Carole M. Stephens

iMatai ni Daunivakasala ena Mataveiliutaki Raraba ni iSoqosoqo ni Veivukei

E dau vakarokorokotaka tu ga o Carole Manzel Stephens na veika tabu ka savasava. Na vakarokoroko oqori a tekivu ni goneyalewa gone sara, ni vauci vata na nona matavuvale ena valetabu ni oti na nona saumaki mai o tinana ki na kosipeli.

“Au sega ni kila vinaka na veika kece a yaco tiko,” e tukuna na daunivakasala vou ena mataveliutaki raraba ni iSoqosoqo ni Veivukei. “Ia au kila ni dua na ka bibi. Au sa qase toka meu nanuma rawa ni valetabu e dua na vanua tabu.”

A sucu ena Maji 1957 vei rau o Carl L. kei Forest Manzel, e ikatolu o Sisita Stephens vei ira e ciwa na gone ka tubu cake mai Ogden, Utah e Amerika. E nanuma vinaka toka na ivakaraitaki e rau dau vakaraitaka na nona itubutubu me baleta na veiqaravi, solibula, kei na kena ibalebale me vakaliuci na matavuvale kei na Lotu.

“E ka kecega vei rau na kosipeli, ka rau vakaraitaka vei keitou ena nodrau ivakaraitaki se cava na veiqaravi Vakarisito,” e kaya o koya. “Erau vakavuvulitaka vei keitou na ibalebale ni veiqaravi—na ivakarau dina ni veiqaravi.”

Ni rau veiqaravi na nona itubutubu ena itavi duidui eso, erau dau okati iratou na luvedrau. Ena veigauna vaqori sa dau tarai cake kina na kedra isema vakaveitokani—e dua na ka erau dau tovolea kei na watina o Martin “Marty” Stephens, me rau vakayacora vei ira na luvedrau le ono.

Erau a sota kei Marty ni rau vuli tiko ena Weber State University mai Ogden e Utah, na vanua ka laki vulica kina me baleta na imatai ni tabavuli. Erau a vakamau ena Epereli ni 1976 ena Valetabu e Logan Utah. E kaya o Sisita Stephens o rau kei na watina e dua na “timi qito yadua” cecere ena veiyabaki ni rau dau veitokonitaka na nodrau itavi duidui, oka kina na nona ilesilesi vakaperesitedi ni iSoqosoqo ni Veivukei ena iteki kei na tabanalevu, daunivakasala, qasenivuli, ka iliuliu ni Sikauti; qasenivuli ni semineri; ka daukaulotu cakacaka ni Lotu.

“Ena loma ni osooso, keirau sa dau kunea e levu na marau kei na reki,” e kaya o koya. “Keirau dau okati ira na luvei keirau kei na makubui keirau ena neirau veiqaravi. Ena vuku ni ka oqori, keirau sa tara cake kina e dua na isema kaukauwa sara vakamatavuvale ni keimami veiqaravi vata tiko.”