Na Ia Faamanuiaina Au Nota Le Lelei
Randy Lonsdale, Alberta, Kanata
Na mumu sesega ou taliga i le maasiasi ina ua uma ona ma usuina ma lou atalii talavou o, Derek, le pese “Be Still, My Soul”1 i le sauniga faamanatuga. E lei lelei le sauniuniga o lou leo ao lei amataina le sauniga, ma o le taunuuga la, ina ua ou taumafai e usu se nota maualuga, na matuai ta’e lava lou leo.
Sa ou toe nofo ifo i lou nofoa, ma lagona o le le mautonu e ui i foliga ataata ma le lagolagosua mai o lo’u toalua, ma faamautinoa mai ia te au ou te lei aveesea le agaga o le sauniga.
Ina ua maea le tatalo faaiu sa ou agai atu i la’u taavale e aumai se tusi lesona. Sa tu i autafa o le faitotoa se tamaitai o le matou uarota, o loo masūsū. Sa fesoasoani atu sana uo ia te ia i le tuu o lona lima i lona tauau. A o ou ui atu i autafa, sa valaau mai lou igoa e le tamaitai lea na tagi ma faailoa mai lona agaga faafetai ia te au mo le filifilia o le pese na ma usuina ma le ala na usuina ai lea na matuai ootia ai lava o ia.
Sa ia faamatala mai sa fanau le au lana pepe i nai aso ua mavae, ma sa ia tauivi ai ma le ita ma le faanoanoa talu mai lena taimi. A o ma usuina ma Derek le pese, sa ia lagonaina le au’iina o lona agaga ootia e le Agaga i se faamafanafanaga toafilemu ma le faamafanafana loto. Na faatumulia o ia i le faamoemoe na ia manaomia e tauave ai lona satauro o le faanoanoa.
Sa ou memumemu atu ma le le to’alelei le faafetai ma agai atu i le faitotoa, ma le lagona faamanuiaina ma le faamaualalo ona o ana upu. Ina ua ou oo atu i le taavale, sa ou manatua se lauga i se faigalotu na saunia e Kim B. Clark, o le peresitene o le Iunivesite o Polika Iaga—Idaho. Na ia faapea mai, “A tatou galulue i le faatuatua ia [Iesu] e fai Lana galuega, tatou te o faatasi ma Ia” e auauna atu i isi ma “faamanuiaina i tatou e ta’u atu tau lava o mea e manaomia ona latou faalogo i ai.” Sa ia aoao mai foi o “mea moni tatou te fai atu ai ma faia atonu e lagona ai si le mautonu po o le le lelei ona polesiina. … Ae e aveina e le Faaola a tatou upu ma a tatou amioga ma Na te tauaveina e ala i Lona agaga i loto o tagata. Na te tauaveina a tatou taumafaiga faamaoni ae e le o atoatoa ma liliuina i se mea e fetaui lelei lava, ioe, i se mea e atoatoa.”2
Na maligi o’u loimata o le agaga faafetai a o ou toe foi atu i le falelotu. Na faamanuiaina e le Alii se musika e lei lelei le polesiina ma tauaveina atu atoatoa lana savali i le loto faavauvau o se tamaitai talavou e faamafanafana ai lona agaga faanoanoa. E le gata i lea, na faaaogaina e le Alii lenei aafiaga ootia e momoli mai ai i totonu o lo’u loto se malamalamaaga sili atu o se mataupu faavae loloto o le talalelei.