Tuahine Jean B. Bingham

Tauturu mātāmua, peresidenira’a rahi o te Paraimere

Fātata e ono matahiti, ’ua au noa te tuahine Jean Barrus Bingham i te tāvinira’a i ni’a i tōna pi’ira’a i roto i ’āpo’ora’a fa’atere rahi o te Paraimere. ’Ua tere ’oia nā roto i te fare o te mau melo ’e ’ua haere i te mau Paraimere ’e ’ua ’ite ’oia i te fa’aro’o pūai o te Fei’a Mo’a—tō te mau tamari’i ihoa rā—’ati a’e teie nei ao.

’Ua pi’i-’āpī-hia te tuahine Bingham ’ei tauturu mātāmua i roto i te peresidenira’a rahi o te Paraimere, ’e e tuha’a rahi nō tōna orara’a tāna i ha’api’i, i aupuru ’e i here i te mau tamari’i. Nō tōna ānei nau teina, tāna ānei nā tamāhine e piti, tāna mau tamāhine fa’a’amu, tāna mau mo’otua, te mau feiā e hāhaere nā tōna fare, ’e ’aore rā te feiā tāna i fārerei ’ei melo nō te ’āpo’ora’a fa’atere rahi o te Paraimere, ’ua riro ’oia ’ei arai ’e ’ei puna ha’apūai nō rātou e rave rahi.

« E fāito pūai fa’ahiahia tō te mau tamari’i ato’a, ’e mai te peu e hi’o tātou ia rātou nā roto i te mata o te Metua i te Ao ra, e ti’a ïa ia tātou ’ia tauturu ia rātou ’ia riro mai i te hope o Tāna i ’ōpua ’ia riro mai rātou », tē parau nei ’oia.

’Ua fānauhia ’oia i te 10 nō tiunu 1952 i Provo, i Utah e Edith Joy Clark ’e e Robert Rowland Barrus, ’o te tuahine Bingham te toru o nā tamari’i e iva. I te torura’a o tōna ’āva’e, ’ua fa’anu’u tōna ’utuāfare i Indiana ’ia haere tōna metua tāne i te ha’api’ira’a i reira. I nā matahiti mātāmua e ono o tōna orara’a, e maha tuha’a fenua tā tōna ’utuāfare i noho.

I te otira’a tāna ha’api’ira’a tuarua i New Jersey, ’ua fa’anu’u mai te tuahine Bingham i Provo, i Utah, nō te haere i te fare ha’api’ira’a Brigham Young University. I te piti o te matahiti i reira ’ua fārerei ’oia i te ta’ata o riro mai ’ei tāne nāna, ’o Bruce Bryan Bingham, e tamāroa tei ora i te ’ohipa fa’a’apu i Illinois ’e tei bāpetizohia ’e tōna nā metua ’a taure’are’a noa ai ’oia. ’Ua fa’aipoipo rāua i te 22 nō tītema 1972 i roto i te hiero nō Provo Utah.

’Ua tāvini ’oia i roto i te ’Ēkālesia ’ei peresideni Paraimere nā te pāroisa, ’ei peresideni nō te Feiā ’Āpī Tamāhine, ’ei tauturu i roto i te hō’ē peresidenira’a Sōtaiete Tauturu, ’ei peresideni o te Feiā ’Āpī Tamāhine nā te titi, ’ei rave ’ohipa nō te hiero ’e ’ei ’orometua Séminaire i te po’ipo’i.

« Te hōho’a e pe’e tā’u i ’ite i roto i tō māua 43 matahiti fa’aipoipora’a, ’o te ha’apa’o-tāmau-ra’a ïa i te mau muhumuhu a te Vārua », tē parau nei te taea’e Bingham nō ni’a i tāna vahine. « ’Ua rave ’e ’ua rave noa ’oia i te mea tā te Fatu i hina’aro iāna ’ia rave ».