Elder Stanley G. Ellis

Ena Vitusagavulu

E kila o Elder Stanley Gareld Ellis ni sega ni dua e rawa ni vakadinadinataka ena vakadidike vakavuku ni tiko na Kalou, ia mai Harvard University e vulica kina o koya ni rawa ni vakadinadinataka na Kalou ena nona vakatovolea na Nona yalayala. Ni veimama na imatai ni nona yabaki, sa sega vua na ilavo ka rawata e dua na cakacaka me veivuke ena kena saumi na veika e vakayagataka. E dina ni vakatitiqataka tu ni na rawa ni sauma na veika e dodonu me saumi ni sa sauma oti na nona ikatini, a nanuma me “vakatovolea” na Turaga (raica na Malakai 3:10).

“Au a sauma taumada na noqu ikatini, qai yaco na cakamana,” e kaya o Elder Ellis, ka se qai kacivi wale ga mai na iKarua ni Kuoramu ni Vitusagavulu ki na iMatai ni Kuoramu. “Au yacova rawa tale na veisaumi ka tarava. A yaco tiko oqori ena veimacawa rua taucoko ni iwasewase ni vuli oya. Ena noqu vakatovolea na Turaga, au sa vakadeitaka kina na noqu ivakadinadina ni tiko dina o Koya ka ni dau dinata na Nona yalayala.”

A sucu o Elder Ellis mai vei rau o Stephen kei Hazel Ellis ena Janueri ni 1947 mai Burley, Idaho e Amerika, ka tubu cake mai kina ena dua na vanua ni teitei kei na susu manumanu. Ni oti e dua na yabaki mai Harvard a laki veiqaravi ena Tabana ni kaulotu mai Brazil mai na 1966 ki na 1968. Ni lesu mai, a mai vakamautaki Kathryn Kloepfer ena June ni 1969 ena Valetabu na Los Angeles California. Erau nodrau itubutubu e ciwa na gone.

Ni oti na nona taurivola mai Harvard, ka rawata kina e dua na koroi ni bejila ena veiliutaki, a qai rawata e dua na koroi ni lawa mai na Brigham Young University. A cakacaka o Elder Ellis ena tuvai ni ivakacavacava ka yaco me Vakaitutu liu ni dua na kabani ni veivakasalataki vakailavo.

Ni bera ni kacivi ki na iMatai ni Kuoramu ni Vitusagavulu, a veiqaravi o Elder Ellis ena mataveiliutaki ni iWasewase na North America Southwest, na iWasewase na Brazil North, na iWasewase na Brazil, ka vakakina ena Komiti ni Veisautaki ni iYalayala kei na Veiliutaki. Mai na 1999 ki na 2002 a veiqaravi vakaperesitedi ni Tabana ni Kaulotu na Brazil São Paulo. A sa peresitedi talega ni iteki, daunivakasala ena mataveiliutaki ni iteki, lewe ni matabose e cake, daunivakasala ena matabisopi, peresitedi ni kuoramu ni italatala qase ka peresitedi ni Cauravou ena tabanalevu kei na iteki.