Elder Valeri V. Cordón

Hitu ’Ahuru Hui Mana Fa’atere Rahi

Na roto mai i tōna metua vahine tei tomo mai i roto i te ’Ēkālesia i te 16ra’a o tōna matahiti, ’ua roa’a ia Elder Valeri Vladimir Cordón Orellana te hō’ē niu i roto i te ’evanelia tei tauturu maita’i iāna ’a fa’anu’u ai ’oia 965 maire (150 km) te ātea i tōna ’oire ’āi’a o Zacapa, i Guatemala, nō te haere i te ha’api’ira’a tuarua i Guatemala City nō te ha’api’i i te ’ihi mātini rorouira.

« Te mea faufa’a rahi tā’u i ’apo mai mai roto mai i tō’u metua vahine, ’o te mana’o tura ïa i mua i te mau mea mo’a ato’a i roto i te ’Ēkālesia », tē ha’amana’o ra Elder Cordón, te tamaiti a Ovidio ’e a Ema Orellana Cordón.

’Ua fānauhia Elder Cordón i te 19 nō fepuare 1969, i Guatemala City, ’e ’ua ora i Zacapa i tōna vai-tamari’i-ra’a. ’Ua haere tōna metua tāne i Chicago, i Illinois, i te fenua Marite nō te rave i te ’ohipa. I reira tōna ha’amātaura’ahia i te mau melo o te ’Ēkālesia ’e ’ua fāri’i roa mai i te poro’i a te mau misiōnare nō ni’a i te ’evanelia. ’Ua tā’atihia te ’utuāfare i roto i te hiero nō Mesa Arizona i te matahiti 1972, e toru ’īa matahiti tō Valeri.

Tē parau nei Elder Cordón ē, ’ua pa’ari ’oia ’e ’ua here ’oia i te ’evanelia ’a fa’aro’o pinepine ai ’oia i tōna metua vahine hīmenera’a i te buka hīmene a te ’Ēkālesia ’e te mau hīmene ato’a mai « E tamari’i au na te Atua ra » ’e « Maita’i e pi’ihia vau i roto i te misiōni ». ’Ua tāvini Elder Cordón i roto i te misiōni nō El Salvador mai te matahiti 1987 i te matahiti 1989.

’Ua fa’aipoipo ’oia ia Glenda Zelmira Zea Diaz i te 25 nō māti 1995, i roto i te hiero nō Guatemala City Guatemala. Tē ’ōpua ato’a ra te tuahine Cordón ’ia tāvini i te misiōni, taui a’e ra te fa’anahora’a i te taera’a mai o Valeri. I muri iho roa tōna ’itera’a ē, ’o ’oia te taure’are’a tā tōna mata i haru i ni’a i te hō’ē hōho’a i roto i te hō’ē ve’a nā te ’Ēkālesia, i te mau matahiti nā mua ri’i atu. E toru tā rāua tamāhine.

E parau tū’ite licence tā Elder Cordón tei noa’a i te fare ha’api’ira’a teitei nō Mariano Galvez University i Guatemala i te matahiti 2010 ’e e parau tū’ite master ato’a tāna nō te ’ohipa fa’aterera’a taiete tei noa’a i te ha’api’ira’a Massachusetts Institute of Technology i te matahiti 2012. ’Ua ’ohipa ’oia ’ei upo’o fa’atere i te fa’anahora’a rorouira i roto i te hō’ē taiete hāmani rā’au ’e mai te matahiti 2012 ra, i roto i te taiete Pepsico Foods Mexico, i Amerika Ropu ’e te mau fenua Caraibes mā.

I te taime ’a pi’ihia ai ’oia, tē tāvini ra Elder Cordón i roto i te pupu maha o te Hitu ’Ahuru i roto i te ārea nō Amerika Ropu. ’Ua tāvini ’oia i roto i te peresidenira’a misiōni nō Puerto Rico San Juan mai te matahiti 1998 i te matahiti 2000.