Tuahine Bonnie H. Cordon

Tauturu piti i roto i te Peresidenira’a rahi o te Paraimere

I tōna vai-tamari’i-ra’a i Idaho apato’a to’o’a o te rā, i te fenua Marite, ’ua ha’api’i Bonnie Hillam Cordon i te mau ha’api’ira’a rahi o te orara’a. Te ’ohipara’a, te ha’utira’a ’e te orara’a i te vāhi fa’a’apura’a, ’ua ha’api’i te reira iāna i te fa’arava’ira’a iāna iho, te ’ohipa itoito ’e « ’eiaha e ri’ari’a ’ia tāmata i te mau mea », tē parau ra te tauturu piti ’āpī nō te peresidenira’a rahi o te Paraimere.

Noa atu rā, te ha’api’ira’a rahi roa a’e tāna i ha’api’i, nō roto mai ïa i tōna nā metua, ’o Harold ’e ’o Carol Rasmussen Hillam, tei ha’api’i iāna ē, nā roto i te tauturu a te Fatu, e noa’a iāna e rave i te mau mea ato’a. « ’Aita e tā’oti’ara’a », tē parau ra tōna metua tāne.

’Ua turu’i te tuahine Cordon i ni’a i te reira ’ei misiōnare tei pi’i-’āpī-hia i Lisbon, i te fenua Potutara, ’a tāfifi ai ’oia i te reo Pōtītī « I ni’a vau i tō’u turi ’āvae i te anira’a i te tahi semeio ». ’Aua’a a’e rā tō’u metua tāne, ’ua ha’api’i au ē, e oti iā’u i te rave i te mau mea fifi.

’Ua pure noa ’oia ’e ’ua ’ohipa ’e ’ua fa’a’oroma’i ē matara marū mai nei tāna reo pōtītī ē pāpū roa atu ra, ’o te ha’amaita’i ato’a iāna e rave rahi i muri iho ’a pi’ihia ai rāua tāna tāne ’ia tāvini i Curitiba, i Beresiria.

« E mea māere roa e mea nahea te Fatu ’ia fa’aineine ia tātou ’e ’ia patu ia tātou, ma’a vāhi iti i terā taime ’e terā taime », tē parau nei ’oia. « E aura’a ihoa e ’itehia ’ia hi’o-ana’e-hia i roto i te hipamuri (rétroviseur). Tītau-noa-hia te fa’aro’o ».

’Ua fānauhia Bonnie Hillam i te 11 nō māti 1964, i Idaho Falls, i Idaho. I muri mai i tāna misiōni, ’ua haere ’oia i te fare ha’api’ira’a Brigham Young University, i Provo, i Utah, i te fenua Marite. I reira, ’ua riro mai ’ei hoa rahi nō Derek Lane Cordon. ’Ua ’ū’ā roa mai tō rāua hoara’a ’ei herera’a, ’e ’ua fa’aipoipohia rāua i te 25 nō ’ēperēra 1986, i roto i te hiero nō Roto Miti. E maha tā rāua tamari’i—toru tamāroa ’e hō’ē tamāhine—’e e toru mo’otua tamāroa.

Nā roto i te mau matahiti ’ua tāvini rāua i roto e rave rahi pi’ira’a a te ’Ēkālesia. ’Ua tāvini ’oia ’e tāna tāne ’a riro ai ’oia ’ei peresideni nō te misiōni nō Beresiria Curitiba mai te matahiti 2010 i te matahiti 2013, ’e ’ua tāvini ato’a ’oia (te tuahine) ’ei peresideni Feiā ’Āpī Tamāhine, ’ei fa’atere piha aupuru tamari’i ’e ’ei ’orometua ha’api’i ’evanelia i roto i te titi, ē tae noa atu i roto i te mau fa’anahora’a pāroisa, Feiā ’Āpī Tamāhine, Sōtaiete Tauturu ’e Paraimere.

I ni’a i tōna pi’ira’a ’āpī, tē parau nei te tuahine Cordon ē, maita’i ē e ha’api’i atu ’oia i te hō’ē parau mau tumu i te mau tamari’i o te Paraimere o te ’Ēkālesia, maori rā : « ’Ua here te Metua i te Ao ra ia rātou ».