E a Yaga Beka?
Na nomu cakacakataka vakai iko ka vakaituvatuva na wasei ni kosipeli kivei ira eda kauwai ka lomani ira sa noda cakacaka ka reki ni noda bula.
Ena koniferedi oqo vakakina ena veisoqoni tale eso se qai oti toka,1 e vuqa vei keda ena vakasamataka tu, na cava beka au rawa ni cakava meu veivuke kina ena kena tarai cake na nona Lotu na Turaga ka raica me tubucake dina ena vanua au vakaitikotiko kina?
Ena kena oqo vata kei na sasaga bibi eso, na noda cakacaka vakamareqeti duadua e toka sara ga ena noda itikotiko kei na matavuvale.2 Ena loma ga ni matavuvale e tauyavutaki tiko kina na Lotu ka yaco tiko kina na tubucake dina.3 Me da na vakavulici ira tiko na luveda ena ivakavuvuli kei na vunau ni kosipeli. E dodonu meda vukei ira mera vakabauti Jisu Karisito ka vakarautaki ira mera papitaiso ena gauna era sa yabaki walu kina.4 Meda yalodina tiko mada oi keda me rawa ni ra raica na noda ivakaraitaki ni noda lomana tiko na Turaga kei na Nona Lotu. Oqo ena vukei ira na luveda mera rekitaka na nodra maroroya na ivakaro, bula marau ena matavuvale, kei na vakavinavinaka ena nodra qaravi na tani. Ena loma ni noda itikotiko e dodonu meda vakamuria na ivakarau a solia o Nifai ena nona a kaya:
“Ia eda sa cakacaka vagumatua … me da vakauqeti ira kina na noda kawa … mera vakabauti Karisito, ka veivinakati tale kei na Kalou. …
“… Eda sa tukuni Karisito, ka rekitaki Karisito, ka vunautaki Karisito, ka parofisaitaki Karisito, ia eda sa vola na ka sa vakatakilai vei keda, me ra kila kina na noda kawa na sala me bokoci kina na nodra ivalavala ca.”5
Eda sa cakacaka vagumatua meda kauta mai na veivakalougatataki oqo vei ira na luveda ena noda gole vata kei ira ki lotu, lotu vakamatavuvale kei na wilika vata na ivolanikalou. Eda masu vakamatavuvale e veisiga, ciqoma na veikacivi eso, sikovi ira na tauvimate kei na galili, ka vakayacora na itavi tale eso mera kila kina na luveda ni da sa lomani ira ka da sa lomana na Tamada Vakalomalagi, na Luvena, kei na Nodrau Lotu.
Eda tukuna ka parofisaitaki Karisito ena gauna ni noda soli lesoni ena lotu vakamatavuvale se dabe ka veivosaki vata kei na dua na gone ka tukuna na noda loloma vua kei na noda ivakadinadina ni kosipeli vakalesuimai.
Eda rawa ni volai Karisito ena noda volavola yani vei ira era tu vakayawa. Vei ira era kaulotu, luveda tagane se yalewa era tiko ena mataivalu, kei ira eda lomana era na vakalougatataki ena noda volavola yani. Na ivola mai vale era sega ni dua na i-meli e vakatotolotaki. Na ivola dina sai koya na kena me tauri e liga, vakasamataki, ka vakamareqeti.
Eda na vukei ira na luveda mera vakararavi ga ki na Veisorovaki ni iVakabula ka kila na veivosoti ni Tamada Vakalomalagi sa dauloloma ena noda vakaraitaki ni loloma kei na veivosoti ena noda itutu vakaitubutubu. Na noda loloma kei na veivosoti ena sega walega ni ra vakayarayarataki mai vakavoleka vei keda na luveda ia sa vakakina na kena tarai cake na vakabauta ka kila ni sa lomani ira na Tamada Vakalomalagi ka na vosoti ira o Koya ni ra saga mera veivutuni ka mera vakayacora na ka vinaka cake sara. Era sa vakabauta na dina oqo baleta ni ra sa sotava talega vakakina mai vei rau na itubutubu e vuravura.
Me ikuri ni cakacaka eda na cakava ena loma ni noda dui matavuvale, e vakavulica kina o Nifai ni “eda sa cakacaka vagumatua me da … vakauqeti ira kina na … wekada, mera vakabauti Karisito, ka veivinakati tale kei na Kalou.”6 Ni da sa lewe ni Lotu i Jisu Karisito ni Yalododonu Edaidai, sa tu kina vei keda yadua na veivakalougatataki kei na itavi ni kena wasei na kosipeli. Eso ka ra gadreva tu na kosipeli ena nodra bula era se bera ni lewena na Lotu. Eso vei ira eda a duavata tu e liu ka sa gadrevi mera vakila tale na reki o ya ena gauna era a ciqoma kina na kosipeli ena dua na gauna e liu ni nodra bula. Na Turaga e lomani rau ruarua o koya e se bera vakadua ni bau taura na kosipeli ka vakakina o koya sa lesu tale tiko mai Vua.7 Ki Vua vakakina vei keda, e sega tu ni dua na ka. Sa dua taucoko ga na cakacaka. Sai koya na talei ni tamata, se cava ga na kedra ituvaki, sa ka cecere ga vua na Tamada Vakalomalagi, vua na Luvena, vakakina vei keda.8 Na cakacaka nei Tamada Vakalomalagi kei na Luvena o ya “mera tucake tale mai na mate na tamata kecega ka rawata na bula tawamudu”9 o ira taucoko na Luvena, se cava ga na kedra ituvaki ena gauna oqo. Sa noda veivakalougatataki o ya meda veivuke ena cakacaka cecere oqo.
E vakamacalataka o Peresitedi Thomas S. Monson na sala meda veivuke kina ena nona kaya: “E dodonu me vakayacori tikoga na noda veiqaravi ni kaulotu. E sega ni se koya taucoko meda dabe vakacegu tiko ka vakasamataka tu na veika eda a cakava e liu. Me vakayacori rawa, e dodonu mo tomana tikoga vakai iko ka vakaituvatuva ena kena wasei na kosipeli.”10
Na nomu cakacakataka vakai iko ka vakaituvatuva na wasei ni kosipeli kivei ira eda kauwai ka lomani ira sa noda cakacaka ka reki ni noda bula. Meu tukuna mada e rua na kena ivakaraitaki.
A tubucake o Dave Orchard mai Salt Lake City, ka vuqa vei ira na nona itokani e kea era lewe ni Lotu. Era a vakauqeti koya sara vakalevu. Me kena ikuri, era sa qai dau sureti koya ki na itaviqaravi na iliuliu ni Lotu e kea. Era a vakayacora talega o iratou na nona itokani. E dina ga ni a sega ni lewena na Lotu ena gauna o ya, a vakalougatataki na nona tubu cake tiko ena nodra veivakauqeti na itokani vinaka ni YDE kei na itaviqaravi ni Lotu. Ni oti na nona vuli ena koliji, a biuta na nona itikotiko, ka vuqa vei ira na nona itokani era sa laki kaulotu. Sa diva lesu o koya na nodra veivakauqeti ki na nona bula.
E dua vei ira na itokani gonevuli nei Dave sa tu ga e vale. Ena veimacawa rau na sota tiko kei nona bisopi na itokani oqo ena nona saga tiko me vakadodonutaka na nona bula ka me laki veiqaravi vaka-daukaulotu. Rau sa qai mai rumu vata tiko kei Dave, ka vakaivakarau ka kena itovo, me rau dau veivosakitaka na vuna a sega ni laki kaulotu kina kei na vuna e sota tiko kina vakawasoma kei bisopi. A vakaraitaka o nona itokani na nona vakavinavinaka ka dokai nona bisopi kei na gauna donu me veivutuni ka veiqaravi kina. A qai kerei Dave ke vinakata me gole talega ki na veivakatarogi e tarava. Sa qai dua dina na veisureti! Ia na usutu ni nodrau veikilai kei na ituvaki, sa vakaivakarau ka kena itovo ga.
A vakadonuya sara o Dave ka yaco sara me sa laki sotavi bisopi. Na ka oqo sa lewa kina o Dave me sa sotavi rau na daukaulotu. A ciqoma e dua na ivakadinadina ni sa dina sara na kosipeli, ka sa lokuci na tikinisiga me sa papitaiso kina. A papitaisotaki Dave kina o nona bisopi, ni oti e dua na yabaki, rau a vakamau o Dave Orchard kei Katherine Evans e valetabu. E lima na luvedrau totoka. E ganequ gone o Katherine. Au na dau vakavinavinakataka tu ga vei nona itokani vinaka, vata kei na dua na bisopi vinaka, ni rau a kauti Dave mai ki na Lotu.
Ni tukuna tiko o Dave na nona saumaki mai ka cavuta na nona ivakadinadina me baleta na veika sa mai yaco, a taroga kina, “Sa qai yaga beka? Sa qai yaga dina beka na nodra sasaga taucoko na noqu itokani kei na iliuliu ni itabagone kei noqu bisopi, ena veiyabaki kece oqo, me papitaiso kina e dua walega na cauravou?” Ni dusi Katherine kei iratou na luvena e lima, a kaya, “Ia, me baleti watiqu mada ga kei na lima na luvei keirau, sa kena isau na io.”
Ena gauna cava ga e wasei kina na kosipeli, e sega ni “dua walega na cauravou.” Ni gauna e yaco kina na saumaki mai se nona lesu e dua vua na Turaga, sa vakabulai kina e dua na matavuvale. Ni ratou sa tubu cake na luvei Dave kei Katherine, era sa ciqoma taucoko na kosipeli. Ratou sa laki kaulotu sara e dua na luvedrau yalewa kei na rua na cauravou ka dua se qai ciqoma walega na nona ivola me laki kaulotu ena tabana ni kaulotu Vosa Vakajamani mai Alpine. Oi rau na qase cake rau sa vakamau e valetabu, kei koya e gone duadua e tiko e koronivuli torocake, ka yalodina tiko ena ivakarau kecega. E a yaga beka? Io, e yaga dina sara.
A tiko talega o Sister Eileen Waite ena koniferedi ni iteki vata ga a tukuna kina o Dave Orchard na nona saumaki mai. Ena gauna taucoko ni koniferedi, sa vakasamataka tu ga na nona matavuvale ka vakabibi o ganena, o Michelle, ka sa dede sara na nona sega tu ni mai Lotu. Sa veibiu o Michelle ka sasagataka tiko me qarava na luvena e va. A vakauqeti na yaloi Eileen me vakauta vua e dua na ilavelave ni ivola nei Elder M. Russell Ballard na Our Search for Happiness, vata kei na nona ivakadinadina, ka vakayacora sara. Na macawa e tarava a tukuna vei Eileen e dua na itokani ni sa lomana talega me veitaratara kei Michelle. Na itokani oqo a qai volavola talega vei Michelle ka wasea vua na nona ivakadinadina ka tukuna vua ni lomani koya. E sega beka ni ka kurabuitaki na kena dau cakacaka na Yalotabu ki na vica na tamata me vukei kina e dua e vakaleqai tu?
Sa toso na gauna. A qiriti Eileen o Michelle ka vakavinavinakataka na ivola. A kaya ni sa tekivu me vakila ni sa sega vua na nona bula vakayalo. A kaya vua o Eileen ni kila tu o koya ni vakacegu a vaqara tiko ena rawa ga me kunei ena kosipeli. A kaya vua ni lomani koya ka gadreva me bula marau. Sa tekivu me veisautaka na nona bula o Michelle. Vakalailai ga a sotava kina e dua na turaga vinaka e gugumatua sara ena Lotu. Rau a qai vakamau ka oti e dua na yabaki rau a laki vauci ena Valetabu e Ogden, Utah. Dua na gauna sa oti, a papitaiso kina o luvena tagane yabaki 24.
Kivei ira na vo ni matavuvale nei Michelle kei ira taucoko era se bera tiko ni kila ni dina na Lotu oqo, au sureti kemuni mo ni vakasamataka ena masumasu ke dina na Lotu. Me ratou veivuke mai na nomu matavuvale kei na itokani kei rau na daukaulotu. Ena gauna o sa kila kina ni sa dina, ni sa vakakina, gole mai meda mai duavata ena ilakolako vata ga ki na nomu bula.
Na icavacava ni italanoa oqo e se bera ni volai, ia sa mai soli vua na marama vinaka kei na nona matavuvale oqo, na veivakalougatataki ena nodra cakacakataka e dua na veivakauqeti o ira era lomani koya, ena sala veivakauqeti kei na sala e kena ivakarau ka kena itovo ga mera wasea na nodra ivakadinadina ka sureti koya me lesu mai.
Au sa dauvakasamataka vakalevu na veika e rua oqo. E dua na cauravou a cakacakataka tiko me vakadodonutaka na nona bula a vukea e dua tale na cauravou a vakasaqara tiko na dina. E dua na marama a wasea na nona ivakadinadina kei na nona vakabauta vei tacina sa yali tu mai vakadede ena Lotu ena 20 na yabaki. Kevaka meda na masu ka kerea vua na Tamada Vakalomalagi o cei meda na vukea ka yalataka meda cakacaka ena veivakauqeti e solia mai o Koya ka vakatakila vei keda na sala meda veivuke kina, ena sauma mai o Koya na noda masu ka da yaco meda sa iyaya ni cakacaka ena Ligana meda vakayacora kina na Nona cakacaka. Ni da cakacaka ena loloma ena veivakauqeti mai vua na Yalotabu sa yaco me dauveivakarautaki.11
Ena nomuni sa mai rogoca na veika a yaco ena kena vakaivakarau ka kena itovo ga me wasei yani na kosipeli vei ira o dau kauwaitaki ira, e vuqa vei kemuni sa sotava talega me vakataki Eileen Waite. Ko ni a vakasamataka e dua e dodonu mo dodoliga yani kina ka sureti koya me lesu mai se wasea vei koya na lomamu baleta na kosipeli i Jisu Karisito. Sa noqu veisureti mo ni cakava yani, kakua tale ni vakadaroya, na veivakauqeti o ya. Vosa vua e dua na itokani se lewe ni matavuvale. Cakava ni sa kena ivakarau ka kena itovo ga. Mera kila ni ko sa lomani ira vakakina na Turaga. Sa rawa mera veivuke na daukaulotu. Na noqu ivakasala e tautauvata kei na kena a solia o Peresitedi Monson ena vuqa na gauna ena itutu ni vunau vata ga oqo: “Kakua ni vakadaroya e dua na veivakauqeti.”12 Ni ko sa cakacaka ena veivakauqeti ka vakayacora ena loloma, mo sarava ga na kena vakayagataka na Tamada Vakalomalagi na nomu gagadre mo cakacaka me yaco kina e dua na cakamana ena nomu bula kei na nona bula ko kauwai tiko kina.13
Kemuni na taciqu kei na ganequ, eda na rawa ni tara cake na Nona Lotu ka raica na kena tubu cake dina ni da cakacakataka yani meda kauta mai na veivakalougatataki ni kosipeli ki na noda matavuvale vakakina vei ira eda sa lomana. Oqo na Nona cakacaka na Tamada Vakalomalagi vata kei na Luvena. Au kila ni Rau bula tiko ka Rau dausauma mai na noda masu. Ni da cakacakataka yani na veivakauqeti oqori, ka vakabauta na Nodrau gugumatua me yaco rawa na cakamana, ka na yaco na cakamana ka veisau na bula. Ena yaca i Jisu Karisito, emeni.