Linda S. Reeves

iKarua ni Daunivakasala ena Mataveiliutaki Raraba ni iSoqosoqo ni Veivukei

A vulica o Linda Sheffield Reeves ena nona gauna vakaitabagone mai vua na tinana yalodina ka a saumaki mai me dau goleva na Kalou ena veigauna ni dredre ka segata me uasivi cake me vaka na ivakavuvuli nei tamana.

“Au a rawata na ivakadinadina kaukauwa ena gauna taumada ni noqu bula ka vukei au vakayalo meu matua totolo cake,” e kaya o koya.

A sucu o Sisita Reeves mai Los Angeles, California e Amerika, ena Okosita ni 1951 vei rau o Elbert Jolley kei Barbara Welsch Sheffield. E nanuma ni dau raica cake na lomalagi ka sinai tu ena veikalokalo ni se qai yabaki 13 ena keba ni Goneyalewa ka cabora e dua na masu rawarawa mai vu ni yalona: “Tamaqu O tiko beka li?”

“A ologi au na Yalona, na noqu kila ni tiko voli, kei na Nona loloma ena vukuqu,” e kaya o koya.

A sotavi Melvyn Kemp Reeves o Sisita Reeves ena nona tabanalevu e Pasadena. Erau a veigadivi voli ena gauna erau vuli vata tiko kina ena Brigham Young University ni oti na nona kaulotu. Erau a vakamau ena June ni 1973 ena Valetabu na Los Angeles California ka yaco me rau nodra itubutubu e 13 na gone.

Ena loma ni veivakatovolei, a taura matua toka o Sisita Reeves na nona ivakadinadina ni Veisorovaki, vakauasivi ni oti na nona mate na luvena yalewa yabaki 17, o Emily Michelle, ena dua na vakacalaka ena motoka ena 2005.

“E dua na qasenivuli cecere na veika dredre,” e kaya o koya. “Na veika dredre e tarai keda cake ka vakarautaki keda ki na veiqaravi mai muri ena matanitu, ena noda matavuvale, kei na noda itikotiko, ka vakakina ena noda yaco me da iyaya ni cakacaka ena ligana na Turaga.”

Ni bera ni kacivi ki na mataveiliutaki raraba ni iSoqosoqo ni Veivukei, erau a veiqaravi vata kei watina o Sisita Reeves ni vakatulewataka tiko na Tabana ni Kaulotu na California Riverside mai na 2008 ki na 2011. Sa veiqaravi oti vakaperesitedi ni iSoqosoqo ni Veivukei, peresitedi ni Goneyalewa ena tabanalevu, daunisere ni Lalai, ka qasenivuli ni Wilivola ni Sigatabu.

A taurivola o Sisita Reeves mai BYU ena 1974 ena dua na koroi ni bejila ena itabavuli bibi. E dau taleitaka e vuqa na ka, me vaka na cakacakaniliga, ivakatagi, veitaba, volakawa, kei na cakacaka ni kaulotu. E sega ni dau rere ni tukuna na veika e tu e lomana, vakauasivi ena kena wasei na kosipeli i Jisu Karisito vei ira kecega e sotava.