Te tauira’a i te huru ha’api’ira’a i te ’evanelia
E mea faufa’a rahi roa ino te ha’api’ira’a mai, te orara’a ’e te ha’api’ira’a atu i te ’evanelia nō tō tātou tupura’a ’e e mau tuha’a faufa’a rahi ho’i te reira nō tā tātou ha’amorira’a i te mahana sābati. I roto i tā rātou tauto’ora’a tāmau nō te tauturu i te mau melo ’ia tupu ’e ’ia fa’arahi i te fa’aro’o i roto i te Metua i te Ao ra ’e i roto ia Iesu Mesia, ’e nō te ha’amaita’i atu ā i te ha’amorira’a i te Sābati, ’ua vauvau te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo i roto i te mau putuputura’a feiā fa’atere o te ’āmuira’a rahi i te tahi tauto’ora’a ’āpī nō te ha’amaita’i i te ha’api’ira’a i te ’evanelia. Tē anihia nei i te mau melo ’ia :
1. Pe’e i te mau parau tumu e vai ra i roto i te Ha’api’ira’a mai tā te Fa’aora. Tē fa’atumu nei teie buka ’āpī i ni’a i te mau parau tumu ’ōhie ’e te mana rahi tā te ’Orometua rahi i fa’a’ohipa. Te fā o te mau ’orometua ha’api’i, fa’ata’ahia i roto i teie buka, « ’o te ha’api’ira’a ïa i te ha’api’ira’a tumu mau o te ’evanelia, nā roto i te Vārua, nō te tauturu i te mau tamari’i a te Atua ’ia patu i tō rātou fa’aro’o i te Fa’aora ’e ’ia riro rahi atu ā mai Iāna ra te huru ».
Noa atu ā pa’i ’ua ’ōpuahia teie buka nō rātou e pi’ira’a ’orometua tō rātou, e ’ite mai te ta’ata ato’a i te maita’i i roto i te ha’api’ira’a ’ia ha’api’i i te ta’ata mai tā te Fa’aora i ha’api’i atu. E riro te fa’a’ohipara’a i te mau parau tumu i roto i teie buka iti ’ei maita’i nō te mau metua ’ia ha’api’i atu rātou i te fare.
2. Haere i te mau rurura’a a te ’āpo’ora’a a te mau ’orometua ha’api’i. E ’ere te mau rurura’a a te ’āpo’ora’a a te mau ’orometua ha’api’i mai te mau ’ohipa ha’amaita’ira’a ’orometua ha’api’i i nā mua atu. ’Ei ’āpo’ora’a, e hōro’a teie mau rurura’a i te rāve’a nō te mau ’orometua ’ia paraparau ’āmui ’e ’ia ha’api’i i te tahi ’e te tahi i te mau parau tumu nō te Ha’api’ira’a mai tā te Fa’aora. E riro teie mau rurura’a, te fa’atupuhia i te taime nō te mau hora purera’a i te sābati, i te ha’api’ihia nā te ao tā’āto’a nei i roto i te matahiti 2016.
3. Riro ’ei ta’ata e ha’api’i itoito i te ’evanelia. Tē fa’aitoitohia nei te mau melo mai te mau ’orometua ’ia riro ’ei ta’ata ha’api’i itoito i te ’evanelia i te fare. Nā te ha’api’ira’a ’e te orara’a i te ’evanelia i roto i te hepetoma e fa’aineine i te mau melo ’ia haere mai rātou i te mau ha’api’ira’a i te sābati, e riro ato’a ho’i te reira i te fa’atupu i te ’apora’a pāpū nō te ta’ata tāta’itahi.
’Ei tamari’i nā tō tātou Metua i te Ao ra, e fāito pūai tō tātou pā’āto’a ’ia riro mai Iāna ra te huru. Te ta’ata ato’a te hina’aro ’ia ha’api’i ’e ’ia ora i te ’evanelia, e nehenehe ïa tāna e riro rahi atu ā mai tō tātou nā metua i te ra’i nō te ho’i ia rātou ra e ora ai. E tauturu te ha’amori i te fare pure ’e i te fare i te patu i terā huru fa’aro’o i roto i te Metua i te Ao ra ’e i roto ia Iesu Mesia.