Tuahine Joy D. Jones

Peresideni rahi o te Paraimere

Nō Joy D. Jones, ’o tōna nā metua tāna nā ’aito.

« Mai te huru ra ē, nō’u, e nehenehe i tō’u metua tāne ’ia rave i te mau mea ato’a », tē parau nei te tuahine Jones nō tōna metua tāne, e ta’ata tōro’a uira. Nō ni’a i tōna metua vahine, tē parau nei ’oia ē, « E vahine fa’ahiahia roa tō’u metua vahine » tei hāmani i te mau mea ato’a, mai te mā’a a te ’utuāfare, i te ’ahu tā rātou e ’ō’omo—’aore re’a mea nō te hāmani. « Nō’u nei, ’ua riro ’oia ’ei vahine feiā mo’a, ’e mai tō’u na’ina’ira’a ’ua hina’aro vau ’ia riro mai iāna ra te huru ».

Hau atu i tōna poiherera’a i te ha’amana’ora’a o tōna nā metua, ’o Aldo Harmon ’e o Eleanor Ellsworth Harmon, tē poihere ato’a nei te tuahine Jones i te ha’amana’ora’a i tōna vai-tamari’i-ra’a ia Elder Robert L. Backman tei paraparau mai i roto i te hō’ē ’āmuira’a titi i Oregon, i te fenua Marite. E peresideni misiōni Elder Backman i terā ra tau, i teienei e Hitu ’Ahuru hui mana fa’atere rahi hope.

« E mana’o pūai mau i roto iā’u ’a paraparau ai ’oia », tē parau ra te tuahine Jones. « E mana’o ta’a ’ē mau tā’u i fāri’i a’enei… ’Ua māuruuru roa ho’i au nō te reira inaha ’ua fāri’i au i te fa’a’itera’a a te Vārua ē, e parau mau te mau mea tāna e parau nei ».

’Ua fānauhia o Joy Diane Harmon i te 20 nō tiurai 1954 i The Dalles, i Oregon. ’Ua pa’ari ’oia ’e te ta’ata tāna e fa’aipoipo i muri iho, ’o Robert Bruce Jones, i Oregon, ’ua fārerei rā rāua i Brigham Young University, i Provo, i Utah. ’Ua fa’aipoipohia rāua i te 14 nō atete 1974 i roto i te hiero nō Manti Utah. E 5 tā rāua tamari’i ’e e 17 mo’otua.

I muri noa mai i te noa’ara’a tāna BTS nō te ’ihi ’utuāfare, ’ua fa’anu’u rātou i Portland, i Oregon, ’e i muri iho i Santa Rosa, i California, ’ei reira te taea’e Jones i te ravera’a i tōna tōro’a taote chiropracteur. ’Ua tae mai te mana’o i roto i te taea’e ’e te tuahine Jones ’ia fa’anu’u mai i Draper, i Utah, ’a 22 matahiti i teienei. Mai te reira ā taime tō te tuahine Jones fāna’ora’a i te ha’amaita’ira’a ’ia ora i pīha’i iho i te hiero.

« ’Ua riro roa mai te hiero nō Jordan River Utah ’ei vāhi mo’a nō’u », tē parau nei ’oia. « E ’itera’a pāpū tō’u nō ni’a i te mana o te hiero ’e te hau ’e te arata’ira’a i fa’ataehia mai iā’u i roto i tō’u orara’a ».

’Ua tāvini te tuahine Jones ’ei peresideni nō te Sotaiete Tauturu ’e nō te Paraimere o te pāroisa, ’ei tauturu i roto i te mau peresidenira’a Sotaiete Tauturu, Feiā ’Āpī Tamāhine ’e Paraimere o te pāroisa ’e o te titi Nā mua noa a’evnei ’ua tāvini ’oia i roto i te ’āpo’ora’a fa’atere rahi o te Paraimere.