Na Tamata Cakacaka ena Were ni Vaini
Yalovinaka ka vakarorogo ki na veivakauqeti ni Yalo Tabu ka tukuna tiko vei iko ena gauna sara ga oqo, ena miniti sara ga oqo, ni dodonu mo ciqoma na isolisoli ni veisorovaki ni Turaga o Jisu Karisito.
Ena vuku ni veikacivi kei na veivagalalataki e ratou se qai kacivaka ga na Mataveiliutaki Taumada, au gadreva meu gusui keimami kece mada ena neimami sa dau veinanumi ka lomani ira tikoga era sa veiqaravi tiko ena yalodina, me vaka na noda lomani ira ka kidavaki ira era sa mai veiqaravi oqo. Na neimami vakavinavinaka mai vu ni yaloi keimami vei kemuni kece.
Au gadreva meu tukuna na nona italanoa vakaibalebale na iVakabula me baleta na itaukei ni vale “sa lako ko koya ena mataka caca me voli ira eso na tamata cakacaka.” Ni oti na nona vakacakacakataki ira na imatai ni lala ena 6 na kaloko ena mataka, a lesu tale ena 9 ena mataka, ena 12 ena sigalevu, ka vakakina ena 3 ena yakavi me voli ira eso tale na tamata cakacaka ni sa toso tiko na vakatotolotaki ni tatamusuki. E tukuna na ivolanikalou ni a lesu tale mai ena iotioti ni gauna, “rauta na ikatinikadua ni auwa” (rauta vakacaca na 5 ena yakavi.), ka mai vakacakacakataka na iotioti ni tamata. Ni oti ga e dua na auwa, era sa soqoni vata kece mai na tamata cakacaka me ra veisaumi. E ka ni kidacala, ni tautauvata ga na kedra isau e dina ni duidui na auwa ni nodra cakacaka. Ena gauna vata oqori, era sa rarawa na a voli e liu, ka ra kaya, “O ira oqo era sa muri, sa duabau ga na auwa era sa cakacaka kina, ia ko sa vakatautauvatataki keimami kei ira, ia keimami sa colata na kena bibi kei na todra ni siga.”1 Ni da wilika na italanoa vakaibalebale oqo, o ni na nanuma beka, vakakina o ira na tamata cakacaka oqo, ni sa mai yaco na veivakacacani eke. Meu vosa mada vakalekaleka ena tikina oqori.
Taumada sa bibi me da kila ni sega ni dua e vakacacani eke. Eratou a vakadonuya na tamata cakacaka e liu na isau taucoko ni dua na siga, ka ratou sa ciqoma. Me kuria, niu raitayaloyalotaka rawa, e ratou sa vakavinavinaka ni soli vei iratou na cakacaka. Ena nona gauna na iVakabula, ena sega ni rawa ni levu na ka eratou rawa ni cakava e dua na tagane saumi vakasiga kei na nona matavuvale ia me rawa ga na nodratou bula ena veika e rawa ena siga ko ya. Kevaka o sega ni cakacaka se teitei se qoli se volivolitaki, o na sega beka ni kana ena siga oya. Ni levu cake na tamata era vaqara cakacaka, mai na cakacaka e tu, era kalougata vakalevu duadua mai vei ira na tamata cakacaka ena mataka oya o ira na imatai ni tamata era a digitaki.
Io, kevaka me na vakaraitaki na yalololoma, sa dodonu me na baleti ira na tagane era a sega ni digitaki ka tu talega na gusu me ra vakania kei na daku me ra vakasuluma. E vaka me sega ni tiko vei ira eso na kalougata. Ena nona veisiko yadua na itaukei ni vale ena siga taucoko, era rai tu ga ka digitaki tale e dua.
Ia ni vakarau sara tu ga me oti na siga oya, e vakurabui ni a lesu tale yani ena ikalima ni gauna na itaukei ni vale ena ikatinikadua ni auwa ni veivoli! Ni ratou rogoca na iotioti ni tamata cakacaka yalolailai oqo ni na caka vakadodonu vei ira, era vakadonuya me ra laki cakacaka ka sega tu ni kila se na vica na kedra isau, eratou kila ni na vinaka cake e dua ga na ka mai na sega ni dua na ka, me vaka na veika era sotava tiko me yacova na gauna oya. Ia ni ra sa soqo vata me ia na veisaumi, era kurabui ni tautauvata ga na ka era taura kei ira kece tale na kena vo! Sa dua mada ga na ka na nodra kurabui kei na nodra vakavinavinaka cecekia! Ena ka dina sara ni sega vakadua ni ra bau sotava e dua na ka vaqo ena nodra gauna taucoko ni bula vakacakacaka.
Ena kena wiliki na italanoa au nanuma kina me na laurai na nona vosakudrukudru na imatai ni tamata cakacaka. Me vaka e tukuna vei ira na itaukei ni vale ena italanoa vakaibalebale (kau vakuria vakalailai ga na kena vosa): “Noqu itau, au sa sega ni vakacacani iko. O sa vakadonuya oti na isau ni dua na siga, e isau vinaka. O a marautaka ena kena soli vei iko na cakacaka, kau sa marautaka talega na nomu veiqaravi. O sa saumi taucoko. Taura na kemu isau ka marautaka na nomu veivakalougatataki. Vei ira na kena vo, sa sega beka ni tara meu vakaveitaliataka na noqu ka” Oti qai yaco mai na taro laulau oqo vei ira kecega era gadreva me ra a rogoca ena gauna ko ya se ena gauna oqo: “Sa ca beka na yalomu niu sa yalo vinaka?”
Kemuni na taciqu kei na ganequ, ena yaco eso na gauna ena noda bula ni taura e dua tale e dua na veivakalougatataki sega ni namaki se soli vua eso na veivakacaucautaki. Meu kerea mada vei keda me kakua ni mosi vei keda—io me kakua ni vuvu kina na yaloda—ni yaco na kalougata vua e dua tale na tamata? Eda sega ni vakalailaitaki ni dua e vakaikuritaki. Eda sega ni veiqati tiko vakataki keda se o cei e vutuniyau se levu duadua nona taledi se rairai vinaka duadua se vakalougatataki vakalevu duadua. Na veitau cici dina eda cakava dina tiko sai koya na veitau cici kei na ivalavala ca, ka dua vei ira na kena e kilai raraba duadua, sai koya o ya na vuvu.
Me kena ikuri, na vuvu e dua na cala sa tomani tikoga yani. Eda dau kune rarawa vakalalai ni yaco vei keda eso na kalouca, ia na vuvu e dau vakararawataki keda ena kalougata kece e yaco vei ira na tamata kecega eda kila! Sa dua na gauna talei oya—mo gunuva e dua na tavaya wai ni kiukaba vakamasima ena veigauna kece era sota kaya kina e dua na gauna vinaka o ira kece era wavoliti iko! E qai vakamadua vakalevu cake, ena gauna eda kila kina ni sa rui dodonu ka dauloloma na Kalou, ka dau solia vei ira kecega era tu vata kei Koya “na veika kece e tu vua,”2 me vaka e tukuna na ivolanikalou. Na imatai ni lesoni mai na nona were ni vaini na Turaga: na kocokoco, veivakanini, se nomu buturaka sobu e dua e sega ni na laveta cake na nomu itutu, se na sega talega ni vakavinakataka na kemu ituvaki na nomu vakatorosobutaka e dua. Dau yalo vinaka, ka vakavinavinaka ni sa rui vinaka na Kalou. Oqori na sala mamarau me da bula kina.
Na ikarua ni ka au taura mai na italanoa vakaibalebale sai koya na cala veivakararawataki e rawa ni ra vakayacora eso kevaka me ra sega ni taura na kedra isau ni cava na siga baleta ni ra a vakaogai tiko ena so na leqaleqa ena loma ni siga. E sega ni tukuni eke ni dua a viritaka na nona ilavo e matana na itaukei ni vale ka lako wale yani ka sega na nona ilavo, ia au vakabauta ni a rawa ni cakava e dua.
Kemuni na taciqu kei na ganequ lomani, na ka e yaco ena italanoa oqo ena 9 na kaloko se ena sigalevu se ena 3 na kaloko e sega ni dua na ka ni vakatauvatani ki na isau e soli vei ira kece na tamata cakacaka. Na icakacaka ni vakabauta sai koya me da taura matua toka, cakacaka tikoga, ia tiko me yacova ni sa oti, ka laiva na oca ni veiauwa sa oti—dina se vakasamataki ga—me lutu laivi yani ena levu ni keda isau ena iotioti ni gauna. Kakua ni tiloma tu na ca makawa se na kudru—me kakua vei iko ka sega talega vua na wekamu me kua sara, meu vakuria, ki na Lotu dina ka bula oqo. Na vakaturaga ni nomu bula, nona bula na wekamu, kei na kosipeli i Jisu Karisito ena matanataki mai ena iotioti ni gauna, kevaka sara mada ga era sega ni dau kila na ka vakaturaga oqori na tamata kece ena imatai ni gauna. Kakua soti ni kauwaitaka vakalevu e dua na ka a yaco ena 9 ena mataka ni tovolea tiko na loloma soli wale ni Kalou me saumi iko ena 6:00 ena yakavi—se cava ga na ituvatuva ni nomu cakacaka ena siga ko ya.
Eda dau vakayagataka na igu talei vakayalo ni lomada ena noda nanuma tu ga e dua na rorogo sega ni dodonu eda a tabaka ena dua na veisisivi tabapiano ena gauna ni gone, se dua na ka a tukuna se cakava na watida ena 20 na yabaki sa oti ka da nanuma me da beitaki koya tiko ga kina ena loma ni 20 tale na yabaki mai oqo, se dua na ka a yaco ena itukutuku ni Lotu ka vakadinadinataka ni na dau dredre tikoga vua na tamata me sotava na veika era namaka tu ki na inuinui vakalou sa tu e matadra. Kevaka sara mada ga a sega ni vu mai vei iko e dua vei ira na cudru oya, e rawa ni laki tini vei iko. Sa na wacava na isau ni cau oqori ni na raica na matamu na iTaukei ni were ni vaini ka vakatauci na lewa ni oti na noda gauna e vuravura.
Oqori sa kauti au mai ki na ikatolu ka iotioti ni noqu vakasama. Na italanoa vakaibalebale oqo—me vaka ga na veitalanoa vakaibalebale kece tale—e sega dina ni baleta na tamata cakacaka se na kedra isau me vakataki ira na vo ni veitalanoa vakaibalebale ka sega ni baleta na sipi kei na me. Oqo na italanoa me baleta na nona vinaka na Kalou, na Nona dauvosota kei na veivosoti, kei na Nona Veisorovaki na Turaga o Jisu Karisito. Oqo na italanoa ni lomasoli kei na yalololoma. Na italanoa me baleta na iloloma soli wale. E vakadeitaka na vakasama au a rogoca ena vuqa na yabaki sa oti ni sa dina sara ni ka e dau marautaka vakalevu duadua na Kalou ena nona itutu va-Kalou sai koya na marau e kauta mai vua na nona dauloloma veivueti, vakauasivi vei ira era sega tu ni namaka ka ra dau nanuma ni sega ni ganiti ira.
Au sega ni kila o cei ena ivavakoso levu oqo nikua ena gadreva me rogoca na itukutuku ni veivosoti ka tukuni tiko ena italanoa vakaibalebale oqo, se vakacava na levu ni kena bera o nanuma ni o sa bera tu kina, se vakacava na levu ni madigi o nanuma ni o sa calata, se vakacava na levu ni cala o nanuma ni o sa cakava se na taledi o nanuma ni sega ni tu vei iko, se vakacava na yawa ni vanua o nanuma ni o sa lakova mai vale kei na matavuvale kei na Kalou, Au vakadinadinataka ni o sega ni sa lako sivita na vanua e rawa ni yacova na loloma vakalou. E sega ni rawa vei iko mo lutudromu sivita na rarama tawavakaiyalayala ni Veisorovaki i Karisito.
Kevaka o se bera ni lewena na neimami vakabauta se o dau tu vata kei keimami ka sa gole yani, e sega ni dua na ka ena ituvaki cava ga o sa cakava ena sega ni rawa ni vakavinakataki. E sega ni dua na leqa ena sega ni rawa ni o vakamalumalumutaka. E sega ni dua na tatadra me na sega ni rawa ni vakavotukana ni toso na gauna. Kevaka sara mada ga o nanuma ni o sa lakosese voli ka iotioti ni tamata cakacaka ena ikatinikadua ni auwa, sa tu na iTaukei ni were ni vaini ka kaci tiko mai. Me da “toro doudou kina [ki na] itikotiko vakaturaga ni loloma,”3 ka lutu yani ena yavana na Yalosavasava ni Isireli. Lako mai ka kana magiti “segai ena ilavo se na ivoli”4 ena nona teveli na Turaga.
Au kerekere vakatabakidua vei kemuni na tagane vakawati kei na tama, kemuni na matabete se o kemuni na vakarau tiko ki na matabete me, vaka e kaya ko Liai, “Dou yadra! Dou tucake mai na kuvu ni soso … ka mo dou tagane.”5 E sega ni veigauna kece ia e vakavuqa ni o ira na tagane era dau digitaka me ra kakua ni rogoca na kaci ni “dou curu mai.”6 Ena vuqa na gauna e vaka me ra dau lomasoli vakalevu cake na marama kei ira na gone. Kemuni na turaga, ni tu yani. Ni cakava ena vukumuni. Cakava ena vukudra era lomani iko ka masuta tiko mo rogoca rawa na kaci. Cakava ena vukuna na Turaga o Jisu Karisito, o koya sa sauma ena isau e sega ni vakarautaki rawa me baleta na veisiga ni mataka e vinakata o Koya me nomu.
Kemuni na taciqu kei na ganequ, vei kemuni o ni sa vakalougatataki mai na kosipeli ena vuqa na veiyabaki baleta o ni a kalougata mo ni raica taumada, vei kemuni o ni qai lako mai ki na kosipeli ena ivakatagedegede kei na gauna duidui e muri, kei kemuni—na lewenilotu kei kemuni o ni se bera ni lewenilotu—o ni se vakalutulutu tu beka i muri, vei kemuni yadua sara, au vakadinadinataka na kaukauwa veivakavoui ni nona loloma na Kalou kei na cakamana ni Nona loloma soliwale. E kauwaitaka ga o Koya na ivakarau ni vakabauta o na yaco mai kina, ka sega ena auwa ni siga o yaco yani kina ki kea.
O koya kevaka o ni sa veiyalayalati oti, ni maroroya. Kevaka o ni se bera, ni cakava. Kevaka o ni sa cakava ka sa voroka, veivutuni ka vakavinakataka. E sega vakadua ni bera kevaka e tukuna tiko na iTaukei ni were ni vaini ni se vo na gauna. Yalovinaka ka vakarorogo ki na veivakauqeti ni Yalo Tabu ka tukuna tiko vei iko ena gauna sara ga oqo, ena miniti sara ga oqo, ni dodonu mo ciqoma na isolisoli ni veisorovaki ni Turaga o Jisu Karisito ka marautaka na veitokani ni Nona cakacaka. Kakua ni lokuyara. Sa bera tiko. Ena yaca i Jisu Karisito, emeni.