Elder W. Mark Bassett

Hitu ’Ahuru Hui Mana Fa’atere Rahi

I te mau tau ve’ave’a ato’a, i tōna vai-tamari’i-ra’a, e tere W. Mark Bassett mai tōna fare i Sacramento, i California, haere roa i te fare o tōna metua vahine tupuna i Alabama, i te fenua Marite. I roto i tō rātou tere, e ha’apāpū te ’utuāfare ē, e mahana tei fa’ata’ahia nō te māta’ita’i i te mau vāhi nō te ’ā’amu o te ’Ēkālesia.

I Nauvoo ānei ’e ’aore rā i Illinois, ’aore rā, ’ia haere ’oia i roto i te uru rā’au mo’a i Palmyra, i New York, tē ha’amana’o nei Elder Bassett i te mana’o pūai tei noa’a mai—noa atu ā e tamari’i noa—’a tere māta’ita’i ai rātou i teie mau vāhi mo’a.

« E ’ohipa tā mātou i putapū i reira », tē parau ra ’oia. « Nā reira tō’u ’itera’a pāpū i te tupura’a, nā roto i te mau ’ohipa na’ina’i ».

’Ua riro mai teie ’itera’a pāpū tāna i ’apo i tōna ’āpīra’a ’ei puna ha’apūaira’a iāna i roto i tōna orara’a ato’a.

’Ua fānauhia ’oia i te 14 nō atete 1966 e Edwina Acker ’e e William Lynn Bassett, i Carmichael, i California, ’o Elder Bassett te piti o nā tamari’i e pae. ’Ua riro te tāvinira’a i roto i te ’Ēkālesia ’e te orara’a i te ’evanelia ’ei mea faufa’a rahi nō tōna ’utuāfare.

I muri mai tāna misiōni i Guatemala Guatemala City mai te matahiti 1985 i te matahiti 1987, ’ua fa’anu’u mai Elder Bassett i Provo, i Utah, nō te haere i BYU. ’Ua fa’aipoipo ’oia ia Angela Brasher i roto i te hiero nō Roto Miti i te 20 nō titema 1989. E pae tamari’i tā rāua ’e e piti mo’otua.

I te matahiti 1990 ra, ’ua roa’a iāna te parau tū’ite nō te numerara’a faufa’a i BYU ’e i muri iho ’ua fa’anu’u tōna ’utuāfare i te hō’ē vāhi nō Sacramento nō te ’ohipa i roto i te ho’o-pātē-ra’a i te pereo’o. E tōro’a hi’opo’a tōna i roto i te taiete Brasher’s Sacramento Auto Auction ’e ’ua riro ’oia ’ei upo’o fa’atere i te faufa’a moni ’e hō’ē ato’a ho’i o te mau ōna o te taiete West Coast Auto Auctions, Inc., ’ua rave rātou i te ’ohipa ho’o-pātē-ra’a pereo’o nā te pae to’o’a o te rā o te fenua Marite.

E rave rahi pi’ira’a tā Elder Bassett i roto i te ’Ēkālesia, e peresideni Feiā ’Āpī Tamāroa o te pāroisa, ’episekōpo, melo ’āpo’ora’a teitei, peresideni titi, peresideni misiōni nō Arizona Mesa mai te matahiti 2007 i te matahiti 2010 ’e e Hitu ’Ahuru Ārea ato’a.