Elder Craig A. Cardon

Ena Vitusagavulu

E vakavinavinakataka o Elder Craig Allen Cardon, se qai kacivi walega ki na iMatai ni Kuoramu ni Vitusagavulu mai na iKarua ni Kuoramu, na veivakauqeti ni Yalotabu ena veika vinaka kece ena nona bula.

E nanuma lesu vaqo o koya, “Erau dau vukei au na tamaqu kei na tinaqu niu se gonetagane lailai meu tekivu dau kila na domo ni Yalotabu, meu kila na veika au vakila tiko. “Na veitaratara oqori mai vua na Turaga sa vakarautaki tu vei ira kece era vakasaqara ka yaga sara me baleta na cakacaka cecere oqo.”

Ni oti e dua na kaulotu ki Itali, a vakamautaki Deborah Louise Dana o Elder Cardon ena Noveba ni 1970 ena Valetabu mai Mesa Arizona. Ena loma ga ni 13 na yabaki ni oti oya, sa yaco o Elder Cardon me peresitedi ni Tabana ni Kaulotu na Italy Rome. Ena gauna oya, sa sucu oti tu kina e vitu mai vei ira na walu na luvedrau ka tiko na nodra yabaki mai na maliwa ni ciwa na vula ki na yabaki 11.

“Oqori ga eda sa rawa ni kila kina e levu na ka me baleti Sisita Cardon,” e kaya o Elder Cardon. “Na nona vakabauta, loloma, dauvosota, kei na yalovinaka sa dua na veivakalougatataki vakasakiti vei au, kei ira kece era kilai koya.”

Mai na 2006 ki na 2011, a veiqaravi voli kina o Elder Cardon ena Mataveiliutaki ni iWasewase na Africa West, e dua na gauna ka vakamacalataka o koya ni “dua na veivakalougatataki vakasakiti me da cakacaka ena kedra maliwa na tamata eda dau lomana vakalevu sara.”

Ena nona bula taucoko, sa dau solia e levu na nona gauna o Elder Cardon ena veicakacaka ni yalololoma ena veisoqosoqo ni matavuvale kei na itabagone ena loma ni nona vanua kei na veivanua tani.

O Elder Cardon e luvedrau o Wilford Pratt kei Vilate Allen Cardon mai Mesa, Arizona e Amerika, ka sucu ena Tiseba ni 1948. Ni oti na nona rawata e dua na koroi ni bejila ni veika vakailavo mai na Univesiti na Arizona State, a cakacaka tu ga vakataki koya ena vica na bisinisi e taleitaka. A qai rawata e muri e dua na MPA (Master of Public Administration) mai na Kennedy School ena Harvard University.

Ni bera ni kacivi me Vakaitutu Raraba, a veiqaravi vakaperesitedi ni kuoramu ni italatala qase, daukaulotu ni iteki, peresitedi ni tabana ni kaulotu, bisopi, peresitedi ni iteki, qasenivuli ni iVunau ni Kosipeli, ka qasenivuli ni yavulotu.

“Sa vakasokumuni ira tiko na Luvena e vuravura raraba na Turaga,” e kaya o Elder Cardon. “Se cava ga eda dui sotava tu, sa rauti ira vinaka era lako mai Vua na loloma soli wale i Jisu Karisito.”