Bisopi Gérald Caussé

iMatai ni Daunivakasala ena Matabisopi Vakatulewa

Mai na nona gauna ni gone sa dau kunea o Bisopi Gérald Jean Caussé ka se qai kacivi walega me iMatai ni Daunivakasala ena Matabisopi Vakatulewa, na marau ena veiqaravi ena Lotu. Oqori e dua na ka vinaka, e kaya o koya, baleta ena nona tabana lailai mai Bordeaux e Varanise, e gadrevi na tamata yadua me rawa ni cici tiko kina na tabanilotu. Me ikuri ni veiqaravi ena veikuoramu ni Matabete i Eroni ena nona gauna taucoko vakaitabagone, a veiqaravi o koya vakadaunipiano ena Lalai ni yabaki 12, vakadaunivakasala ena mataveiliutaki ni Wilivola ni Sigatabu ni yabaki 14, ka peresitedi ni Matawilivola ni Sigatabu ni yabaki 16.

“Na veiqaravi ena Lotu e vukea na noqu rawata na noqu ivakadinadina,” e kaya o koya. Na tamana, ka veiqaravi vakavica me peresitedi ni tabana ka bisopi, a vakavuna vakalevu na nona sotava na veigauna vinaka o Bisopi Caussé.

“Niu yabaki tinivakacaca, e dau vakaitavitaki au ena gauna ni veituberi vakamatavuvale se nodra sikovi na matavuvale era vakaleqai tu,” e kaya o Bisopi Caussé. “E rairai ni gauna vinaka duadua ni vuli ena noqu vakarautaki ki na veiliutaki ni matabete na noqu dau vakasaravi koya toka.”

E muri, a qai veiqaravi o Bisopi Caussé vakavunivola ni iteki, peresitedi ni kuoramu ni italatala qase, iliuliu ni bete levu, daunivakasala nei bisopi, daunivakasala nei peresitedi ni iteki, peresitedi ni iteki, Vitusagavulu ni iWasewase, kei na kena e qai oti toka ga qo me lewe ni iMatai ni Kuoramu ni Vitusagavulu.

A sucu o Bisopi Caussé mai Bordeaux e Varanise ena Me ni 1963, vei rau o Jean kei Marie-Blanche Caussé. A veiqaravi ena Mataivalu Waqavuka ni Varanise me dua na yabaki ni se cauravou, na vanua a laki lesi kina ena dua na tabana ni NATO.

A rawata e dua na koroi na masita ena bisinisi mai ESSEC ena 1987. A tekivuna na nona cakacaka ena veivakasalataki vakabisinisi, ka cakacaka kina ena ono na yabaki ena nodratou valenivolavola mai Parisi kei Lodoni e dua na kabani ni veivakasalataki. E muri a qai cakacaka ena dua na kabani ni volitaki iyaya yadua mai Iurope, ia ni se bera na nona veikacivi ki na iMatai ni Kuoramu ni Vitusagavulu ena 2008, a cakacaka voli vakamanidia liu ka lewe ni matabose ni kabani levu duadua ni volitaki kakana mai Varanise.

Erau a vakamau vata kei Valérie Lucienne Babin ena Okosita ni 1986 ena Valetabu mai Bern Switzerland. E lima na luvedrau.