O le mea ou te nofo ai, afai lua te o ma se tagata i se tafaoga faamasani se tasi, ona faapea lea ua oulua feoai tumau o se alii ma se tamaitai. E mafai faapefea e se tagata ona tafao faamasani i ni tagata eseese e aunoa ma le mauaina o se tulaga le tauleleia faapea o se tagata faitaa pe le faamaoni foi?
Ata na tusia e Matthew Reier; coins © Thinkstock/iStockphoto
O se luitau tele lea mo le toatele o talavou o le Au Paia o Aso e Gata Ai i le lalolagi atoa. Ua fautuaina i latou e “aloese mai le tafafao soo ma le tagata lava e tasi” ina ia aua nei o latou atinaeina se mafutaga tumau i se vaitausaga laiti (Mo le Malosi o le Autalavou [tamaitusi, 2001], 4). Ae i le tele o aganuu i le lalolagi, o le valaaulia mo se mafutaga o se uo tama/uo teine e masani lava ona tupu a o lei faia se tafaoga faamasani muamua; ma e faapena foi, o le na o le tasi o se tafaoga faamasani e mafai ona tupu mai ai se mafutaga faapitoa ma se faamoemoega mo se tautinoga. I se aganuu faapena, o le tafao faamasani ma ni tagata eseese o le a foliga mai o le a solia ai se “mafutaga” ma e mafai ona faapea ai o oe o se tagata faitataa pe le faamaoni. O le a la le mea e tatau ona e faia?
Muamua lava, ia mautinoa ua uma ona faailoa i tagata uma lou talitonuga ma tautinoga i tulaga faatonuina a le Alii e faatatau i le ola mama ma le mama mai feusuaiga ina ia aua lava nei i ai se masalosalo e uiga i lou tagata ma au amioga. O le isi mea e sosoo ai, e mafai ona e galue ma le punouai e suia le aganuu o loo siomia ai oe e faatatau lea i tafaoga faamasani, mo le lelei e ala i le talanoa atu e uiga i taiala o le Ekalesia. Afai e fesiligia oe e tagata e uiga i ou tulaga faatonuina o tafaoga faamasani, fesili atu ia te i latou pe aisea, afai latou te le o saili e faaipoipo i se taimi vave, latou te lagonaina ai le manaomia o se mafutaga faalelagona ma faaletino molitino i se vaitausaga talavou. Valaaulia i latou e auai atu i se aso o se tafaoga faamasani faalevaega ina ia latou iloa e mafai ona latou maua le fiafia a o aloese mai se mea matautia e le manaomia ma mea e tutupu faalelagona i faigauo talavou. Ma faailoa atu ia i latou ia taiala ma apoapoaiga ua e mauaina e ala mai perofeta soifua ma aposetolo.