E ti’aturira’a mo’a

Nā te peresideni Thomas S. Monson

’Āpitihia i teie ō faufa’a rahi nō te mana autahu’ara’a, e ’ere i te mau hōpoi’a noa, e mau ha’amaita’ira’a ta’a ’ē ato’a rā nō tātou ’e nō vetahi ’ē.

E au mau taea’e here, tē pure nei au i te Vārua ’ia arata’i mai i ta’u mau parau i teie pō. E taura ta’a ’ē e tā’amu ra ia tātou. ’Ua ti’aturihia tātou ’ia mau i te autahu’ara’a a te Atua ’e ’ia ’ohipa i Tōna i’oa. E ti’aturira’a mo’a e vai ra i ni’a ia tātou. E rave rahi te tia’ihia nei ’ia tātou.

Tē tai’o nei tātou i roto i Te Parau Ha’api’ira’a ’e te mau Parau Fafau, te tuha’a 121, te ’īrava 36, « ’ua ha’amau-roa-hia atu te mau ti’ara’a nō te autahu’ara’a i te mau mana nō te ra’i ra ». ’Auē ïa ō fa’ahiahia tei hōro’ahia mai ia tātou. Tei ia tātou nei te hōpoi’a ’ia ha’apa’o ’e ’ia pāruru ’e ’ia vai ti’amā noa i te mau ha’amaita’ira’a hanahana ato’a tā tō tātou Metua i te Ao ra i fa’ata’a nō tātou—’e nō vetahi ’ē nā roto ia tātou.

Te vāhi e haere ’outou, e haere ato’a tō ’outou autahu’ara’a nā muri ia ’outou. Tē ti’a ra ānei ’outou i te mau vāhi mo’a ? Hou ’a tu’u ai ia ’outou iho ’e tō ’outou autahu’ara’a i roto i te fifi nā roto i te haerera’a i roto i te tahi mau vāhi ’e ’aore rā, te ’āmuira’a atu i roto i te mau ’ohipa ’aita e au ia ’outou ’e i te reira autahu’ara’a, ’a pārahi i raro, ’e ’a feruri i te mau fa’ahope’ara’a. ’A ha’amana’o ’o vai ’outou ’e e aha tā te Atua e tia’i ra ia ’outou ’ia riro mai. E tamaiti ’outou nō te parau fafau. E tāne ’outou nō te mana. E tamaiti ’outou nā te Atua.

’Āpitihia i teie ō faufa’a rahi nō te mana autahu’ara’a, e ’ere i te mau hōpoi’a noa, e mau ha’amaita’ira’a ta’a ’ē ato’a rā nō tātou ’e nō vetahi ’ē. Noa atu te vāhi tei reira tātou, ’ia ti’amā noa tātou nō te pi’i i tō te reira mana, ’aita ho’i tātou i ite i te taime e tītauhia ia tātou ’e e anihia ia tātou ’ia nā reira.

I te tau nō te Tama’i Rahi II o te ao, ’ua tonohia te tahi hoa tō’u i Patifita Apato’a ’e ’ua pūpuhihia tōna manureva ’e topa atu ra i roto i te miti. ’Ua manuia rātou tōna mau hoa i te ’ōu’ara’a ’e tō rātou mau ’amarara i rāpae i te manureva ura, ’ua puhi rātou i tā rātou pa’epa’e ’ua fa’aea noa i reira e toru mahana.

I te toru o te mahana, ’ua haru mai tō rātou mata i ni’a i te hō’ē pahi fa’aora. ’Ua nā te ātea noa mai ia rātou. ’Ia po’ipo’i a’e, ’ua nā te ātea fa’ahou mai ’oia. Ha’amata a’era rātou i te ha’aparuparu i te mana’o inaha ’o te mahana hope’a te pahi fa’aora e teretere ai nā reira.

Paraparau mai nei te Vārua Maita’i i tō’u hoa : « E autahu’ara’a tō ’oe. ’A fa’aue i teie nei feiā fa’aora ’ia haere mai e ti’i ia ’outou ».

’Ua pe’e ’oia i tei muhumuhuhia mai : « Nā roto i te i’oa o Iesu Mesia ’e nā roto i te mana autahu’ara’a, ’a tīpu’u ’e ’a haere mai e ti’i ia mātou ».

Ma’a minuti noa i muri mai, tei pīha’i iho te pahi ia rātou, tē fa’autahia ra rātou i ni’a. E ta’ata ha’apa’o maita’i ’e te ti’amā teie tei mau i te autahu’ara’a, ’e i roto i taua taime ahoaho ra, ’ua fa’a’ohipa ’oia i te autahu’ara’a nō te ha’amaita’i i tōna ora ’e tō vetahi.

’Ia fa’aoti tātou, i ’ō nei ’e i teienei, ’ia fa’aineine ia tātou nō te taime e ’ati noa atu tātou, nō te taime e tāvini tātou, nō te taime e ha’amaita’i tātou.

Tē fa’aoti nei tātou i teie purera’a rahi nā te autahu’ara’a, ’e tē parau nei au ia ’outou ē, « e u’i ma’itihia… ’outou, e autahu’ara’a ari’i » (1 Petero 2:9). ’Ia ti’amā noa tātou nō teie mau parau hanahana rahi, ’o te pure rahi o tō’u nei ’ā’au, i te i’oa o Iesu Mesia, tō tātou Fa’aora, ’āmene.