O Ira Era Dauloloma Era na Lomani
Ni sa vakasinaiti na yaloda ena loloma ni Kalou, sa yaco me da “dou veilomani vaka ikemudou, dou loma vinaka, ka veivosovosoti.”
Ena dua na gauna lekaleka sa oti au a taura e dua na ivola mai vua e dua na tina lomaleqa ka kerea ke rawa ni dua na vosa ena koniferedi raraba ena dua na ulutaga me na yaga vei rau na luvena. Sa basika ena kedrau maliwa e dua na duidui, erau sa sega ni dau veivosaki. Sa kavoro kina na yaloi tinadrau. Ena nona ivola e vakadeitaka kina vei au o koya ni na vakaduavataki rau tale e dua na itukutuku mai na koniferedi raraba, ka na yaco me vinaka tale na veika kece.
Na nona vakatakekere ena yalodina mai vu ni yalona na marama oqo e dua ga vei ira na vica na veivakauqeti au ciqoma ena vica na vula sa oti oqo au na cavuta kina nikua e vica na malanivosa ena dua na ulutaga ka sa vakatubu lomaleqa tiko—sega walega vua e dua na tina nuiqawaqawa ia vei ira e vuqa ena Lotu ka vaka dina kina, ki vuravura.
E tarai au na nona vakabauta na tina dau loloma oqo ni na rawa ni veivuke ena kena vakaduavata taki ni kedrau isema na luvena ena dua na vosa mai na koniferei raraba. Au vakadeitaka ni nona veivakabauti e sega soti ni baleta na nodra matau na vosa ia ena “gata ni vosa ni Kalou,” ka ni “qaqa cake na kena revurevu ena nodra vakasama na tamata … mai na veika kecega.”1 I ganequ lomani, au masuta me na tara na yalodrau na luvemu na Yalotabu.
Ni sa Ca na iSema ni Veiwekani
Na yavalati kei na kasere ni isema vakaveiwekani a se tekivu sara mai na itekivu ni bula vakatamata. O Keni ni gauna makawa na kena imatai a vakatara na mate veitauvi oqo ni veicati kei na duidui me vakacacana na yalona. A cukiraka na qele ni yalona ena veiqati kei na yaloca ka vakatara me vua ka matua na yalo oqori me yacova ni laki vakayacora na veika a sega ni vakasamataka—ena nona labata na tacina dina ka yaco kina, ena ivalavala oya me tama ni lasu kece ga i Setani.2
Me tekivu mai na siga oya sa dau vakavuna eso na italanoa rerevaki ni itukutuku ni gauna na yalo ni veiqati kei na veicati. E vakavuna me cati Tevita o Saula, o ira na luvei Jekope vua na tacidra o Josefa, o Leimani kei Lemueli vei Nifai, kei Amalikaia vei Moronai.
Au rawa ni raitayaloyalotaka ni tamata kece sara e vuravura sa tarai koya ena dua na kena ivakarau na yalo ni veileti, vakaduiduile, kei na veisausaumi. E rairai ena so sara beka na gauna eda dau raica kina vei keda na mataqali yalo vaqo. Ni da vakila na mosi ni yalo, cudru, se veiqati, ia ena rawarawa me da vakalewai ira na tani, ka vakaibalebaletaka vakatani na nodra ivalavala me rawa ni dodonu kina na noda yaloca tu ena vukudra.
Na iVunau
E dina sara, eda kila ni cala oqo. E matata tu na ivunau. Eda dau vakararavi kece vua na iVakabula; ena sega ni rawa ni vakabulai e dua vei keda kevaka e sega o Koya. Na nona Veisorovaki na Karisito e sega ni vakaiyalayala ka tawamudu. E vakaivakarau na vosoti ni noda ivalavala ca. Sa dodonu me da veivutuni, ka sa dodonu me da tu vakarau me da vosoti ira na tani. E vakavuvulitaka o Jisu “Mo dou veivosoti vakai kemudou; ia ko koya sa sega ni vosota … ena cudruvi koya na Turaga; raica sa ivalavala ca vakalevu cake ko koya”3 ni sa “Kalougata ko ira e dauloloma ni ra na lomani.”4
E dina sara, e vakaibalebale vakavinaka sara na veimalanivosa oqo—ni vakayagataki vua tale e dua. Eda na raica vakamatata ka vakarawarawa sara na vua ca ni nodra veivakalewai na tani ka kubuta tu na ca. Ka ni da dau sega sara ni taleitaka ni ra vakalewai keda na tamata.
Ia me baleta na noda nanuma cala kei na noda kudru, sa rui vakavuqa na noda dau vakadonuya na noda cudru ka nanuma ni donu duadua ga ka kilikili na noda vakatulewa. E dina ni da sega ni rawa ni raica na yalona e dua tale, eda dau nanuma ni da kila na inaki ca se dua na tamata ca ena gauna eda raica kina. Eda dau vakadonui keda ena gauna eda rarawa kina baleta ni da nanuma ni, ena vuku ni ka e yaco vei keda, sa tu vei keda na itukutuku kece me da vakalailaitaka kina e dua tale.
E kaya na iApositolo o Paula ena nona ivola vei ira na kai Roma, ni o ira era dau vakalewai ira na tani sa “sega nodra iulubale.” Na gauna eda vakalewa kina e dua tale, e vakamacalataka o koya, eda sa vakacacani keda tiko, ni sega sara ni dua e sega na nona ivalavala ca.5 Na nomu sega ni via veivosoti sa dua na ivalavala ca levu—ka a veivakasalataki kina na iVakabula. O ira sara mada ga na tisaipeli nei Jisu era a “veibeitaki vakaiira ka ra sega ni veivosoti vakaidina, a ka oqo era sa cala kina, a ra sa cudruvi ka kune rarawa kina.”6
Sa vosa vakamatata sara na noda iVakabula ena ulutaga oqo ka lailai sara na vanua me da vakacuruma kina na noda nanuma. “Ia koi au na Turaga, au na vosoti ira ga kau sa lewa,” sa kaya o Koya, “ia koi kemudou sa kilikili mo dou vosota na tamata kecega.”7
Meu vakuria mada kina e dua na ivakamacala lailai e ra? Ni gadreva na Turaga me da vosota na tamata kecega sa okati tiko kina na noda vosoti keda. Ena so na gauna, vei ira na tamata kecega e vuravura, o koya e dau dredre duadua na nona vosoti—ka vakakina ni rairai o koya e dau gadreva vakalevu duadua beka na noda veivosoti—sai koya na tamata e dau raici keda lesu mai ena iloilo.
Na Kena iLutua
Na ulutaga oqo ni noda vakalewai ira na tani e rawa ni vakavuvulitaki ga ena dua na ivunau rua na kena ivosa. Ni yaco mai na veicati, kakase, veigaluvi, veivakacacani, sega ni veivosoti, se via veivakacacani yalovinaka vakayagataka na veika oqo:
Muduka laivi!
E rawarawa sara. Me da muduka laivi na dau veivakalewai ka vakaisosomitaka na vakasama kei na yalo ni veivakalewai ena lomana na Kalou kei ira na luvena. E Tamada na Kalou. Oi keda na Luvena. Eda veitacini ka veiganeni kece sara. Au sega ni kila se na vosa, na yalo kei na veivakauqeti cava tale beka me rawa niu vakamatatataka kina na vakasama oqo ni kakua ni veivakalewai me rawa ni kabi dei toka kina. E rawa niu cavuta na ivolanikalou, au rawa ni vakamacalataka na ivunau, kau na cavuta tale mada ga e dua na itukutuku au raica ni kabi toka ena dua na muaimuri ni motoka. E kabi toka ena muaimuri ni motoka ka kena irairai ni tamata voravora toka na kena draiva, ia e vakavuvulitaka e dua na lesoni bibi na kena malanivosa. E kaya vaqo, “kua ni vakalewai au baleta ni duatani na noqu ivalavala ca mai vei iko.”
Sa dodonu me da kila ni sega sara ni dua vei keda e uasivi sara—ni da sa daukerekere kece ena mata ni Kalou. E sega beka ni o keda kece, ena dua na gauna, eda a tacake kina ki na idabedabe ni loloma veivueti ka kerea na loloma soli wale? Eda a sega ni diva ena noda igu taucoko mai loma na loloma veivueti—me da vosoti ena caka cala kei na ivalavala ca eda sa cakava?
Baleta ni da sa vakararavi kece tiko ki na loloma veivueti ni Kalou, e rawa vakacava me da cakitaka vei ira na tani e dua na ivakarau ni loloma soli wale eda gadreva tu vakaukauwa me baleti keda? Kemuni na taciqu kei na ganequ, me da kakua beka ni veivosoti me vaka na noda gadreva tu me da vosoti?
Na Loloma ni Kalou
E dredre beka me da cakava qo?
Io, e dina sara.
E sega ni rawarawa na noda vosoti keda kei ira na tani. Io na dina, vei keimami e vuqa e gadrevi kina e dua na veisau levu ena ivakarau ni bula kei na ivakarau ni vakasama—io na veisau mada sara ga ni yalo. Ia e dua na itukutuku rogo vinaka. Na “veisau qaqa”8 oqo ni yalo sai koya sara ga na ka e nakiti me rawati ena kosipeli i Jisu Karisito.
E caka vakacava? Ena loloma ni Kalou.
Ni sa vakasinaiti na yaloda ena loloma ni Kalou, sa na yaco vei keda e dua na ka vinaka ka savasava. Eda na “muria na nona ivunau: sa sega ni ka ni veivakararawataki na nona ivunau. “Ni sa rawai vuravura ko koya yadua sa vakasucumi koya na Kalou.”9
Na kena levu ga ni noda vakatara na loloma ni Kalou me lewa na noda vakanananu kei na lomada—na levu ni noda vakatara na noda lomana na Tamada Vakalomalagi me buroro e lomada—na kena rawarawa me da lomani ira na tani ena loloma savasava i Karisito. Ni da dolava na yaloda ki na malawa ni mataka serau ni nona loloma na Kalou, ena seyavu yani na yalo ni veicati kei na vuvu.
Ena veigauna kece, o Karisito na noda ivakaraitaki. Ena Nona ivakavuvuli ka vakakina ena Nona bula, a vakaraitaka vei keda o Koya na sala. A vosoti ira na dau caka ca, na gusugusu ca, kei ira era dau segata me ra vakararawataki Koya ka vakacacana.
E kaya ko Jisu ni rawarawa me da lomani ira era dau lomani keda; o ira sara mada ga na tamata ca era rawa ni cakava oya. Ia o Jisu Karisito e vakavuvulitaka e dua na lawa cecere. Sa voqa curuma mai na veisenijiuri na Nona vosa ka sa rogo vei keda nikua. Sa vagolei vei ira kece era gadreva me ra Nona tisaipeli. Era vagolei vei iko kei au: “Dou lomani ira na nomudou meca, vosa vinaka vei ira sa rukaki kemudou, caka vinaka vei ira sa cati kemudou ka masulaki ira sa vakalialiai kemudou, ka vakacacani kemudou.”10
Ni sa vakasinaiti na yaloda ena loloma ni Kalou, sa yaco me da “dou veilomani vakai kemudou, dou lomavinaka, dou kakua ni veicudruvi me vaka sa sega talega ni cudruvi kemudou na Kalou ena vuku i Karisito [vosoti keda].”11
Na loloma savasava i Karisito e rawa ni kauta tani na vari ni yaloca kei na cudru mai matada, ka rawa kina vei keda me da raici ira na tani ena ivakarau e raici keda kina na Tamada Vakalomalagi: ni da sa tamata caka cala ka sega ni uasivi sara ka da sega ni raitayaloyalotaka rawa na vanua e dodonu me da yaco kina. Me vaka ni sa lomani keda sara na Kalou, sa dodonu vakakina vei keda me da veilomani ka dau veivosoti.
Nodra Sala na Tisaipeli
Kemuni na taciqu kei na ganequ, raica na veitaro eso oqo mo vakatarogi iko kina vakataki iko:
O kubuta tu beka eso na yaloca ena vukuna e dua tale?
O dau kakase, kevaka sara mada ga e dina tiko na ka o tukuna?
O dau vakuwai ira, biligi ira tani, se totogitaki ira na tani ena vuku ni dua na ka era a cakava?
O dau vuvutaka lo tu beka e dua?
O dau diva beka mo vakamavoataka e dua?
Kevaka o sauma ena io e dua vei ira na taro oqo, o na vinakata beka mo vakayagataka na ivunau rua na kena ivosa mai na itekivu ni vosa: muduka laivi!
Ena dua na vosa na veibeitaki kei na veimecaki, e rawa ni da vakumuni vatu ka veiviritaka. Ia ni bera mada ni da kitaka, nanuma na nona vosa na Dua o koya na iVakavuvuli ka ivakaraitaki: “O koya vei kemudou sa sega ni ivalavala ca, me viriki koya mada e liu ena vatu.”12
Kemuni na taciqu kei na ganequ, me da biuta sobu na noda vatu.
Ma da dau yalovinaka.
Me da dau veivosoti.
Me da au veivosaki ena yalo vinaka.
Me vakasinaiti na yaloda ena loloma ni Kalou.
“Me da caka vinaka vei ira na tamata kecega.”13
Sa yalataka na iVakabula: “Mo dou dau soli ka na soli vei kemudou; na ivakarau vinaka, ka tabaki sobu, ka kuretaki vata, ka vuabale, Ia na ivakarau ga dou [sa vakarautaka] ena vakarautaki tale vei kemudou.”14
E sega beka ni sa rauta na yalayala oqo me da dau vagoleya tiko ga kina na noda sasaga ena ivalavala vakayalo vinaka, na dauveivosoti, kei na loloma uasivi ka sega ni dua na itovo ca?
Me da, me vaka ni da tisaipeli i Jisu Karisito, sosomitaka na ca ena vinaka.15 Me da kakua ni segata me da sosomitaka na ca se da vakatara me rawai keda na noda cudru.
“Ni sa volai, A noqu itavi meu cudruvaka; au na sauma koi au sa kaya na Turaga.
“O koya mo qai vakania na nomu meca, kevaka sa viakana, kevaka sa viagunu, mo vagunuvi koya. …
“Me kakua ni rawai iko na ca, mo rawa ga na ca ena vinaka.”16
Nanuma tiko: ena ivakataotioti, era na lomani ga o ira sa dau loloma.17
Me vaka ni da lewena Na Lotu i Jisu Karisito ni Yalododonu Edaidai, se vanua cava ga eda tu kina, me da kilai ni da tamata “dau veilomani”18
Dou Veilomani
Kemuni na taciqu kei na ganequ sa rauta na mosi ni yalo kei na rarawa e kauta mai na bula oqo me da kakua ni vakuria ena noda sega ni dau veikauwaitaki, yaloca, kei na vakaduiduile.
Eda sega ni taucoko tu.
Era sega ni taucoko tu na tamata era tu wavoliti keda.19 Era dau cakava na tamata na veika e veivakasosataki, veivakararawataki, ka veivakacudrui. Ena bula oqo ena dau vaka tu ga kina.
Ia, me da laiva na veika eda cudruvaka. E dua na tiki ni bula oqo me da vulica na ivakarau me da laiva yani kina na veika vakaoqori. Oqori na nona sala na Turaga.
Nanuma tiko, ni sinai tu ko lomalagi vei ira e tu vei ira na veika oqori: Era sa vosoti. Ka ra veivosoti.
Laiva na nomu icolacola e yavana na Turaga. Kakua ni dau vakalelewa. Vakatara me veisautaka ka vakabula na yalomu na Veisorovaki nei Karisito. Dau veilomani. Dau veivosoti.
O ira era dauloloma era na lomani.
Oqori au vakadinadinataka ena yacai o Koya sa dauloloma vakavinaka sara ka taucoko ka solia kina na Nona bula ena vukuda, na Nona itokani ena yaca i Jisu Karisito, emeni.