Elder S. Mark Palmer

Hitu ’Ahuru Hui Mana Fa’atere Rahi

I te matahiti 1992, ’ua riro te taime ’ei mea hina’arohia e Elder S. Mark Palmer ’e tāna vahine ’o Jacqueline.

Tē tāvini ra o Elder Palmer ’ei melo ’āpo’ora’a teitei i terā taime. Tē rohi ato’a ra ’oia nō te ha’amaita’i i tōna tōro’a ’ohipa. Nō te tuahine Palmer, e pau ato’a tōna taime i ni’a i terā ’e terā ’ohipa, ’aita re’a e taime tōna. E ono tā rāua tamari’i i tō rāua fare nō Austin, i Texas, i te fenua Marite—e ’aiū tamāroa ono ’āva’e ato’a ho’i.

I te anira’a tō rāua peresideni titi ’ia tāvini ’ei rave ’ohipa i roto i te hiero nō Dallas Texas, ’aita roa atu rāua i ’ite e nāhea i teie fa’ahou ā hōpoi’a. ’Ua fāri’i rā rāua i te pi’ira’a—’e ’ua pure atu ra nō te ani i te tauturu a te Fatu.

Te haerera’a i te mau ’āva’e ato’a nā ni’a i te pereo’o mata’eina’a i te hiero ’e fa’aea i reira ē pō noa atu, ’ua tītau te reira i te tusia ’e te fa’anahonahora’a rahi. « ’Ua ha’amaita’i-roa-hia rā tō mātou orara’a », tē parau nei Elder Palmer.

’Ua fa’aineine te tāvinira’a i roto i te hiero iāna i te pae vārua nō te tahi atu mau pi’ira’a i roto i te autahu’ara’a, ’o tāna ïa i parau. ’Ua fa’ariro ato’a te reira iāna ’ei tāne ’e ’ei metua tāne maita’i a’e—’e ’ua ’itehia mai te fāito au i roto i tōna orara’a ’ohipa.

« E tauturu pinepine te haerera’a i te hiero nō te fa’atano ’āpī i tā ’outou mau ’ohipa mātāmua roa ’e e fa’aha’amana’o i te mau fafaura’a tā ’outou i rave », tē parau nei ’oia.

’Ua fānauhia Stanley Mark Palmer i te 11 nō fepuare 1956, i Te Puke, i Niuterani, e Kenneth ’e e Jill Palmer. ’Ua tomo mai tōna ’utuāfare i roto i te ’Ēkālesia ’a riro noa ai ’oia ’ei tamari’i. ’Ua tāvini ’oia i te misiōni rave tāmau i roto i te misiōni nō Niuterani Wellington.

I muri iho i tāna parau tū’ite tuha’a mātāmua i te ha’api’ira’a University of Auckland, ’ua tāpa’o ’oia iāna i te ha’api’ira’a Brigham Young University nō te parau tū’ite master i roto i te ’ohipa fa’aterera’a taiete. ’A ora ai ’oia i Provo, i Utah, ’ua mātau ’oia i te hō’ē tuahine tei ho’i mai i tāna misiōni, ’o Jacqueline Wood, i roto i te hō’ē ’āru’i blind date. ’Ua fa’aipoipo rāua i te 18 nō titema 1981 i roto i te hiero nō Roto Miti. E ono tā rāua tamari’i ’e e 9 mo’otua.

’Ua fa’ati’a Elder Palmer i te taiete SMP Ventures, e taiete ho’o fenua ’e te fare, ’e ’o ’oia te peresideni. ’Ua tāvini ’oia ’ei ’episekōpo, ’ei peresideni titi, ’ei peresideni nō te misiōni nō Washington Spokane (2009–12), ei peresideni taime poto nō te misiōni nō Australia Sydney South Mission (2014), ’e ’ei Hitu ’Ahuru Ārea.