សម្រាប់ឌីជីថលប៉ុណ្ណោះ
គុណធម៌ ៥ យ៉ាងនៃអ្នកត្រួសត្រាយដែលអាចសង្គ្រោះគេហដ្ឋានរបស់យើង
អ្នកនិពន្ធរស់នៅរដ្ឋកាលីហ្វូញ៉ា ស.រ.អា. ។
ឧបសគ្គរបស់យើងនាពេលបច្ចុប្បន្ននេះអាចផ្សេងពីមុន ប៉ុន្តែយើងត្រូវការកម្លាំងដូចគ្នានឹងពួកអ្នកត្រួសត្រាយពីជំនាន់ដើមផងដែរ ។
តើអ្នកធ្លាប់ឆ្ងល់ដែរឬទេថា ប្រសិនបើសេចក្តីជំនឿរបស់អ្នកមានទំហំធំធេងដូចជាសេចក្តីជំនឿរបស់ពួកអ្នកត្រួសត្រាយនោះ ? ពួកបរិសុទ្ធបច្ចុប្បន្ននេះពុំត្រូវបានហៅដើម្បីដើរផ្លូវចម្លាយ ៣២ គីឡូម៉ែត្រក្នុងមួយថ្ងៃ អស់រយៈពេលរាប់ខែ ទុកចោលអ្វីៗគ្រប់យ៉ាងដែលពួកគេមាន ឬដោះស្រាយនឹងការបៀតបៀនដ៏ធ្ងន់ធ្ងរអ្វីឡើយ ប៉ុន្តែយើងត្រូវធ្វើការសម្រេចចិត្តដែលគ្មានប្រជាប្រិយ ការពារខ្លួនយើងទាស់នឹងស្ថានភាពស្លាប់ខាងវិញ្ញាណ និងបដិសេធនូវប្រព័ន្ធកម្សាន្តមិនសមរម្យដែលអាចបង្វែរអារម្មណ៍យើងឲ្យចេញពីអ្វីដែលសំខាន់បំផុត ។
នៅពេលយើងជ្រើសរើសដើម្បីធ្វើតាមព្រះគ្រីស្ទ នោះយើងត្រូវតែអំពាវនាវសុំនូវគុណធម៌ដូចគ្នានេះ ដែលបានផ្តល់ឲ្យដោយបុព្វការីជនដែលជាអ្នកត្រួសត្រាយរបស់យើងនូវកម្លាំងដ៏អស្ចារ្យរបស់ពួកគេ ។
នេះគឺជាគុណធម៌ប្រាំយ៉ាងដែលអាចពង្រឹងយើងរៀងរាល់ថ្ងៃ ៖
-
សេចក្តីជំនឿ កម្លាំងនៃពួកអ្នកត្រួសត្រាយមាននៅក្នុងបុគ្គលម្នាក់ៗ ។ ពួកគេគ្រប់គ្នាបានដឹងដោយខ្លួនគេផ្ទាល់ថា ពួកគេគឺជាបុត្រាបុត្រីរបស់ព្រះ ។ អ្នកក៏អាចស្ថាបនាសេចក្តីជំនឿផ្ទាល់របស់អ្នកលើព្រះគ្រីស្ទបានផងដែរ ដើម្បីឲ្យទីបន្ទាល់របស់អ្នកនឹងឈរយ៉ាងរឹងមាំទោះបីជាមានខ្យល់ព្យុះបោកបក់ក្តី ។
-
ភាពក្លាហាន ។ វាទំនងជារឿងល្ងង់ខ្លៅដែលប្រៀបធៀបភាពក្លាហានរបស់អ្នកទៅនឹងភាពក្លាហានរបស់ពួកគេ ។ ពួកអ្នកត្រួសត្រាយបានប្រឈមមុខនឹងគ្រោះថ្នាក់ជាក់ស្តែងខាងរាងកាយរៀងរាល់ថ្ងៃ ប៉ុន្តែយើងត្រូវតែប្រើភាពក្លាហានដូចគ្នានោះនៅក្នុងខ្លួនយើង ដើម្បីចែកចាយដំណឹងល្អជាមួយមនុស្សដទៃ ហើយរស់នៅផ្សេងពីអ្វីដែលពិភពលោកនេះរស់នៅ ។ ការចងចាំអំពីភាពក្លាហានរបស់ពួកអ្នកត្រួសត្រាយអាចជួយយើងឲ្យយកឈ្នះលើឧបសគ្គរបស់យើង ។
-
ការប្តេជ្ញាចិត្ត ។ នៅពេលសោកនាដ្ឋកម្មបានកើតឡើង ពួកអ្នកត្រួសត្រាយអាចមានសំណួរយ៉ាងងាយអំពីភាពយុត្តិធម៌នៃស្ថានភាពរបស់ពួកគេ ប៉ុន្តែការប្តេជ្ញាចិត្តរបស់ពួកគេបានជួយនាំពួកគេ ដោយទុកចិត្តថា អ្វីៗនឹងស្រួលទាំងអស់ ។ បច្ចុប្បន្ននេះ យើងអាចមានការជឿជាក់បែបនោះ ហើយដឹងថា ទោះបីជាពិភពលោកប្រាប់យើងនូវអ្វីក៏ដោយ « អ្វីៗសព្វសារពើបានត្រូវធ្វើឡើងទៅតាមប្រាជ្ញារបស់ទ្រង់ ដែលជ្រាបគ្រប់ការណ៍ទាំងអស់ » (នីហ្វៃទី ២ ២:២៤) ។
-
ពលិកម្ម ។ ទស្សនវិស័យដ៏រឹងមាំរបស់ពួកអ្នកត្រួសត្រាយអំពីអ្វីដែលពួកគេកំពុងធ្វើ បានជួយពួកគេឲ្យធ្វើពលិកម្មចាំបាច់នានាដើម្បីបន្តឆ្ពោះទៅមុខ ។ យើងអាចពឹងផ្អែកលើទស្សនវិស័យដូចគ្នានេះ ដែលបាននាំពួកអ្នកត្រួសត្រាយឲ្យបន្តបោះជំហានទៅមុខ—ក្នុងការស្ថាបនាសាសនាចក្រនៃព្រះ—នៅពេលយើងត្រូវលះបង់នូវអ្វីៗនាបច្ចុប្បន្ននេះ ។
-
សាមគ្គីភាព ។ ការធ្វើដំណើរនៅក្នុងរទេះមានន័យថា មនុស្សគ្រប់រូបត្រូវមើលថែគ្នាទៅវិញទៅមកអំឡុងពេលធ្វើដំណើររបស់ពួកគេទៅទីក្រុងស៊ីយ៉ូន ។ នៅពេលយើងធ្វើការដើម្បីស្ថាបនាទីក្រុងស៊ីយ៉ូននាពេលបច្ចុប្បន្ននេះនៅក្នុងវួដ ស្តេក សាខា គេហដ្ឋាន និងសហគមន៍របស់យើង នោះយើងក៏ត្រូវព្យាយាមលើកស្ទួយ និងរាប់បញ្ចូលមនុស្សដទៃនៅជុំវិញយើងផងដែរ ។