Rave i te maita’i nā te ao tā’āto’a nei

Tē tāmau noa nei te Feiā Mo’a i te Mau Mahana Hope’a Nei i te pe’e i te hi’ora’a o te Fa’aora ’a « hamani maita i haere ai » (Te mau ’Ohipa 10:38). Teie te tahi mau hi’ora’a i tupu a’e nei :

I Abu Dhabi, i te mau Hau ’āmui ari’i ’ārābia, ’ua putuputu te mau melo nō te ’Ēkālesia ’e te mau hoa mai roto mai e iva fenua piri Hiti’a o te rā—tei fānauhia rā rātou i roto i nā fenua rahi e ono—nō te hō’ē ’āmuira’a ’e te hō’ē ’ōpuara’a ha’apa’ora’a rau nō te tauturura’a i te ao nei. ’Ua fa’aineine ’e ’ua ’ōpere rātou e 8 500 ’āfata tauiha’a hōroira’a ’e te mā’a.

I Ouganda, e piti taote niho ’e e toru ’aravihi i te pae nō te hōroi vaha, e feiā mo’a ana’e rātou, tei hōro’a hō’ē hepetoma nō te fa’a’īra’a i te mau niho pē, ’īriti ’e tāmā i te niho, ha’api’i i te ta’ata i te hōroi-maita’i-ra’a i tō rātou vaha ’e ha’api’ipi’i i te mau taote niho ’e te mau pīahi taote niho i te mau ravera’a maita’i roa a’e.

I Malaisie, ’Ua fa’atumu te mau melo o te ’Ēkālesia i ni’a i te ’utuāfare ’a fa’ahanahanahia ai te matahiti ’āpī o te nūna’a tinito, e fa’ahanahanara’a ho’i e ravehia te peu haere i ni’a i te mēnema o te hui tupuna ’a ha’amana’o ai, ’a fa’atura ai ’e ’a ’ārue ai ia rātou.

I Thailande, ’ua putuputu te mau melo mai te matahiti 18 ’e 35 atu i Bangkok nō te hō’ē tāta’ura’a tunura’a mā’a ’e te hō’ē ’ohipa tauturura’a ta’ata.

I Fiti, ’ua tauturu te mau melo ’e te mau misiōnare ia rātou tei ’ati i te vero mata’i Winston. ’Ua ’ohipa ’āmui te feiā fa’atere ’e te mau fa’anahora’a a te hau fenua ’e te tahi ato’a nō te fa’afāna’o i te mā’a, te pape, te fare ’ie, te pūtē hōroira’a ’e te tahi atu mau mauha’a tauturu ora.