បញ្ចាំងពន្លឺរបស់អ្នកចេញទៅ
ជា មិត្តភក្តិ និង ជាអ្នកផ្សព្វផ្សាយសាសនា
ជម្រាបសួរ ! ខ្ញុំឈ្មោះ វ័ន បៅធីស្តា ហើយខ្ញុំមកពីប្រទេសអាហ្សង់ទីន ។ ខ្ញុំបញ្ចាំងពន្លឺរបស់ខ្ញុំចេញទៅ តាមរយៈការចែកចាយដំណឹងល្អ ។
កល្យាណមិត្ត
កល្យាណមិត្តរបស់ខ្ញុំ ហ្វាឃុនដូ និងខ្ញុំបានស្គាល់គ្នាតាំងពីពួកយើងនៅអាយុប្រាំឆ្នាំមកម៉្លេះ ។ ពួកយើងទាំងពីរនាក់ចូលចិត្តកីឡាបាល់ទាត់ ! ខ្ញុំបានអញ្ជើញគាត់ឲ្យមកសកម្មភាពជាច្រើនរបស់សាសនាចក្រ ។
សំណួរទីមួយរបស់ហ្វាឃុនដូ
មានគ្រាមួយ នៅពេលហ្វាឃុនដូបរិភោគអាហារពេលល្ងាចជាមួយពួកយើង គាត់បានសួរថា « ហេតុអ្វីគ្រួសាររបស់អ្នកអធិស្ឋានជានិច្ច ? » ខ្ញុំបាននិយាយថា ដោយសារព្រះវរបិតាសួគ៌បានប្រទានពរដល់យើង ហើយនេះជារបៀបដែលពួកយើងថ្លែងអំណរគុណចំពោះទ្រង់ ។ គាត់មានការអស្ចារ្យក្នុងចិត្តណាស់ !
រាត្រីជួបជុំក្រុមគ្រួសារ
ហ្វាឃុនដូបានមកចូលរួមកម្មវិធីរាត្រីជួបជុំក្រុមគ្រួសារ ពេលប្អូនប្រុសរបស់ខ្ញុំ បេនយ៉ាមីន ត្រៀមខ្លួនរួចជាស្រេចដើម្បីទទួលបុណ្យជ្រមុជទឹក ។ ហ្វាឃុនដូទទួលអារម្មណ៍ពីព្រះវិញ្ញាណបរិសុទ្ធ ហើយគាត់បានសួរប្រសិនបើគាត់អាចទទួលបុណ្យជ្រមុជទឹកផងដែរ ! ក្រោយមក ឪពុករបស់ខ្ញុំបាននិយាយទៅកាន់ឪពុកម្តាយរបស់ហ្វាឃុនដូ ។
ពួកអ្នកផ្សព្វផ្សាយសាសនាបានបង្រៀនក្រុមគ្រួសាររបស់ហ្វាឃុនដូ ។ បន្ទាប់មក ទាំងហ្វាឃុនដូ និងបងស្រីរបស់គាត់ អ័រហ្គើស្ទីន បានទទួលបុណ្យជ្រមុជទឹក ! ឪពុកម្តាយរបស់គាត់បានមកព្រះវិហារ ប៉ុន្តែពួកគាត់ពុំទាន់ជ្រមុជទឹកនៅឡើយទេ ។
សំណួរទីពីររបស់ហ្វាឃុនដូ
ហ្វាឃុនដូបានសួរម្តាយរបស់ខ្ញុំថា តើគាត់នឹងចេះច្រើនអំពីព្រះដូចជាខ្ញុំដែរឬអត់ ។ ម្តាយរបស់ខ្ញុំបានញញឹម ហើយនិយាយថា ប្រសិនបើគាត់សិក្សាព្រះគម្ពីរ ហើយអធិស្ឋាន នោះគាត់អាចរៀនបានកាន់តែច្រើន !