Elder Joaquin E. Costa

Hitu ’Ahuru Hui Mana Fa’atere Rahi

E mea nā roto i te tahi hoa tō Joaquin Esteban Costa ’ōmuara’a i te ’ē’a nō te fa’afāriura’a i te ’evanelia a Iesu Mesia, te fa’aipoipora’a hiero ’e te fa’aterera’a i roto i te ’Ēkālesia.

’Ua fānauhia Joaquin Costa i te 8 nō māti 1965 e Eduardo J. Costa ’e e Graciela M. Fassi. ’Ei pīahi i te fare ha’api’ira’a teitei nō Buenos Aires, i Raparata, ’ua fa’afārerei te tahi hoa, ’o Alin Spannaus, e Hitu ’Ahuru Ārea i teie nei, iāna ’e o Renee Varela. ’Ua riro Renee te piti o te u’i feiā mo’a o tōna ’utuāfare, ’e ’ua feruriruri ri’i ’oia hou ’a fāri’i ai e arapae i teie taure’are’a e 21 matahiti e ’ere i te melo nō te ’Ēkālesia. E toru pō tā rāua i haere ’e ’ua fa’aoti a’e ra ’oia ē, « pūai roa tōna aura’a iāna », e fa’aea i te arapae iāna. I te hopera’a te ha’api’ira’a, ’ua ho’i teie taure’are’a i tōna vāhi fānaura’a, i Entre Rios, i Raparata.

’E ’ua fāri’i Renee i te hō’ē pi’ira’a ’ia tāvini i roto i te misiōni nō Chile Osorno. I te otira’a tāna misiōni, ’ua fa’anaho te taea’e Spannaus ē, e fārerei rāua Joaquin i te hō’ē ’āru’i fa’a’āreareara’a, ’e ’ua ani atu ra Joaquin e arapae fa’ahou. « ’Ua pure au ’e ’ua fa’aoti ihora e fāri’i noa », tē parau ra te tuahine Costa.

’Aita i maoro roa, ’ua ha’api’i mai o Joaquin nō ni’a i te ’Ēkālesia. ’E tē ha’api’i ra ’oia nā muri i te mau misiōnare, ani a’e ra Renee iāna ’ia pure ’e ’ia tai’o i te Buka a Moromona mai te ha’amatara’a ē hope noa atu.

« ’Aita te buka i hope roa, ’ua noa’a mai tōna ’itera’a pāpū », tē parau nei te tuahine Costa. « ’Aita ’oia i bāpetizo iāna ’ia au vau iāna. ’Ua arapae fa’ahou māua hō’ē matahiti ’ei reira ’ua fa’aipoipo māua i roto i te hiero nō Buenos Aires Argentina i te matahiti 1989 ».

E parau tū’ite licence tā Elder Costa i roto i te ’ohipa fa’arava’ira’a faufa’a, tei noa’a i te matahiti 1987 i te fare ha’api’ira’a teitei nō Buenos Aires. ’Ei ta’ata fa’aipoipo ’āpī, ’ua fa’anu’u mai rāua i Provo, i Utah, i te fenua Marite, i reira i te noa’ara’a iāna te hō’ē parau tū’ite master i roto i te ’ohipa fa’aterera’a taiete, i te matahiti 1994 i te fare ha’api’ira’a teitei nō Brigham Young. ’Ua ora rāua ’e tō rāua ’utuāfare maha tamari’i, i Chicago, i Illinois, i te fenua Marite, ’ua ’ohipa ’oia i reira nō te tahi taiete rahi nā te ara i te pae nō te moni fa’ahotu ’e te moni tārahu. Nā roto i tāna ’ohipa i roto i te fare moni, ’ua ho’i ’oia ’e tōna ’utuāfare i Raparata te tahi matahiti, i muri iho ’ua fa’anu’u rātou i te fenua hau repupirita nō Tehetia ’e i te fenua hau mahometa nō Oman. Nā matahiti e piti i ma’iri, ’ua ora ’oia ’e tōna ’utuāfare i Lima, i Peru, i reira ’oia i te ’ohipara’a nō te tahi taiete Danemaka ’aravihi i roto i te mau tārahu moni na’ina’i.