Mensahe sa Visiting Teaching
Pamumuhay ng Isang Buhay na Inilaan
Mapanalanging pag-aralan ang materyal na ito at maghangad ng inspirasyong malaman kung ano ang ibabahagi. Paano ihahanda ng pag-unawa sa layunin ng Relief Society ang mga anak na babae ng Diyos para sa mga pagpapala ng buhay na walang hanggan?
“Ang paglalaan ay pagtatalaga sa isang bagay bilang sagrado, na inilaan para sa mga banal na layunin,” sabi ni Elder D. Todd Christofferson ng Korum ng Labindalawang Apostol. “Ang tunay na tagumpay sa buhay na ito ay nagmumula sa paglalaan ng ating buhay—iyon ay, ang ating panahon at mga pagpili—sa mga layunin ng Diyos.”1
Sabi ni Elder Neal A. Maxwell (1926–2004) ng Korum ng Labindalawang Apostol, “Iniisip natin [kung] minsan na ang paglalaan ay pagbibigay ng ating materyal na ari-arian, kapag ito ay ipinag-utos ng Diyos. Ngunit ang tunay na paglalaan ay ang pagpapasailalim natin sa Diyos.”2
Kapag inilaan natin ang ating sarili sa mga layunin ng Diyos, mag-iibayo ang ating pananampalataya kay Jesucristo at sa Kanyang Pagbabayad-sala. Kapag namuhay tayo ng isang buhay na inilaan, mapapabanal tayo sa pamamagitan niyon.
Sabi ni Carole M. Stephens, dating Unang Tagapayo sa Relief Society Presidency: “Itinuro ni Elder Robert D. Hales, ‘Kapag gumawa tayo ng mga tipan at tinupad [natin] ang mga ito, lumalabas tayo sa daigdig at [pumapasok] sa kaharian ng Diyos.’
“Nabago tayo. Iba ang ating anyo, at iba ang ating kilos. Iba na ang pinakikinggan at binabasa at sinasabi natin, at iba na tayong manamit dahil tayo ay naging mga anak ng Diyos na nakipagtipan sa Kanya.”3
Ang paglalaan ay ang tipan na ipinakipagtipan ng Diyos “sa sangbahayan ni Israel pagkatapos ng mga araw na yaon, sabi ng Panginoon, Aking itatala ang aking kautusan sa kanilang kalooban, at aking isusulat sa kanilang puso; at ako’y magiging kanilang Dios, at sila’y magiging aking bayan” (Jeremias 31:33). Ang pamumuhay ng isang buhay na inilaan ay naaayon sa plano ng Diyos para sa atin.
Karagdagang mga Banal na Kasulatan
Pananampalataya Pamilya Kapanatagan