Elder K. Brett Nattress

Hitu ’Ahuru Hui Mana Fa’atere Rahi

Tē parau nei Elder K. Brett Nattress ’e o Shauna Lee Adamson Nattress tōna hoa fa’aipoipo, nō rāua ’ei « na ta’ata maita’i ’ore te ’imi nei ra i te mau taime ’ia maita’i roa ».

E rave rahi taime mai te reira tā rāua i ’ite i roto i tō rāua orara’a—pauroa te reira e tū’atira’a i ni’a i te Fa’aora ’e te Tāra’ehara, tē parau nei Elder Nattress.

Tē parau ra Elder Nattress ē, ’ua fānauhia ’oia e nā metua maita’i, ’o David ’e o Judy Sorensen Nattress, ’e tē ha’amana’o ra ’oia i tōna metua vahine tē tai’o ra i te Buka a Moromona i te ’utuāfare i te mau mahana ato’a.

I te hō’ē taime tei te fare ’oia nō te tahi tau fa’afaeara’a ha’api’ira’a tuatoru. Tē feruri ra ’oia i te mau hi’opo’ara’a hope’a e haere mai ra, ’aita ’oia e ’āfaro maita’i ra ’aita ato’a rā tōna tino i ma’ima’ihia.

’Ua parau tōna metua vahine iāna, « mai te peu ’aita tō ’oe fifi ’e ’aita ’oe e ’āfaro maita’i ra, ’a haere e tāvini i te ta’ata ».

Hue a’e ra Brett i te tahi ope i roto i tō rātou pereo’o pāni ’e haere atu ra e ope i te hiona i mua i te vāhi terera’a pereo’o o te fare o te mau vahine ’ivi o te pāroisa. ’Ua maita’i roa mai ’oia.

« ’Ua rōtahi noa vau i ni’a iho iā’u ’e te mau hi’opo’ara’a, ’e ’ua mo’ehia iā’u te tumu mau o te orara’a, te tāvinira’a ia vetahi ’ē », tē parau ra ’oia.

’Ua fānauhia Elder Nattress i te 4 nō māti 1965 i Pocatello, i Idaho, i te fenua Marite. ’Ua fa’anu’u te ’utuāfare i Lehi, i Utah, i reira ’oia ’e tōna nā taea’e ’e tuahine orara’a i roto i te hō’ē fare fa’a’apu iti.

’Ua mātau ’oia i te tamāhine e riro mai ’ei vahine nāna i tō rāua matahiti hope’a i te ha’api’ira’a tuarua. I muri mai tāna misiōni i roto i te misiōni nō California Sacramento, mai te matahiti 1984 i te matahiti 1986, ’ua fa’aipoipo rāua i roto i te hiero nō Roto Miti i te 24 nō ’ēperēra 1987. E hitu tā rāua tamari’i.

’Ua haere ’oia i te fare ha’api’ira’a Brigham Young University i Provo, i Utah, ’e ’ua noa’a tāna parau tū’ite i te fare ha’api’ira’a University of Utah i te matahiti 1990, i roto i te rapa’aura’a tino. ’Ua fa’ati’a rāua tōna taea’e David te taiete Advanced Health Care Corp. i te matahiti 2000.

’Ua rahi te mau pi’ira’a tā Elder Nattress i tāvini i roto i te ’Ēkālesia, ’ei peresideni Feiā ’Āpī Tamāroa nō te pāroisa, ’ei ’episekōpo, ’ei peresideni Feiā ’Āpī Tamāroa nō te titi, ’ei peresideni titi ’e ’ei Hitu ’Ahuru Ārea. I te taime ’a pi’ihia ai ’oia, tē tāvini ra ’oia ’ei peresideni nō te misiōni ’āpī ra Arizona Gilbert.