Ia Ena Tuberi Iratou E Dua na Gonelailai
O ira na turaga kei na marama veiwatini e dodonu me ra kila ni nodra imatai ni ilesilesi—ka ra na sega vakadua ni vagalalataki mai kina—sa ikoya kivei rau vakayadua ka qai tarava vei ira na luvedrau.
Ena vica na yabaki sa oti ena dua na bogi batabata ena dua na ikelekele ni sitimanivanua e Japani, au rogoca e dua na isabi ena katuba leka ni noqu motoka vakaimocemoce. A duri tu e dua na gonetagane curumi batabata ka dara tu e dua na sote madra qai vesuka wavoki tu na galegalena vuce ena dua na tikinisulu duka. E robota tu na uluna na karokaro. A taura tu e dua na tini veveka kei na dua na isevuni, ka ivakaraitaki ni luveniyali daukerekere. Niu saga tiko meu dolava yani na katuba meu solia vua eso na ilavo, sa biubiu yani na sitimanivanua.
Au na sega ni guilecava rawa na gonetagane lailai waloloi o ya ka duri cake tu ena liliwa, ka taura cake tu e dua na tini lala. Au na sega tale ga ni guilecava rawa na noqu vakila niu sega ni rawa ni veivuke ena kena sa gole yani vakamalua na sitimanivanua ka biuti koya me tucake tu ena ikelekele o ya.
Ena vica na yabaki sa oti yani mai Cusco, e dua na siti e cake ena Veiulunivanua na Andes e Peru, keirau a laki vakayaco soqoni ni sakaramede kei Elder A. Theodore Tuttle ena dua na rumu qiqo balavu, ka dua na kena katuba e tadola tu yani ki gaunisala. E sa bogi, ia ena gauna sa vosa kina o Elder Tuttle, a curu mai ena katuba, e dua na gonetagane lailai yabaki ono beka. A dara wale tu ga e dua na sote isuwai e yaco sara e duruna.
Ena yasai keirau imawi e tu kina e dua na teveli lailai ka tu kina e dua na veleti madrai ni sakaramede. A raica na madrai na luveniyali walokai oqo ka sudra vakamalua yani ki lalaga me yacova yani. A voleka sara ga me yacova yani na teveli ena gauna a raici koya kina e dua na marama. Ena dua ga na moi ni uluna, a vakatalai koya tani yani ki na loma ni bogi. E kudru na lomaqu.
Oti a lesu tale mai na gonetagane lailai oqo. A vakaraviravi muria yani na lalaga, ka vakaraici au tiko yani kei na madrai. Ena gauna sa volekata yani kina na vanua ka rawa me raici koya mai kina na marama o ya, au a dodoka yani na ligaqu, ka cici sara mai vei au. Kau a tenei koya sara.
Ka qai, me vaka e dua na ivakatakarakara, au laveti koya yani ena idabedabe nei Elder Tuttle. Ni oti na masu ni suka, a cawadru yani ki tautuba ena bogi na gonetagane lailai walokai oqo.
Ena noqu lesu yani ki vale, au a talanoataka vei Peresitedi Spencer W. Kimball na veika au a sotava. A tarai koya sara vakalevu ka tukuna vei au, “Ko a tenea tiko e dua na kawatamata.” A kaya vakavica vei au, “Ena qai vakaibalebale vakalevu cake sara vei iko mai muri na ka o sa mai kila ka yaco oqori.”
Ena noqu sa mai sikova na veivanua vaka Latini e Amerika ena voleka ni 100 na gauna, au vakasaqara tiko na gonetagane lailai o ya e matadra na tamata. Au sa qai kila oqo na cava e vakaibalebaletaka o Peresitedi Kimball.
Au a sotava e dua tale na gonetagane sautaninini tu ena gaunisala e Salt Lake City. E sa bogi sara ena dua tale na bogi batabata ni vulai liliwa. Keitou a biubiu mai ena dua na vakayakavi ni Siganisucu ena dua na otela. Era lako sobu mai na gaunisala e lewe ono se walu na gonetagane kosakosa. E dodonu mera sa tiko kece e vale me vaka ni sa rui draki batabata.
E dua na gonetagane e sega ni vakote. A ladelade wavoki tiko vakatotolo me vakatakatari koya. A yali sobu yani ena yasa ni dua na gaunisala, sega ni vakabekataki ki na dua na vale makawa lailai, kei na dua na idavodavo e sega na kena siti me vakatakatari koya.
Ena bogi, noqu dre cake na siti meu tutuvi kina, au masulaki ira e sega nodra idavodavo katakata mera gole yani kina.
Au a tiko mai Osaka, Japani, ni mai cava na iKarua ni iValu Levu. Sa benuci na siti kei na gaunisala ena kakavuruvuru ni buloko, duka, kei na qara ni bomu. E dina ga ni levu na vunikau era sa boloraki laivi, e vica vei ira e se tu ga ka sa tayana na tabadra se tolodra ka vo wale toka ga e so na tabana lalai vata kei na drauna.
E dua na goneyalewa lailai ka dara tu e dua na kimono mata madra, a vakaogai tiko ena nona beti drau ni sikamoa dromodromo tiko me dua na ivutusenikau. E sega ni kidava tiko na gonelailai na veika ni veivakarusai e wavoliti koya tu ena nona qasiva tiko yani na benu me rawa ni vakuria na draunikau vou ki na nona ikumukumuni. Sa yaco me mai kunea ka totoka duadua ka mai vo toka yani ena nona vuravura. E rairai dodonu beka meu kaya ni sa ikoya na tiki totoka ni nona vuravura. Ia niu vakasamataki koya e vakalevutaka cake na noqu vakabauta. E dua na ivakaraitaki ni inuinui na gonelailai oqo.
E vakatavulica o Momani ni “ko ira na gone lalai era sa bula vei Karisito”1 ka sega ni gadreva na veivutuni.
Ni voleka ni mai tavuki na senijuri sa oti, e rua na daukaulotu rau a veiqaravi tiko ena veiulunivanua ena ceva kei Amerika. Ena dua na siga, mai na dua na delana, e rau raici ira kina na tamata ni ra soqoni vata tiko ena dua na vanua galala e ra sobu sara. O ira na daukaulotu e sega ni wasoma me levu e rawa ni ra lai vunau kina, e rau sa mani gole sobu sara ki na vanualala oqori.
A luvu e dua na gonetagane lailai, ka me sa na bulu. Erau a sa talatala na nona itubutubu “me mai vosa” e dua na italatala ena veibulu nei luvedrau tagane. E rau suka imuri na daukaulotu ena nona sa vakanamata na italatala dauvunau wavoki oqo kivei rau na itubutubu yalorarawa ka tekivuna nona vunau. Kevaka beka me rau namaka tiko na itubutubu oqo me rau ciqoma na vakacegu mai vua na italatala oqo, ia e sa na ka ni rarawa dina sara vei rau.
A vosavosataki rau vakaca sara ena nodrau sega ni raica me a papitaiso na gonetagane lailai. Ena nodrau a lokuyarataka tu mai ena vuku ni dua na ka se dua tale, ia oqo sa mai bera. A tukuna vakadodonu sara ga vei rau ni sa lako ki eli na nodrau gonetagane lailai. Ka sa nodrau cala. E rau na beitaki me baleta na nona na vakararawataki tawamudu.
Ni sa mai cava na lotu ka sa ubi na ibulubulu, rau a laki raici rau na itubutubu yalorarawa na italatala qase. “Keirau na dauniveiqaravi ni Turaga,” e rau kaya vei tinanigone, “ka keirau kauta tiko mai e dua na itukutuku vei kemuni.” Ena nodrau sa vakarorogo na itubutubu yaloluluvu, e rau sa wiliwili mai na ivakatakila o irau na italatala qase ka rau wasea nodrau ivakadinadina ena kena vakalesuitale mai na idola me baleta na nodra vakabulai ruarua o ira na bula kei ira na sa mate.
E tu eso noqu loloma vua na dauvunau o ya. A cakava ena kena uasivi duadua e rawa vata kei na levu ni rarama kei na kila ka e tu vua. Ia e levu cake sara na ka e tu e dodonu ka rawa vua me a wasea. E tu dina na taucoko ni kosipeli.
Era lako mai na italatala qase mera dauniveivakacegui, mera qasenivuli, mera dauniveiqaravi ni Turaga, mera dauvunau ni kosipeli i Jisu Karisito.
O ira na gonelalai oqo kau vosa tiko kina era matataki ira kece na luvei Tamada Vakalomalagi. “Raica na gone era sa nona isolisoli na Kalou: ka … sa kalougata na tamata sa sinai kina na nona taga ni gasau.”2
Na kena buli na bula sa ikoya e dua na itavi cecere ni dua na veiwatini. Mo dua na itubutubu kilikili ka nuitaki sa ikoya e dua na bolebole cecere duadua ni bula vakavuravura oqo. E sega ni dua na tagane se yalewa e rawa me vakasucuma duadua na gonelalai. A nakiti ni o ira na gonelalai me rua nodra itubutubu—dua na tama ka dua na tina. E sega tale ni dua na ituvatuva se kena icakacaka e rawa me sosomitaka na ka oqo.
Ena dua na gauna makawa sara a kaya tagitagi vei au e dua na marama ni a vakacala-ka bibi sara vata kei na nona itau cauravou ena nona a se gonevuli ena koliji. A veivosakitaka me vakalutuma na gone. Ena kena gauna donu rau sa tauritutu ka rau vakamau ka so tale na luvedrau gonelalai. A kaya vei au na nona vakararawataki ena gauna oqo ena nona raica na nona matavuvale, o ira na luvena rairai totoka, ka raica ena nona vakasama na lala ni nona itutu na gone sa mai yali o ya.
Kevaka e rau kila na veiwatini oqo ka vakayagataka na Veisorovaki, e rau na kila ni veika e rau sotava o ya kei na mosi e semati rau vata kina e rawa me bokoci. E sega ni dua na mosi me na tawamudu. E sega ni ka rawarawa, ia na bula e sega ni kena ibalebale me rawarawa se veiganiti. Na veivutuni kei na inuinui tawamudu e kauta mai na veivosoti ena dau kilikili kaya na kena dau sasagataki.
E dua tale na veiwatini gone e rau tukuna vei au ena vosa tagitagi ni rau se qai lesu sara ga mai vua e dua na vuniwai ka tukuna vei rau ni na sega ni rawa me rau vakaluveni. A kavoro na utodrau ena itukutuku o ya. E rau kurabui ena noqu kaya vei rau ni rau se kalougata tiko ga. E rau lomatarotarotaka se cava na vuna au kaya kina e dua na ka vaka o ya. Au kaya vei rau ni nodrau ituvaki e vakalou ka vinaka cake sara mai na so na veiwatini ka rawa me ra itubutubu ia era saqata ka levea ena kocokoco na itavi o ya.
Au a kaya vei rau, “Ni ka vinaka mada ga ni drau gadreva na vakaluveni, ka na rawati vakalevu na gagadre oqo ena nomudrau bula oqo kei na kena e tarava mai baleta ni na vakarautaka na bula vinaka vakayalo kei na vakasama. Sa na qai yaco, mo drau kune vinaka sara baleta ni drau vinakata na vakaluveni ka sega ni drau rawata rawa, ni vakatauvatataki kei ira era rawa ni vakaluveni ka ra sega ni vinakata.”
Eso tale na veiwatini era sega tu ni vakamau ka ra sega kina ni vakaluveni. Eso, me baleta eso na ituvaki ka ra sega ni cakava rawa e dua na ka, era susu gone me vaka na tina dua se tama dua. Oqo era ka vakagauna ga. Me vaka ena ituvatuva ni tawamudu—sega ni wasoma ena bula vakavuravura—ena dau vakayacori na gagadre kei na inuinui savasava.
“Kevaka eda sa vakanuinui me yaga vei keda na Karisito ena bula oqo, eda sa qai vakaloloma vakalevu cake vei ira kece ga na tamata.”3
Na itinitini ni inaki ni itaviqaravi kece ni Lotu sa ikoya me ra marau e vale e dua na turaga kei na marama watina kei ira na luvedrau, taqomaki ena ivakavuvuli kei na lawa ni kosipeli, vauci vinaka ena veiyalayalati ni matabete tawamudu. O ira na turaga kei na marama veiwatini e dodonu me ra kila ni nodra imatai ni ilesilesi—ka ra na sega vakadua ni vagalalataki mai kina—sa ikoya kivei rau vakayadua ka qai tarava vei ira na luvedrau.
E dua na ka cecere e kunei ena bula vakaitubutubu sa ikoya ni da vulica e levu cake na ka me baleta na veika bibi, mai vei ira na luveda me vakatauvatani mai vei ira na noda itubutubu. Eda yaco meda raica na dina ena parofisai nei Aisea “ia ena tuberi iratou e dua na gone lailai.”4
E Jerusalemi, “A sa kaciva mai e dua na gone lailai ko Jisu, ka vakatura ena kedra maliwa,
“Ka sa kaya, Au sa kaya vakaidina vei kemudou, Kevaka dou sa sega ni saumaki mai, ka yaco me vaka na gone lailai, dou na sega sara ni curu ki na matanitu vakalomalagi.
“Ia ko koya sa vakamalumalumutaki koya me vaka na gone lailai oqo, ko koya ga sa levu cake ena matanitu vakalomalagi.”5
“A sa kaya ko Jisu, Laivi ira na gone lalai, ka kakua ni tarovi ira, ni ra sa lako mai vei au; ni sa vakataki ira na lewe ni matanitu vakalomalagi.
“A sa tabaki ira ena ligana ko koya, ka qai lako tani mai kea.”6
Eda wilika ena i Vola i Momani na veisiko nei Jisu Karisito ki na Vuravura Vou. A vakabulai ira ka vakalougatataki ira na tamata ka vakarota ni o ira na gone lalai e dodonu mera kau mai Vua.
E volaitukutukutaka o Momani, “A ra sa kauti ira mai na gone lalai vei Jisu ka vakatikori ira vakavolivoliti Koya, a ra sa suka ki muri na lewe vuqa mera lako kece ki liu na gone lalai.”7
A qai kaya vei ira na lewe vuqa mera tekiduru. Ni ra sa tu vakavolivoliti Koya na gone lalai, a tekiduru na i Vakabula ka masu vua na Tamada mai Lomalagi. Ni oti na masu, a tagi na iVakabula, “a sa keveti ira yadua na gone lalai ka vakalougatataki ira ka masulaki ira vei Tamana.
“A sa tagi ni sa vakalougatataki ira oti.”8
Au rawa ni kila na veika e vakila na i Vakabula me baleti ira na gone lalai. E sa levu sara na ka me vulici mai na Nona ivakaraitaki ni nodra masulaki, vakalougatataki, ka vakavulici “ira na nomudou lalai.”9
Au ikatini ni lewe 11 na gone lalai ena dua na matavuvale. Ena veika au kila, e sega ni dua vei rau na tamaqu se tinaqu me veiqaravi ena dua na ilesilesi bibi ena Lotu.
E rau a veiqaravi ena yalodina na neitou itubutubu ena nodrau ilesilesi bibi—vakaitubutubu. A veiliutaki na tamai keitou ena bula savasava ena neitou vuvale, sega vakadua ena cudru se rere. Kei na ivakaraitaki kaukauwa ni tamai keitou a vakalevutaki mai na ivakasala malumu nei tinai keitou. Na kosipeli sa ikoya na veivakauqeti kaukauwa ena neitou bula vakayadua na lewe ni matavuvale na Packer kei na itabatamata tarava kei na kena e tarava, ka tarava tale, ka yacova sara o koya keitou raica rawa.
Au nuitaka niu na lewai meu tamata vinaka me vakataki tamaqu. Ni bera niu rogoca na vosa oqori “e vinaka” mai vei Tamaqu Vakalomalagi, au nuitaka meu na rogoca taumada mai vei tamaqu vakavuravura.
Au dau lomatarotarotaka vakavuqa se cava na vuna au kacivi kina meu dua na iApositolo oti qai Peresitedi ni Kuoramu ni Le Tinikarua e dina ga niu lako mai ena dua na vuvale ka rawa me vakatokai kina o tama me luluqa vakalotu. Au sega duadua ga ni lewe ni Le Tinikarua e ganiti na ivakamacala o ya.
Me kena itinitini au rawa ni raica ka kila ni rairai sai koya beka o ya na vuni noqu kacivi. Kau rawa ni kila na vuni veika kece sara eda cakava ena Lotu, sa gadrevi meda vakarautaka na sala me vaka na iliuliu, me dau dua nodra gauna vata na itubutubu kei ira na gone lalai me vaka na matavuvale. E dodonu mera qarauna na iliuliu ni matabete me yaco na Lotu me ka vakamatavuvale.
E vuqa sara na ka me baleta na bulataki ni kosipeli i Jisu Karisito e sega ni rawa me vakarautaki ena ka oqori ni sa wili se volai ena ivolatukutuku ni tiko rawa. Eda vakaogai keda ena veivale kei na tuvailavo kei na parokaramu kei na kena icakacaka. Ni da cakava oqori, sa rawa sara ga meda raibaleta na inaki dina ni kosipeli i Jisu Karisito.
E dau vakawasoma me dua e lako mai vei au ka kaya, “Peresitedi Packer, ena sega beka ni vinaka kevaka … ?”
Au dau tarovi ira ka kaya e sega, baleta niu siqema na ka ena salamuria mai ni na dua na itaviqaravi vou se parokaramu ena vakuria na icolacola ni gauna kei na icolacola vakailavo ena matavuvale.
Sa gauna tabu na gauna vakamatavuvale ka dodonu me taqomaki ka dokai. Keimami sa vakamasuti kemuni na noda lewenilotu mo ni vakaraitaka na yalodina ki na nomuni veimatavuvale.
Ena neirau se qai vakamau ga, keirau nakita vakaveiwatini me keirau na ciqomi ira na gone lalai era sucu vei keirau me lako vata kei na itavi e basika mai ena nodra sucu kei na nodra susugi. Sa yaco mai na gauna, era sa dui vakamatavuvale vakataki ira.
Vakarua ena neirau bula vakamau, ena gauna ni nodrau a sucu e rua na luvei keirau tagane lalai, sa kaya kina vei keirau e dua na vuniwai, “vaka vei au drau na sega ni via maroroi koya qo.”
Ena gauna ruarua a vakavuna vei keirau me keirau sauma lesu ni keirau na solia neirau bula ke gadrevi me bula tiko kina na luvei keirau gone tagane lailai. Ena gauna ni lomasoli oqori, keirau kidava ni yalodina vakaoqori e tautauvata ki na veika e vakila na Tamada Vakalomalagi me baleti keda vakayadudua sara. Sa dua dina na vakasama vakalomalagi.
Ni sa mai dromu tiko oqo na neirau matanisiga, keirau sa kila ka vakadinadinataka vata kei Sisita Packer ni sa rawa me tawamudu na neirau matavuvale. Ena neirau talairawarawa ki na ivakaro ka bulataka na taucoko ni kosipeli, keirau na taqomaki ka vakalougatataki. Me baleti ira na luvei keirau kei na makubui keirau kei na makubui keirau vakarua, sa neirau masu me o ira vakayadua na neirau matavuvale era na tubu cake tiko mai me ra na dau yalodinataki ira na lalai vakamareqeti o ya.
Kemuni na tama kei na tina, ena dua tale na gauna o na roqota kina e ligamuni e dua gone ena sucu vou mai, sa rawa me nomuni e dua na raivotu e lomamuni me baleta na veika vuni kei na inaki ni bula. Ko ni sa na qai kila vakavinaka cake kina na vuni kena vaka kina oqo na Lotu ka vakakina kei na matavuvale sa yavu ni isoqosoqo ena gauna oqo ki na veigauna tawamudu. Au sa vakadinadinataka ni sa dina sara na kosipeli i Jisu Karisito, ka sa ituvatuva ni matavuvale na ituvatuva ni veivueti ka sa dau vakatokai tu me ituvatuva ni bula marau. Au sa masuta kina na Turaga me ra na bula kalougata na veimatavuvale ena Lotu, o ira na kena itubutubu kei ira na gone, ka me toso ki liu na cakacaka oqo me vaka sa lewa na Tamada. Sa noqu ivakadinadina oqo ena yaca i Jisu Karisito, emeni.