Me Tiki ni Noda Bula na Koniferedi

Tovolea mo vakayagataka eso na itaviqaravi oqo kei na taro me tekivu kina na veitalanoa vakamatavuvale se noda vuli yadudua.

Na naba ni tabana e koto e ra e tukuna tiko na imatai ni tabana ni vosa.

Me Baleti Ira na Gone

E wasea o Peresitedi Dieter F. Uchtdorf e rua na vosa bibi e vinakata o koya me da dau nanuma ena gauna eda temaki kina me da ivalavala kaukauwa vua e dua (tabana e 70). O nanuma tiko beka na vosa e rua oqori? Drau veitalanoa kei rau na nomu itubutubu me baleta eso na itovo e vakatura me da sa muduka. Vakasamataka na ivakarau e rawa ni o vakataki Jisu Karisito vakalevu cake kina ena nomu ivalavala vei ira na tani.
E tukuna o Elder Russell M. Nelson e vuqa na veika vakasakiti e rawa ni cakava na yagoda (tabana e 77), kei Elder Ronald A. Rasband e vakavuvulitaka ni lomani keda na Tamada Vakalomalagi kevaka sara mada ga e sega ni taucoko tu na yagoda (tabana 80). E vakaevei na ivakarau ni nomu vakasama ni o taukena tu e dua na yago? Vakasamataka mada na veika duidui e rawa ni cakava na yagomu. Ni o masu, vakasamataka na veika e rawa ni o tukuna vei Tamada Vakalomalagi mo vakavinavinakataki Koya kina me baleta na isolisoli oqo.

Me Baleti Ira Na iTabagone

O kilai ira beka na tamata era taroga na tolu na taro e tuva na parofita ena nona vosa ena mataka ni Sigatabu (tabana e 90): “Evei na vanua eda lako mai kina? Na cava eda lako mai kina ki ke? Eda na lako kivei ni sa oti noda bula eke?” Wilika na nona isau ni taro oqori ka vakasamataka na sala eso ena rawa kina vei iko mo wasea na dina oqori vei ira na tamata era se bera ni kila.
Eso na tamata era sega tiko ni kila ni o keda na Yalododonu Edaidai eda vakabauti Jisu Karisito ka dau muri koya. Wilika na vosa nei Elder Dallin H. Oaks, “Na Solibula,” ka vakasamataka na iyatuvosa oqo: “Na noda bula ni veiqaravi kei na solibula sai koya na ivakaraitaki veiganiti duadua ni noda yalayala me da qarava na iVakavuvuli kei ira na kai noda” (tabana 19). Na cava e tukuna na ivakarau o bulataka kina na nomu bula, ena nomu vakadinadinataka na iVakabula?
E vakavuvulitaka o Elder Quentin L. Cook, ni gauna e didivara kina e dua ki na ivakatagi ni vakabauta, ena tu vakatani o koya mai na Yalotabu” (tabana 41). Vakasamataka mada na irogorogo ni dua na iyaya ni vakatagi e cala tu na kena ki kei na cava e rawa ni vakavuna na kena cala tu na ki. Na cava soti na veika bibi e rawa ni o cakava mo kakua kina ni “didivara ki na ivakatagi ni vakabauta”?
E vica era a vosa ena koniferedi oqo era tukuna na veika me baleta na nodra matavuvale—vakakina eso na matavuvale lewenilotu vakatikina, matavuvale itubutubu dua, kei na matavuvale e sotava tu e vuqa na veimataqali veitemaki ni meca. Na cava soti era sa vulica o ira era a vosa oqori mai vei ira, ka ra vakavinavinakataka talega me baleti ira na nodra matavuvale? Na cava beka o lomana ka vakavinavinakataka me baleta na nomu? Na sala cava e rawa ni o cau ka laveti ira kina na lewe ni nomu matavuvale?

Baleti Ira Na Qase

E vakavuvulitaka o Peresitedi Boyd K. Packer, “E dua na ka cecere e kunei ena bula vakaitubutubu sa ikoya ni da vulica e levu cake na ka me baleta na veika bibi, mai vei ira na luveda me vakatauvatani kei na veika kece eda vulica mai vei ira na noda itubutubu.” (tabana e 6). Kevaka o iko e dua na itubutubu, vakasamataka mada eso na lesoni o sa rawata mai vei ira na luvemu, se kevaka o sega ni itubutubu, vakasamataka eso na lesoni o sa vulica mai vei ira na gone o kila. Vakasamataka mo wasea na lesoni eso oqori—kei na ituvaki eso o vulica mai kina—mai vua na watimu, dua na itokani, ira na luvemu, se so tale.
E rawa ni da sereki mai na veika ca ni da goleva na ivakavuvuli ni ivolanikalou, e vakavuvulitaka o Elder L. Tom Perry (tabana 94). Sa vukea beka vakacava na nomu sereki na ivakavuvuli mai na ivolanikalou? Era sa vukei iko beka vakacava mo digitaka na dodonu?
E vica na vosa e vakanamata ki na veiyalayalati, vakauasivi na veiyalayalati ni valetabu. Vakasamataka mada na veika e tukuna o Elder Robert D. Hales: “Veitalanoa vata kei iko ena iloilo ka taroga, “Sa vakaevei tu na noqu bulataka na noqu veiyalayalati?” (tabana 34). Vakasamataka na nomu sauma na taro kei na veika e rawa ni o cakava mo bulataka vakavinaka cake kina na nomu veiyalayalati—ka sureti ira na tani me ra cakava ka bulataka na nodra.
O Elder Jeffrey R. Holland (tabana e 31), Elder Neil L. Andersen (tabana e 111), kei ira tale eso era vosa me baleta na bula vakatisaipeli kei na iwalewale ni lako mai vei Karisito. Sa vakaevei beka na nomu iwalewale ni bula vakatisaipeli? Na cava soti o sa vulica mai na veivosa oqo kei na kena tale eso me baleta na nomu lako tikoga yani vua na iVakabula?
“Ni noda itavi bibi duadua,” me vaka a vakavulica o Elder D. Todd Christofferson, sai koya me da vakavuvulitaka na kosipeli i Jisu Karisito, na Nona ivunau, e vuravura taucoko” (tabana 86). Railesuva na nodrau vosa o Elder Christofferson ka vakakina o Elder Donald L. Hallstrom (tabana e 13) ka vakasamataka se cava na kosipeli i Jisu Karisito. Na madigi cava soti beka e tu ena nomu vuvale, nomu veikacivi, kei ira o dau veimaliwai kaya mo vakavulica kina?