O Le Lauga i tua atu o le Pulelaa
Jeff Fullmer, Idaho, ISA
A o nonofo lou aiga i nai atulaina i tua atu o tiakono i se tasi sauniga faamanatuga, na pau lava le mea na ou mafaufau i ai ao lei usuina le pese amata o se tasi o tiakono e lei seleina faalelei lona fusiua umi, ma le le sao o le tuuina i totonu o lona ofutino maanuminumi. Sa ou mafaufau e tatau i se tagata ona fesoasoani ia te ia. Aua o le mea moni lava, a o tufaina le faamanatuga, o tiakono e tatau ona avea ma faaa’oa’o le o Faaola i le faatinoga ma laei.
Na faaauau le sauniga, ma na galo o ia ia te au. Ina ua uma ona tufa e le au tiakono le faamanatuga, sa amata loa lauga. O le failauga lona lua o le tina o le alii talavou lea. Sa ia lauga i lona liliu mai, i ona tofotofoga i le tuputupu ae, ma ona tauiviga i le avea ai ma se tina nofofua. O se lauga matagofie lea na tuua ai o ia i loimata. Sa ia nofo i lona nofoa i le tulaga ma faaauau pea ona tagi ao faapotopoto le aufaipese o le uarota e pepese.
I lena lava taimi, sa tu ai i luga lana tama ma lona fusiua pio ma lona ofutino o loo tautau mai i fafo, ma savali atu i le tulaga. Sa ia opoina mai lona tina ma faapuupu atu i ona autafa e faamafanafana ia te ia. Na oo mai loimata i ou mata ao faatino mai lenei mea i ou luma; sa ou lagona le ootia ma lē magagana. Ona gafoa ae lea o se malamalama, ma sa punou ifo lo’u ulu. I le saofai ai ma lo’u peleue mafolafola e lua itu, faatasi ai ma lo’u fusiua ua lelei le seleina ma seevae uli ua uma ona polesi, sa ou iloa ai lou matuai misia lava o se mea i le saunia ai mo le faamanatuga.
Na o mai i lalo mai le tulaga le alii talavou ma lona tina ma nonofo faatasi a o amata ona usuina e le aufaipese le pese. Sa ou saofai ai iina, na le mafai ona ou faalogologo i le musika, aua o le lesona na aoao mai e lenei tiakono na faatumulia ai lo’u loto i se savali o le alofa faa-Keriso.
Sa ia faatinoina lana galuega ma le faapelepele ma le alofa. E lei i ai ma sina faailoga o le mā i ona foliga talavou—na o le alofa mama lava. O savali na sosoo ai i luga o le pulelaa i lena aso sa lelei, ae o le a ou manatua pea le lesona i tua atu o le pulelaa.