Elder Evan A. Schmutz

Hitu ’Ahuru Hui Mana Fa’atere Rahi

’Ua māuruuru o Elder Evan Antone Schmutz i te mau ’ohipa i te pae nō te heheura’a tā te Fatu i tu’u i ni’a iāna. ’Ua hōhonu mai Tōna fa’afāriura’a i te ’evanelia nā roto i te tuatāpapara’a tāmau o te mau pāpa’ira’a mo’a, te tāvinira’a i roto i te bāsileia ’e te ha’apa’ora’a i tāna mau fāfaura’a i te Atua.

’Ua fānauhia i te 6 nō tiunu 1954 i St. George, i Utah, e Richard ’e e Miriam Schmutz ’e ’ua ha’api’i ’oi’oi ’oia nō ni’a i te mana o te pure. ’A riro ai ’oia ’ei luto Scout, ’ua ho’o ’oia i te mau tīteti nō te hō’ē jamboree ’e ’ua noa’a iāna e 17 tara marite. I te taime rā nō te fa’aho’i i te moni, ’aita te reira i ’itehia iāna. ’Ua fa’aitoito tōna metua vahine iāna ’ia pure, ’e ’ua heheu mai te Fatu iāna i te vāhi mau tei reira te moni. ’Ua riro te reira ’ei ha’apāpūra’a pūai nō te here o te Atua iāna ’e tōna ’itera’a iāna.

I te 18ra’a o tōna matahiti, ’ua fa’aru’e mai te tuahine o Elder Schmutz i roto i te hō’ē ’ati pereo’o. ’Ua taui roa te reira iāna, ’e ’ua tae mai te tahi mau ’ohipa pae vārua rahi.

’Aita i maoro roa, ’ua pi’ihia ’oia i roto i te misiōni ’e ’ua haere atu ra i te ha’api’ipi’ira’a. ’Ua pure ’oia ’ia noa’a tōna iho ’itera’a pāpū. ’A hi’o noa ai ’oia i te mau ’orometua i te ha’api’ira’a nō ni’a i te ’Ōrama mātāmua, tē parau ra ’oia ē, « ’Ua fāri’i au i te ’itera’a pāpū pūai roa mai te huru ra ē, e’ita fa’ahou tā’u e nehenehe e fa’aea noa i roto i te piha ».

’I muri mai i tāna misiōni i roto i te misiōni nō North Carolina Greensboro, ’ua rave Elder Schmutz i te fa’aotira’a e tāmau noa i te tuatāpapa i te mau pāpa’ira’a mo’a i te mau mahana ato’a o tōna orara’a ē hope noa atu. « E ’oa’oa rahi, e ha’api’ira’a nō’u iho nei ’e e māramaramara’a tā’u i ’ite i roto i te tuatāpapara’a i te po’ipo’i, nō te hō’ē tau maoro ’e maoro roa ».

’Ua fa’aipoipo Elder Schmutz ia Cindy Lee Sims i te 3 nō fepuare 1978, i roto i te hiero nō Provo Utah. E parau tū’ite tā Elder Schmutz nō te reo peretāne nā reira ato’a te parau tū’ite doctorat nō te ’ohipa ture tei noa’a i Brigham Young University. ’Ei tōro’a ’ohipa, ’ua rave ’oia i roto i te mau taiete ture mai te matahiti 1984 ē 2016 noa atu.

Ta’a ’ē noa atu te pāhonora’a i te mau anira’a a nā tamari’i e pae, ’ua tāvini Elder Schmutz ’ei melo ’āpo’ora’a te’itei, ’ei ’episekōpo, ’ei melo i roto i te peresidenira’a titi, ’ei peresideni nō te misiōni nō Philippines Cebu (2011–14), ’ei peresideni nō te ’āma’a o te pū ha’api’ipi’ira’a misiōnare ’e ’ei melo nō te pupu pae o te Hitu ’Ahuru.