Avea Pea o se Valaau Malosi

Saunia e Richard M. Romney

Mekasini a le Ekalesia

Ua tautino mai e perofeta ma aposetolo e faapea. “O Le Aiga: O Se Folafolaga i le Lalolagi” ua sili atu foi le taua i aso nei nai lo le taimi na tuuina muamua mai ai.

I se lalolagi lea ua lamatia ai faaipoipoga ma osofaia ai aiga masani, e tasi se faamaumauga patino ua tuuina mai ai le manino ma le taitaiga. Ua saunoa perofeta ma aposetolo e faapea, “O Le Aiga: O Se Folafolaga i le Lalolagi” e tutusa lava pe ua sili atu foi le faatatauga i aso nei nai lo le taimi sa tuuina mai ai i le 1995.¹

O Se Tagavai o le Saolotoga i Onapo Nei

O le folafolaga i le aiga ua tumau pea ona avea “ma se valaau malosi e puipui ma faamalolosia aiga,” o le saunoaga lea a Elder M. Russell Ballard o le Korama a Aposetolo e Toasefululua.²

O le tatou lalolagi ua tutusa lava ma le nuu o sa Nifae lea sa atili faasolo ina amioleaga i le Tusi a Mamona, ma ua uunaia e Elder Ballard le Au Paia o Aso e Gata Ai ia “fai [le folafolaga] ma se tagavai ia pei o le ‘tagavai o le saolotoga’ a le Taitaiau o Moronae, ma ia tautino atu o tatou tagata ina ia ola ai i ona mataupu.”³

Taua Tele i le Fiafia

E tele auala eseese i le fiafia ua faalauiloa mai e le lalolagi. Ae ua folafola mai e perofeta o aso nei e faapea, o auala aupito silisili e maua ai le fiafia o loo i ai lea i le faaipoipoga faaselesitila.⁴

Afai tatou te ola ma galulue e tusa ai ma lo tatou malamalamaaga e faapea e mafai ona faavavau aiga, ua folafola mai e Elder Ballard, “o le a tatou faatosina maia le lalolagi ia i tatou. O matua e tuu se faamuamua maualuga i o latou aiga o le a agai mai i le Ekalesia. …

“O la tatou vaaiga e faatotonugalemu i le aiga, e tatau ona faia ia tauivi ai le Au Paia o Aso e Gata Ai ia avea ma matua e sili ona lelei i le lalolagi. E tatau ona tatou maua ai se faaaloalo tele mo a tatou fanau, o e moni o o tatou tei faaleagaga, ma e tatau ona afua ai ona tatou tuuto atu soo se taimi e manaomia e faamalolosia ai o tatou aiga. O le mea moni lava, e leai se mea e sili atu ona taua lona fesootai i le fiafia—e le gata mo tatou ae faapea i a tatou fanau—nai lo le lelei o le tatou alolofa ma lagolago le tasi ma le isi i totonu o le aiga.”⁵

Malosi e sili atu nai lo Lou Lava [Malosi]

Ua fautuaina e Elder Ballard ia aiga i soo se mea ia i ai se kopi o le folafolaga ma ia faaogatasi i latou lava ma ona aoaoga.

“Ia avea ma tagata e sili atu ona lelei ma ia galue i le mea sili e te mafaia. O le a tuuina atu e le Atua ia te oe le malosi e sili atu nai lo lou lava malosi a o e taumafai i aso taitasi e faataunuu ia tiutetauave faaleolaga nei e aupito sili ona paia ua Ia tuuina mai i Lana fanau. Faalogo i le leo o le Agaga ma fautuaga a perofeta soifua. Ia outou lototetele. E le’i tuuina mai oe e le Atua i luga i le lalolagi ina ia toilalo, ma o au taumafaiga i le avea ai ma matua o le a le faitaulia o ni toilalo seiloga lava ua e fiu.”⁶

Faamoemoe mo le Ola Faavavau

Ua aoao mai le folafolaga i le aiga e faapea o aiga e mafai ona tumau e faavavau. Ua aoao mai Elder Russell M. Nelson o le Korama a Aposetolo e Toasefululua e faapea “e ui o le faaolataga o se mataupu e patino i le tagata, ae o le faaeaga o se mataupu faaleaiga. … A faamauina se aiga i le malumalu, e mafai ona faavavau lena aiga e pei foi o le malo o le Atua lava ia.”⁷

Ua faamalamalama mai e Peresitene Henry B. Eyring, Fesoasoani Muamua i le Au Peresitene Sili e faapea, o o tatou aiga ‘o le iunite faavae e le gata i malo ma le Ekalesia, ae faapea foi i lo tatou faamoemoe mo le ola e faavavau.”⁸

O Se Lapataiga ua muamua mai i Lona Taimi

Ua lapatai mai Peresitene Eyring, o taunuuga o le le amanaiaina o aoaoga i le folafolaga i le aiga, “o le a sili atu ona matautia nai lo le leai o se filemu i lenei olaga po o le leai foi o se fiafia.”⁹

Fai mai a ia, o le folafolaga e faaperofeta, aua ua lapatai mai ai ia tetee i mea tonu lava ua faavaivaia ai aiga i tausaga e le’i mamao atu. Ua ia sii mai le lapataiga faaperofeta ma le valaau ia faatino lea o loo faaiu ai le folafolaga:

“Matou te lapata’i atu o tagata taitoatasi o ē ua solia feagaiga o le ola mama, o ē faasaunoa i taitoalua po o fanau, o ē ua faatalalē i le faataunuuina o tiutetauave faaleaiga, o le a i ai se aso tou te tutū atu ai e tali atu i luma o le Atua. E le gata i lea, matou te lapata’i atu foi, o le faamalepeina o le aiga o le a aumai ai i tagata taitoatasi, alaalafaga, ma malo, faafanoga ia na ulua’i ta’u mai e perofeta anamua ma aso nei.”¹⁰

O Se Pepa o Faamatalaga Faavaomalo

Ina ua faalauiloa mai e Peresitene Gordon B. Hinckley (1910–2008) le folafolaga i le aiga i le fonotaga aoao a le Aualofa i le aso 23 o Setema, 1995, sa ia saunoa ai o lona faamoemoega ina ia “lapatai ma muai lapataia”¹¹ le lalolagi mai le o ese mai tulaga faatonuina [o le aiga]. Talu mai lena taimi, ua faapea ona lolomiina ma faasalalauina ai le pepa o faamatalaga i le tele o gagana, ua faafia ona talanoaina i konafesi aoao, ma ua faaalia i falelotu ma aiga i le lalolagi atoa. O se folafolaga faaperofeta ua tuuina mai e se Tama Faalelagi alofa e aumai ai le taitaiga i Lana fanau—le taitaiga lea sa leai se isi taimi ua sili atu ai ona manaomia nai lo le taimi nei.