Elder Massimo de Feo

Hitu ’Ahuru Hui Mana Fa’atere Rahi

’Aita i maoro roa nā mua a’e i te fāri’i i tāna pi’ira’a misiōnare rave tāmau, ’ua ha’api’i Elder Massimo De Feo i te mau ha’api’ira’a rahi nō te tusia ’e te here na roto mai i tōna metua tāne, ’o Vittorio De Feo.

E faufa’a moni iti noa tā te ’utuāfare De Feo, ’e ’aita ’o Vittorio ’e o Velia, tāna vahine, i te melo nō te ’Ēkālesia. E mea fa’atura rā te pāpā De Feo i te hina’aro o tāna tamaiti ’ia fa’a’ite i te ’evanelia.

« ’Ua ani mai tō’u metua tāne iā’u ē, ‘terā mau ānei tā ’oe i hina’aro ?’ », tē ha’amana’o ra Elder De Feo. « ’Ua parau vau, ‘’Ē, ’ua hina’aro vau e tāvini i te Fatu ma tō’u ’ā’au ato’a’ ».

Parau fafau a’e ra Vittorio e rave i te mau mea ato’a e noa’a iāna nō te ’aufau i te tāvinira’a piti matahiti a tāna tamaiti i roto i te misiōni nō Italia Roma.

« ’Ua hi’o vau i terā moni ’ei mea mo’a—’o te fa’atusiara’a rahi ho’i a te hō’ē ta’ata ’aita i ti’aturi i roto i teie ’Ēkālesia », tē parau ra Elder De Feo. « ’E nō reira ’ua tāvini au i tā’u misiōni ma tō’u ’ā’au ato’a, te pūai, te mana’o ’e te itoito nō te mea ’ua here au i te Fatu ’e ’ua here au i tō’u metua tāne ».

Nā te mau parau tumu o te ’evanelia mai te tusia, te ’ohipa pāpū, te ’utuāfare ’e te tāvinira’a i tauturu i te fa’ahōho’ara’a ia Elder De Feo.

’Ua fānauhia i Taranto, i Italia i te 14 nō titema 1960, ’ua ha’api’i mai o Massimo De Feo nō ni’a i te ’Ēkālesia i te ivara’a o tōna matahiti, i te pātōtōra’a te mau misiōnare i te ’ūputa o tō rātou fare. ’Āria a’e, ’ua bāpetizohia Massimo ’e tōna tua’ana ’o Alberto.

’Ua au roa teie nā tamāroa De Feo i te here ’e te pāturura’a a nā feiā fa’atere o te ’āma’a ’a haere ai rāua i te Paraimere, ’e i muri iho i te mau fa’a’oa’oara’a a te Feiā ’Āpī. ’Ua fa’ahoa ato’a Massimo i te tahi feiā ’āpī o te ’āma’a—mai ia Loredana Galeandro tei fa’afāriu-’āpī-ato’a-hia ’e ’o tāna i fa’aipoipo i muri iho i tāna misiōni. ’Ua tā’atihia rāua i te 14 nō atete 1984 i te hiero nō Bern i Helevetia. E toru tamari’i tā te ’utuāfare De Feo.

Hou ’a riro mai ai ’ei Hitu ’Ahuru Hui mana fa’atere rahi, ’ua ora Elder De Feo i Roma ’e ’ua ’ohipa nō te Fa’aterera’a hau Marite nā te ara hau i te 30 matahiti. ’Ua tāvini ’oia ’ei peresideni ’āma’a, ’ei peresideni mata’eina’a, ’ei peresideni titi ’e ’ei Hitu ’Ahuru Ārea.