O Le Alofa o le Tama Faalelagi
Ana Nikiticheva, Rusia
I se taimi ua mavae atu, sa talosaga mai ai ni a ma uo pe mafai e lo la atalii o Ioane, ma lana uo teine ona nonofo i lo matou fale mo se vaiaso e asiasi mai ai. O Ioane e le toaga i le lotu, ae o lana uo teine e le o se tagata o le Ekalesia. Sa ma tuuina le teine i le potu o le ma tama tama ae tuu Ioane e moe i le nofoa umi i totonu o le potu malolo.
A e la te lei taunuu mai, na ma tatalo i le Tama Faalelagi, ma fesili i ai pe faapefea ona ma faailoa atu i maua ia i laua — pe o ni faiaoga, matua, pe tau lava o ni uo? Na oo mai le tali e manaomia ona ma mulimuli i musumusuga a le Agaga ma fesoasoani ia i laua faaleagaga.
O afiafi uma lava matou te saofafai ai i lalo ma lou toalua, le ma atalii, ma suesue i tusitusiga paia. O le afiafi muamua ma o matou malo, na matou lagona ai e le tatau ona valaauliaina i laua matou te suesue faatasi. Ae o le afiafi na sosoo ai a o le’i faia ia suesuega o tusitusiga paia, na tuitui mai Ioane ma le matamuli i lo ma faitotoa ma fai mai, “E fefe Maria e fesili atu, ae sa ia fia iloa pe mafai ona ma faatasi atu ia te outou.”
Na matou tatalaina le faitotoa, valaaulia i laua e o mai i totonu, ma amata ona suesue faatasi i le Tusi a Mamona. E lei faitau muamua lava Maria i ni tusitusiga paia ma e na te le iloa pe na te talitonu i le Atua. Sa ia ta’u sao mai lava ina ua oo mai i lo matou fale, sa fefe nei matou taumafai e faaauai o ia i se mea faalelotu na te le malamalama i ai.
Ina ia faato’afilemuina ia Maria, sa faamatala atu e lo’u toalua ia te ia le ata o le faaolataga, le Faaola o Iesu Keriso, le Uluai Faaaliga a Iosefa Samita, ma le Tusi a Mamona. Sa matou talatalanoa seia oo i le vaeluapo.
O le aso na sosoo ai, na matou faatasi ma Ioane ma Maria e talatalanoa ma faifeautalai. O le a le galo lava ia te au le agaga na faatumulia ai le potu. Ina ua maea se talanoaga faigofie, sa matou talanoa e uiga i le natura o lo tatou Tama Faalelagi. Ona fesili mai lea o Maria pe aisea e faataga ai e le Atua mafatiaga pe afai e alofa o Ia ia i tatou, o se fesili lea sa ou mafaufau loloto i ai mo se taimi umi.
I ni nai aso ua mavae atu na ou mauaina ai se tusi mai se uo o lē na faatolu ona faaletonu ona ma’itaga, ma o le fesili a Maria na ou ootia ai. Ou te molimau atu e le tutusa le loloto ma le faavavau o le aoaoina o i tatou i nisi taimi e le fiafia ma le olioli nai lo taimi o faalavelave faaletagata lava ia. Sa ou ta’u atu ia Maria e mafai ona faamalosia e le faanoanoa i tatou e pei foi ona faia e le afi i le uamea. Afai tatou te tumau faamaoni i le Atua ao tatou uia tofotofoga, o le a tuputupu ae lo tatou faatuatua.
O se talanoaga sa le mafaagaloina. Mulimuli ane na matou nonofo le leoa ao molimau mai le Agaga i le alofa o lo tatou Tama Faalelagi. Ina ua ea ae i luga ia Maria, na susulu ma loimatā ona mata.
Ou te le iloa se mea o le a tupu i tausaga a sau, ae ou te iloa ma le mautinoa o le malamalama sa ou vaaia i mata o Maria i lena aso, o le a fesoasoani ia te ia i lona olaga atoa ma atonu o le a fesoasoani e taitai atu o ia i lona Tama Faalelagi.