Tauturura’a i te tītīhoria : « E ta’ata ’ē au »
Ma te ha’amanahia e te Peresidenira’a Mātāmua, ’ua ani te mau peresidenira’a rahi Sōtaiete Tauturu, Feiā ’Āpī Tamāhine ’e Paraimere i te mau vahine ato’a noa atu tō rātou matahiti ’ia pūpū i te tāvinira’a i te mau tītīhoria nā pīha’i iho ia rātou ’e i roto i tō rātou huira’atira nā roto i te tahi tauto’ora’a fa’aora tei topahia te i’oa « E ta’ata ’ē au » (hi’o Levitiko 19:34 ; Mataio 25:35).
« E rave rahi i roto ia tātou te nehenehe e ha’amaita’ihia nā roto i te fa’ahoara’a, te hōro’ara’a i te a’o tauturu ’e te tahi ato’a here ’e tāvinira’a huru Mesia », ’ua parau te tuahine Linda K. Burton, peresideni rahi nō te Sōtaiete Tauturu. « ’Ua riro te reira huru tāvinira’a ’ei tuha’a faufa’a roa nō te ’evanelia.
« Tē fa’aha’amana’ohia ra iā’u te ’īrava e parau nei ē, ’eiaha e ‘fa’a’ore i te ’ite atu i te ta’ata ’e’ē ra, e melahi ho’i tei ’itehia atu e vetahi, ’aore ho’i i ’ite e melahi » (Hebera 13:2), ’ua parau te tuahine Burton. « Tē fa’aitoito nei mātou i te mau tuahine ’ia ’imi nā roto i te pure i te mau rāve’a nō te tāvini ’e nō te feruri i te mau mea e nehenehe e turu i te mau fa’anahonahora’a tīvira ’e huira’atira pāpū. E ’ite ato’a ’outou i te tahi mana’o tauturu i ni’a ia IWasAStranger.lds.org, ’e e nehenehe ato’a tā ’outou e fa’a’ite i te mau ’ohipa i tupu nō ’outou nā roto i te hāponora’a i te rata uira i te IWasAStranger@ldschurch.org.”
’Ua hāponohia te hō’ē rāta a te Peresidenira’a Mātāmua nō ni’a i te ’ōpuara’a « E ta’ata ’ē au » i te mau ’āpo’ora’a titi, pāroisa ’e ’āma’a i te hope’a ’āva’e nō māti ra. E mau arata’ira’a nā te mau feiā fa’atere tei ’āpitihia i te rata. « E nehenehe te mau tuahine e rave i teie tāpura ’ohipa mai te mea ē, e taime tō rātou, ’e ’ia au ho’i i te huru e vai ra », tē a’o nei te rata, « ma te ha’apāpū maita’i ē, ’aita e tītauhia ’ia ‘horo te ta’ata i te ’oi’oi e au ore i tōna ra puai’ ’e ’ia ravehia ho’i ‘te mau mea ato’a ma te pa’ari ’e ma te nahonaho’ (Mosia 4:27) ». Tē fa’aitoito ato’a nei te hō’ē rata a te Peresidenira’a Mātāmua, nō te 27 nō ’ātopa 2015, i te mau melo ato’a ’ia pūpū i te tāvinira’a huru Mesia ia rātou i roto i te ’ati.
’Aita i maoro a’enei, ’ua ’ōpere-ato’a-hia te hō’ē rata nā te mau peresideni rahi o te Sōtaiete Tauturu, te Feiā ’Āpī Tamāhine ’e te Paraimere, ’o tē hōro’a nei i te mau ha’amāramaramara’a hau atu nō ni’a i te ’ōpuara’a « E ta’ata ’ē au », i roto i te mau rurura’a o teie nau pupu.