2013
Tiakono Fou e Toalua
Setema 2013

Tiakono Fou e Toalua

Anthony Poutu, Niu Sila

O ni nai tausaga ua mavae, sa ou maua ai le avanoa e auauna atu o se faufautua o le korama a tiakono. I la matou korama sa i ai ni tiakono toaaga e tolu, na valaauina i latou uma e avea ma se vaega o le au peresitene o le korama.

I se tasi o a latou fonotaga, sa filifili ai lenei au peresitene talavou latou te mananao ina ia le itiiti ifo ma le toalua ni tiakono e le toaaga i le latou korama ia amata ona auai i sauniga Lotu ma gaoioiga. Sa latou faatulagaina ma le agaga tatalo se aso—o se Aso Sa e ono vaiaso le mamao—lea ia ausia ai la latou sini. Sa latou tatalo mo le manuia o lenei taumafaiga paia ma tuuto atu ma le agaga tatalo ina ia faia mea nei:

  • Tatalo faatasi e le aunoa.

  • Anapopogi faatasi.

  • Asiasi i tiakono taitasi o loo i le tauvalaauga.

  • Fuafua gaoioiga, ina ia mafai ona ulufale atu se tiakono e toe foi mai i se polokalama e lelei le faatulagaina.

Na maua e le au peresitene se lagona loloto e faapea, o nei sini o le finagalo lea o le Alii, ma o lea sa latou agai ai loa i luma i le faatuatua ma le mautinoa.

I le aluga o vaiaso na sosoo ai, na faia ai e nei alii talavou e toatolu mea na latou folafola atu, ma faamoemoe o le a tali mai a latou tatalo. Sa latou tatalo faatasi, anapopogi faatasi, asiasi atu i tiakono le toaaga ma valaaulia i latou e toe foi mai, ma saunia ni gaoioiga, ma talitonu e tatau ona latou saunia mo le faateleina o le auai.

E ui lava i lo latou maelega, e leai ni tiakono na toe foi mai—i le lotu po o soo se isi gaoioiga lava. Na lata mai le aso, ma e ui sa latou le fiafia i le le foi mai o tagata o lo latou korama i le lotu, ae na tumau pea le faatuatua o alii talavou o le a tali mai e le Tama Faalelagi a latou tatalo.

Na oo mai ai le Aso Sa tuupoina o le latou sini, ma e leai se tasi o alii talavou ia na aapa atu i ai le au peresitene na o mai i le lotu. Ae na folafola mai e le epikopo i le taimi o le sauniga faamanatuga e toalua ni alii talavou e tai 12-tausaga-le-matutua o e na sailiili i le Ekalesia o le a papatisoina i lena afiafi.

Oka o se faamanuiaga mo nei tagata fou o le Ekalesia e toalua e auai atu i se korama o i ai sea ituaiga au peresitene. Ma o se faamanuiaga mo le au peresitene le vaaia o le tuusao mai o tali ia latou taumafaiga ma tatalo ma le iloaina e tausia e le Alii Ana folafolaga.

O se ituaiga fiafiaga lea na i ai i totonu o le korama lea na fai mai ai se tasi o sui o le au peresitene, “Sei o tatou toe faia lenei mea.”