Linda K. Burton

Peresitedi Raraba ni iSoqosoqo ni Veivukei

Ni yabaki tinivakacaca, a qai kila vakasauri ena dua na soqoni ni Lotu mai Christchurch, Niu Siladi o Linda Kjar Burton. “Au kila ni dina na kosipeli,” e nanuma lesu o koya. “Au qai kila talega niu a sa dau kila tu ga mai.” Na ivakadinadina oqori ena tokoni koya ena gauna oqo ni veiqaravi vakaperesitedi raraba ni iSoqosoqo ni Veivukei.

A sucu mai Salt Lake City, Utah e Amerika vei rau o Marjorie C. kei Morris A. Kjar, se qai yabaki 13 o Sisita Burton ena gauna a biuti Utah kina na nona matavuvale me laki vakatulewa o tamana ena Tabana ni Kaulotu na New Zealand South. O Sisita Burton—na ikarua vei iratou e ono na gone—a vuli ena Church College of New Zealand ka dau veimaliwai kei ira na gone yabaki tinivakacaca mai na Pasivika. A lesu tale ki Salt Lake City ka kauta vata kei koya sega walega na nona lomana na duidui itovo vakavanua ia vakauasivi cake vua na Turaga kei na nona matavuvale.

A vuli tiko ena University of Utah o Sisita Burton ena gauna a sota ka vakamautaki Craig P. Burton kina ena Okosita ni 1973 ena Valetabu e Salt Lake. Erau mani lewa na veiwatini me rau kakua tale ni vakadaroya na nodrau tekivuna e dua na matavuvale; na imatai vei ira na ono na luvedrau a sucu voleka ni dua na yabaki mai na gauna oya.

Ni rau cakacaka vata kei na watina, a rawa vua me tiko e vale kei ira na gone ni cakacaka na watina ena tabana ni volitaki iyauqaqa. Na dredre vakailavo taumada sa vakavulici rau na veiwatini me rau vakanamata ki na veisiga ni mataka ena yalodei “baleta ni keirau kila ni keirau sa vakayacora e dua na ka dredre ena veivuke ni Turaga,” e vakamacalataka o koya.

Eratou dau lako na matavuvale ki na veivakacagicagi rawarawa ka ra dau marautaka na nodra tiko vata. A veiqaravi o Sisita Burton ena Goneyalewa, Lalai, kei na Wilivola ni Sigatabu kei na matabose raraba ni Lalai kei na iSoqosoqo ni Veivukei. A veiqaravi vata kei watina ena nona vakatulewataka na Tabana ni Kaulotu na Korea Seoul West mai na 2007 ki na 2010. Ena buturara ni kaulotu, a raica kina o Sisita Burton—me vaka ena veiyabaki taumada mai Niu Siladi—ni loloma e ulabaleta na vosa kei na itovo vakavanua .

E nuitaka ena nona ilesilesi vou me na rawa ni vakayagataka tale kina e dua na ka a vulica mai vua e dua na itokani mai Korea: “Era na vakila na nomu loloma.”