kemuni kece e tu nomuni bolebole, nuiqawaqawa, rarawa se na yalobibi me baleta e dua o dau vakamareqeta, mo kila oqo: ena loloma sega ni vakaiyalayala kei na yalololoma tawamudu, na Kalou ka Tamada Vakalomalagi e lomani koya e vakararawataki ka lomani iko o Koya!
Eso e rawa mera taroga ena nodra sotava na rarawa vakaoqori, e rawa vakacava vua na Kalou Cecere me vakatara me yaco na veika oqo? Ni oti o ya na taro sega ni tarovi rawa, na cava na vuna e yaco kina vei au na ka oqo? Na cava na vuna e dodonu kina meda sotava na tauvimate kei na veika e veivakaleqai se vakavuna nodra mate na lewe ni matavuvale vakamareqeti ni ra se bera ni qase se vakalevutaka nodra veiyabaki ni mosi? Na cava e vakavuni mosi ni yalo?
Ena veigauna oqo e rawa meda vakasamataka na ka sa navuci tu me rawati kina na bula ka bulia na Tamada Vakalomalagi. Na ituvatuva oqori, ena kena vakaraitaki mai ni se bera na bula vakavuravura, vakauqeti keda kece meda kaila ena reki.2 Me vakarawarawataka na kena tukuni, sa vakarautaki ena bula oqo na bula vakacerecerei tawamudu, kei na kena cakacakataki oqori e kena ibalebale na veitarogi kei na veivakatovolei. E sa dau kena ivakarau tu, ka sega ni dua me drobula mai kina.
Vakadinata na lewa ni Kalou sa ikoya na tiki bibi ni noda bula vakayago. Ena vakabauti Koya, eda ciqoma na kaukauwa ni Veisorovaki i Karisito ni veigauna e levu kina na vakatataro me baleta na mosi e sotavi ena bula vakavuravura ka lailai na kena isau.
Ni oti Nona Tucaketale, ena nona veisiko vei ira na kai Amerika, na noda i Vakabula o Jisu Karisito, a dolele yani kivei ira kece ena veisureti oqo:
“Sa tiko li eso na nomudou tauvimate? Dou kauti ira mai. Dou kauti ira mai na lokiloki, na mataboko, na gera, na mudu, na vukavuka, ko ira sa malai, ko ira na didivara kei ira kece ga sa tauvimate tu. Dou kauti ira mai kau na vakabulai ira, niu sa lomani kemudou; io sa vuabale sara na noqu loloma. …
“Ia ni sa cavuta oti na vosa oqo, era sa kauti ira mai na tauvimate kei ira sa rarawa tu, ko ira na lokiloki, na mataboko, na galu kei na veimataqali mate kece ga; a sa vakabulai ira kece ga ko Koya.”3
Na kaukauwa cecere e rawa me kunei ena vosa “o ira kece … era lako yani”—o ira kece, na turaga kei na marama. Eda sotava kece na veibolebole. Qai tarava na malanivosa: “kei na veimataqali mate kece ga.” O ikeda kece e rawa meda kila, se vakacava?
Sega ni dede na nona sucu mai o Paxton talei, keitou kila ni na vakalougatataki keitou ka vakavulica vei keitou na veilesoni uasivi na Tamada Vakalomalagi. Ena neirau tabaka kei tamana na uluna lailai ena kena imatai ni vuqa na veivakalougatataki vakamatabete, a lako mai noqu vakasama na ikaciwa ni wase ni Joni: “me vakatakilai ga na cakacaka ni Kalou ena vukuna.”4
Na cakacaka ni Kalou era sa vakatakilai vakaidina sara ga mai vei Paxton.
Eda sa vulica tiko na yalovosota, vakabauta, kei na vakavinavinaka mai na ilumu kaukauwa ni veiqaravi, na auwa sega ni wiliki rawa ena levu ni yalokatakata, wainimata ni loloma, kei na masumasu kei na ivakaraitaki ni loloma baleti ira na daulomani era gadreva na veivuke, vakabibi vei Paxton kei na nona itubutubu.
A kaya o Peresitedi James E. Faust: noqu peresitedi ni iteki niu se gonetagane: “Au vakavinavinaka vakalevu vei ira na itubutubu dauloloma ka ra vakamaravutaka ka lomadei ena nodra colata ka valuta nodra yaluma kei na rarawa me baleta e dua na gonelailai ka a sucu vata mai se a tubu vua e dua na malumalumu bibi vakavakasama se vakayago. Na rarawa bibi oqo e vakawasoma na kena tomani tiko e veisiga yadua, sega na vakacegu, ena gauna ni nodrau bula na itubutubu se na gonelailai. Vakawasoma, na nodra gadrevi na itubutubu me ra veisusugi vakauasivi cake sara kei na veimaroroi tawamudu, ena siga se na bogi. E vuqa vei ira na tina era a veiqaravi vakayago ka vakayalo ena vuqa na veiyabaki, ka solia vakatabakidua na vakacegu kei na veivukei vei ira na luvedra gonelailai.”5
Me vaka e vakamacalataki ena ivola i Mosaia, eda sa vakadinadinataka na loloma savasava ni i Vakabula ka soli ki na matavuvale nei Paxton, ni loloma sa soli vei ira taucoko na tamata: “A sa vakamamadataki na icolacola kece sa vakataqari vei Alama kei ira na wekana; a sa vakaukauwataki ira na Turaga me ra colata rawa na nodra icolacola, ka ra soli ira ena yalomarau kei na yalo vosota ki na nona lewa na Turaga.”6
Ena dua na bogi nona se gone lailai o Paxton, keitou a tiko ena vanua era qaravi vakatabakidua kina vakavuniwai na gone sucuvou ena Primary Children’s Medical Center totoka e Salt Lake City, Utah, ka kurabuitaka tiko na veiqaravi, taucoko ni vakaitavi mai vei ira na vuniwai, na nasi kei ira na dauveiqaravi. Au tarogi luvequ yalewa se me keitou sauma vakacava na ka oqo ka kilakila mada se vica na kena isau. A vakatututaka e dua na vuniwai keirau tu veivolekati ni sa ‘rui lailai’ sara na isau au nanuma ka ni isau ni veiqaravi vei Paxton lailai ena levu cake sara mai na noqu vakanananu. Keitou vulica ena gauna o ya ni levu na isau ni veiqaravi e vakayacori tiko ena valenibula oqo e kovuta na isolisoli ni loloma soliwale vaka gauna kei na isolisoli vakailavo mai vei ira tale eso. E vakayalomaluataki au na nona vosa ena gauna au vakasamataka kina na kena talei na gonelailai oqo kivei ira era vakaraici koya tu vakavinaka.
Au nanuma lesu e dua na ivolanikalou ka dau matau vei ira na daukaulotu ni vaka me vou mai na kena ibalebale: “Raica sa ka talei ena mata ni Kalou na tamata kece ga.”7
Au tagi ena noqu vakananuma na loloma sega ni vakaiyalayala nei Tamada Vakalomalagi kei na Luvena Lomani, o Jisu Karisito, me baleti keda vakayadua kece sara, ena noda vulica ena dua na sala kaukauwa na cava na yaga ni dua na tamata, vakayago ka vakayalo, kivua na Kalou.
Eratou vulica na matavuvale nei Paxton ni vakavolivoliti iratou na agilosi dauveiqaravi vakalomalagi ka vakavuravura sega ni wiliki rawa. Eso era lako galugalu yani ni gadrevi na veivuke ni oti era lesu lo tale. Eso tale era vakarautaka na kakana, sava isulu, veiusa ikoronivuli ka mai veibiu lesu tale ivale, qiri mai ni veivakauqeti, ka vakabibi na masulaki Paxton. E dua tale na lesoni bibi sa vulici oqori: Kevaka o raica e dua ni sa luvu tiko, o na taroga beka kevaka era gadreva na veivuke—se ena vinaka cake beka mo lade yani ka vueti ira mai na wai titobu? E dina ga ni dau wasoma na kena soli, na veivuke me vaka, “Tukuna vei au kevaka e rawa meu veivuke” ia oqori e sega dina sara ga ni veivuke.
Eda tomana tiko na noda vulica na bibi ni kena yaga noda kidava tiko ka kauwaitaka nodra bula o ira era wavokiti keda, sega wale ga na kena vulici na bibi ni soli veivuke ia na reki vakaitamera e lako mai ena nodra vukei eso tale.
O Peresitedi Thomas S. Monson lomani, e dua na ivakaraitaki totoka vakaoti ena nodra vukei o ira era vakalolomataki, ena nona a kaya: “Na Kalou me vakalougatataki ira kece era tovolea me ra qarauni ira na nodra itokani, ena isolisoli ni veivuke vei ira na vakaleqai, ka ra tovolea ena veika vinaka kece sara e tu vei ira me ra vakavinakataka cake kina na vuravura. O sa bau kidava ni tamata vakayadua vakaoqori e mamarau cake na kedra irairai? E vakataudeitaki na nodra veikalawa yadua. Era rairai lasa ka vakacegu na yalodra … baleta ni sega ni rawa vua e dua me vakaitavi ena vukei ira tale eso ka sega ni vakalougataki vakaitamera vakaikoya.”8
E dina ga ni da na sotava na veivakatovolei, veitemaki, yalani noda rawa ka, mosi ni yalo kei na ivakarau kece ni veivakalolomataki, na noda i Vakabula, dauveikauwaitaki, dauloloma ena tu vata kei keda ena veigauna taucoko. A yalataka o Koya:
“Au sa sega ni laivi kemudou mo dou luveniyali: au na lako mai vei kemudou. …
“Au sa laiva vei kemudou na vakacegu, au na solia vei kemudou na noqu vakacegu: au sa sega ni solia vei kemudou, me vaka sa solia ko vuravura. Me kakua ni rarawa na yalomudou, se rere.”9
Eda sa vakavinavinaka vua na Tamada mai Lomalagi me baleta na noda Paxton veivakurabuitaki. Sa vakaraitaka mai vua na Turaga na Nona cakacaka ka tomana me vakavulici keda ena lesoni yaga vakalevu, tabu, ka uasivi.
Au na gadreva meu tinia ena vosa mai na dua na serenilotu lomani:
Meda vala tiko cava mai nai valu;
Me da marau! Me da marau!
Sala vakatui me na rawati tu;
Tokara nai sala ni qaqa.10
Kemuni na taciqu kei na ganequ, sa noqu masu kau nuitaka ni da na tomana tiko noda colata vakaturaga na noda icolacola ka dolele yani kivei ira era maliwai keda ka ra vakaleqai tu ka ra gadreva me ra vukei ka vakayaloqaqataki. Meda vakavinavinakataka vakayadua na Kalou ena Nona veivakalougatataki ka vakavouya na noda yalayala kivua na Tamada mai Lomalagi, ena veiqaravi ena yalomalua kivei ira na Luvena. Ena yaca i Jisu Karisito, emeni.