Elder Peter Meurs

Hitu ’Ahuru Hui Mana Fa’atere Rahi

I tōna ’āpīra’a, tei pīha’i iho te fare o Peter Meurs mā i te fare o te tahi ta’ata e fare toa tāna nō te « tātā’i i te mau mea ato’a » nō te ’ohipa fa’a’apu. E hora rahi tā Peter ’e tōna hoa rahi i roto i te reira fare toa, i te hāmanira’a te mau tauiha’a fa’a’apu ’e te mau pereo’o ta’ata’ahi na’ina’i ’e te mau pereo’o na’ina’i nō te karting. Ē ha’api’i atu ra Peter i te ’ihi mātini i te fare ha’api’ira’a teitei nō Monash University i Melbourne, i Auteraria.

Tē haere noa ra ’oia i tāna ha’api’ira’a ’e i te 18ra’a o tōna matahiti, ’ua fa’aara ihora ’oia i te fare ha’api’ira’a ē, e fa’aea ’oia e piti matahiti nō te tāvini i te hō’ē misiōni nō te ’Ēkālesia. ’Ua parauhia ’oia ē, e nehenehe e fa’ataime hō’ē matahiti, ’ia roa atu rā ’aita fa’ahou ïa tōna pārahira’a i roto i teie fa’anahora’a. ’Ua fa’aoti a’e ra ’oia ’eiaha e haere e tāvini.

’Āria a’e, ’ua fa’aro’o ’oia i te peresideni Spencer W. Kimball (1895–1985) i te a’ora’a i roto i te ’āmuira’a rahi ē, e ti’a i te taure’are’a tamāroa ti’amā ato’a ’ia tāvini i te ho’ē misiōni (hi’o « Planning for a Full and Abundant Life », Ensign, Mē 1974, 87).

« Mai te huru ra ē, tē paraparau mai ra ’oia iā’u. ’Ua ’āfaro noa te reira i roto iā’u », tē ha’amana’o ra Elder Meurs. ’Ātīrā ïa, ’ua fa’aoti ’oia e tāvini. Hō’ē hepetoma hou ’a reva ai, ’ua fāri’i mai ’oia i te hō’ē rata nā te ha’api’ira’a nō te fa’ati’a iāna ’ia fa’anu’u e piti matahiti.

’Ua ho’i Peter i te ha’api’ira’a i muri mai i tāna misiōni, tē parau nei rā ’oia ē, ’ua riro tāna tāvinira’a misiōni ’ei « ha’api’ira’a maita’i a’e tāna i haere ». ’Ua ha’api’i te ’evanelia iāna ē, te « tauturura’a i te ta’ata ’ia manuia te parau tumu rahi roa a’e nō te fa’aterera’a ».

I muri mai i te noa’ara’a tāna parau tū’ite licence nō te ’ihi mātini, ’ua ’ohipa Elder Meurs ’ei ta’ata ’aravihi ha’apa’o ’ōpuara’a nā Essa Auteraria ’e ’ua riro ato’a mai ’ei ’āpiti i roto i te taiete WorleyParsons Limited. Nō ’ohipa noa nei ’oia ’ei upo’o fa’atere nō te fa’atupura’a nō te pupu Fortescue Metals Group.

I muri mai i tāna misiōni, ’ua fa’aipoipo ’oia i te vahine tāna e parau nei ’ei hoa rahi roa nōna, ’o Maxine Evelyn Thatcher, i te 2 nō tenuare 1979, i roto i te hiero nō Hamilton i Niuterani. E 4 tā rāua tamari’i ’e e 9 mo’otua.

’Ua fānauhia Elder Meurs i te 21 nō titema 1956 i Warrnambool, i Victoria, Auteraria e Frederik ’e e Lois Jones Meurs—’ua tāvini ’oia i roto i te mau pi’ira’a e rave rahi, ’ei peresideni pupu peresibutero, fa’ata’i hāmonia, peresideni Feiā ’Āpī Tamāroa nō te pāroisa ’e nō te titi, ’ei upo’o fa’atere nō te ’ohipa ha’apararera’a, ’ei peresideni ’āma’a ’e mata’eina’a, ’ei ’episekōpo, ’ei peresideni titi ’e ’ei Hitu ’Ahuru Ārea.